Ya Arooma
14 Munvaresese ntthu rina waamini woololovaca, masi nhinhukhumu nlattu wookhalana moopuwelelo oovirikana ni nyuuva. 2 Ntthu rina waamini naalya citthu cotheene, masi ntthu khanle oololovaca nolyaa mataakhuru paasi. 3 Ule nolya citthu cotheene hinthanye ule hinlya citthu cotheene, ni ule hinlya citthu cotheene hinhukhumu ule nolya citthu cotheene, kontha Nluku homwaakhela uyo ntthuuyo. 4 nyuuva mwaapani oopheela unhukhumu nanteko ankhunaninyu? Apwiiyaawe paasi phinlamuliya ucuwela wakhala wiira naapanka itthu yomaana awula yoohinamaana. Masi Yehova nankavihera upanka citthu comaana.
5 Ntthu pooti woona nihuku ukhala nofayita uvikana nihuku nikiina, masi ntthu nkiina pooti woona toko mahuku otheene anaalikana; masi khula ntthu aamini wanrimani wawe. 6 Ule noona ukhala nihuku nimoca nofayita, anttitthimihe Yehova nno nihukunno. Ule nolya citthu cotheene anttitthimihe Yehova, ule hinlya citthu cotheene nanttitthimiha Yehova ni ansukhuru Nluku. 7 Khweeliini, khaavo neekhala mwaneennyaawe, ni khaavo neekhwela mwaneennyaawe. 8 Kontha, hiiva nakhalaka akumi ninonkhalela Yehova; nakhwaaka ninonkhwela Yehova. Kontha hataa nakhalaka akumi vano nikhwaaka, nikhanle atthu a Yehova. 9 Iyo phaamwiirihile Yesu ukhwa ni wunwelelihiya: wiira akhale Apwiiya aatthu ookhwa ni aatthu akumi.
10 Vano nlattuni nnonhukhumweenyu munneenyu? Awula nlattuni nnonthanyeenyu munneenyu? Kontha otheene cihu ninaahala uhukhumwiya ni Nluku. 11 Kontha uhantikhiya co: “‘Toko kinkhalaaka,’ neera Yehova, ‘atthu otheene anaahala ukikhoromela uhoolo waka ni apinaatamu otheene anaahala ukittitthimiha yiiraka wiira miiva kikhanle Nlukwaaya,’” 12 Coo, khula ntthu naarwaa waakhula uhoolo wa Nluku.
13 Phimaana nihihukhumwane ayaayoru, uhiya commo nipanke yotheene inkhitiriihu wiira nihinkakathule awula ummorosa munneehu. 14 (Mi kinaacuwela mwancina na Apwiiya Yesu wiira khiivo itthu yowiihiriha mwaaneennyaaya; uhikhanle ntthu uwehera khampa yoohiirya. Vano yooyo thinoona ukhala yoohiirya.) 15 Wakhala wiira munneenyu naakakathuwa nlattu wo yoolya nnolyeenyu, nyuuva khannonfenta uyo munnooyo. Nhinkakathule nkhunaninyu nlattu wo yoolya nnolyeenyu, ule Yesu Kristu nkhwenlyaawe wiira amoopole. 16 Phimaana, nhihiyerere yuulumiyaka pusya itthu yomaana nnopankeenyu. 17 Kontha Umwene wa Nluku khuntaphulela ulya ni uwurya, masi untaphulela isariya, nnema ni utteeliya umphwanyeehu nlattu wo nnepa wowaarya. 18 Ule novara nteko khampa ipottha ya Kristu nanciveliha Nluku ni naahisimiya ni atthu.
19 Phimaana, niikurumice upanka citthu cinwaana nnema ni citthu cinaalipiha akhunanihu. 20 Nhiye wuuluma pusya nteko wa Nluku nlattu wo yoolya paasi. Khweeliini, icoolya cotheene cinaatthunihiya ulya, masi khawaahala ureera ulya iyoolya yaahala unkakatusa nkhunanihu. 21 Phataari uhikhuura inama, uhiwurya iviinyu, hataa upanka itthu ikhwaawe yaahala umwiiriha munneenyu ukakathuwa. 22 Itthu inkupaliinyu nsunke wanrimani winyu uhoolo wa Nluku. Horeeriya ule hineehukhumu nlattu itthu inoonaawe wiira ikhanle yomaana. 23 Masi, wakhala wiira ntthuuyo nawaanyihacera ni naalya, uyo naattheka, kontha khanlya aaminiki. Ni citthu cotheene cihinvaranaca nuwaamini cikhanle itampi.