Iwarakha yoopacera yantikheliyaaya akorintu
7 Vano, kuulumaka mwaha wantikhileenyuuyo, mi kinwiirelani wiira phataari hikhale nlopwana nonruparupana nthiyana; 2 masi, ukhala wiira urupihana woohiloka* uhoomwaryeela, khula nlopwana haana akhalanaka amwaarawe ni khula nthiyana haana akhalanaka awannyawe. 3 Nlopwana oothela, aavahe amwaarawe ile imphwanelaaya uvahiya, ni nthiyana ootheliya, aavahe awannyawe ile imphwanelaaya uvahiya. 4 Nthiyana ootheliya irutthwaawe khinakhala-tho yawawe, masi yaawannyawe. Inanna imocaaru, nlopwana oothela irutthwaawe khinakhala-tho yawawe masi yaamwaarawe. 5 Weeva nlopwana oothela ni weeva nthiyana ootheliya, wiira Sotwani huuttehatteheni nlattu woohikhitiri wiivaraca, uhaakhottihere amwaaraa awula awannyaa ile imphwanelaaya uvahiya, uhikhanle wiira nhooleehana, wiira nkhitiri ukhalana ukati woolompa ni nuuwakatyaaya nkhalakhale-tho wamoca. 6 Masi, khunakhala wiira mi kinawaaca wuurumani, mi kinawaaca wuutthuniherani. 7 Masi mi kampheelaka wiira alopwana otheene anari toko miiva. Masi hataa ukhalaka commo, Nluku nvahile khula ntthu itthu inkhitiryaawe upanka saana; phimaana, akhwaawe anaalakela uthela ni akiina anaalakela uhithela.
8 Vano, ule hinaaya uthela ni ule khweliye amwaarawe awula awannyawe, kimwiirela co: Phataari ukhala woohitheliya awula woohithela khampa miiva. 9 Masi, wakhalaka wiira ntthuuyo khankhitiri wiivaraca, phataari uthela awula utheliya. Kontha unaareera ntthuuyo uthela awula utheliya uhiya ukhala aciveliyaka venci.
10 Vano, ale athelanne kinawaalaka, kahi miiva, masi Apwiiya phineera co: Nthiyana ootheliya haakhumele awannyawe. 11 Masi, wakhalaka wiira nthiyanooyo naalakela waakhumela awannyaawyaayo, khanlamuliya utheliya, awula haana ammalihacaka naawannyawyaayo nanrokottole khumelenlyooyo; ni nlopwana khanlamuliya waamwalanana amwaarawe.
12 Masi, atthu akhwaawyaayo kinwiirela co, iyeeni thi mi kineera, kahi Apwiiya: Wakhala wiira haavo munna rina amwaarawe ahinonkupali Kristu ni nanlelo anaapheela ukhala nuuyo, uyo haahiye ayo athiyanaayo; 13 ni wakhala wiira ahaavo arokorihu atheliye ninlopwana hinonkupali Kristu, ni uyo nlopwanooyo nanlelo naapheela waakhalana arokorihwaayo, ayo arokorihwaayo ahinhiye uyo nlopwanooyo. 14 Kontha nlopwana hinonkupali Kristu khanle owaarya nlattu waamwaarawe, ni nthiyana hinonkupali Kristu khanle owaarya nlattu waawannyaawe; uhiri commo, paasi Nluku aahala uwoona asaaniiywaayo ukhala oohiirya, masi ayo akhanle owaarya. 15 Masi, wakhalaka wiira ntthu hinonkupali Kristu uyo naalakela waahiya amwaarawyaayo awula awannyawyaayo, uyo pooti waahiya; munneehuuyo awula nrokorihuuyo kankhanyererihiya unkhalakhalana uyo ntthuuyo, masi Nluku haavaha nnema ayo atthwaayo. 16 Kontha weeva nthiyana, uncuwela cani wiira khunhala ukhitiri uwoopola awannyaa? Awula, weeva nlopwana, uncuwela cani wiira khunnhala ukhitiri uwoopola amwaaraa?
17 Vano, ila ikanweela kinaavaha mayamunna omaloko otheene, khula ntthu akhale apankaka ile ikhitirihiyaawe ni ivahiyaawe ni Yehova, khula ntthu apanke ile yaapankaawe hinaaya wiihaniya wiira ancere umwaamini Nluku. 18 Ahaavo yaari owuulihiyeene ukati weehaniyaaya ni Nluku? Wakhala commo, ahipanke itthu wiira aturuwele ukhala oohuula. Ahaavo yaari oohuulihiya ukati wiihaniyaaya ni Nluku? Wakhala commo, ahipanke itthu wiira yuulihiye. 19 Wuulihiya ni uhuulihiya khiivo itthu irina ifayita; itthu yofayita cinene, ukhanle wiiwelela marumo a Nluku. 20 Khula ntthu, akhale khampa caaryaawe ukati wiihaniyaawe. 21 Wakhala wiira wiihaniye unari ipottha, uhikhale niiwasi-waasi nlattu yo iyo itthwiiyo; masi waleviyaka vale, ulawe nwo uleviyanwo. 22 Kontha ule eehaniye nari ipottha, nnaco uyo holeviya ni khanle ipottha ya Apwiiya; inanna imocaaru, ule eehaniye hinakhala ipottha, nnaco khanle ipottha ya Kristu. 23 Nyuuva nhothumiya niiperesu yinci; phimaana, nhiye ukhala ipottha caapinaatamu. 24 Mayamunna, khula ntthu akhale khampa ukati weehaniyaawe.
25 Vano, kiwaacaka ale ahinapaca uruparupa ni ntthu, mi akirina nuulumo ninkhuma wa Apwiiya, masi miivano kihaana itthu yowaahimyeera ayo atthwaayo, ukhala wiira kintthu kimmwiiwelela Nluku nlattu woonamaana wa Apwiiya. 26 Phimaana, mi moonelwaaka, unaareera nlopwana ukhala woohithela, nlattu woorikarika makhalelo omahukwaala. 27 Kiireke wiira weeva uhothela? Wakhala commo, uhiye umananiha ukhala ootaphuwa. Kiireke wiira weeva khuuthenle? Wakhala commo, uhiye umwaavya nthiyana wiira unthele. 28 Masi, wakhalaka wiira weeva unaalakela uthela awula utheliya, khunkosa. Ni, wakhalaka wiira ntthu hinapaca unruparupana ntthu naalakela uthela awula utheliya, uyo ntthuuyo ciicammo khankosa. Masi ule nolakela uthela naahala waanana marikariko muukumini wawe.* Ni mi kimmananiha wuukaviherani wiira nhaanane ayo marikarikwaayo.
29 Uhiya commo, kinwiirelani co mayamunna: Ukati uhanlyooyo ukhanle vakaani. Ukhuma nenna co, ale athenle, akhale khampa wiira khaathenle; 30 ale anonla akhale khampa khaanonla; ale ari ootteeliya akhale khampa khari ootteeliya, ale anthumathuma, akhale khampa wiira khiivo irinaaya; 31 ni ale amphwanyera ifayita citthu co ila ituniyeela, akhale khampa wiira khanvarela nteko. Kontha citthu co mu ntuniyani mu cineera caviraka. 32 Khweeliini, itthu impheelaaka miiva, ukhanle nyuuva uhikhala niiwasi-waasi. Kontha, nlopwana oohithela neekurumica uvara miteko ca Apwiiya ni neekurumica waatteeliha nrima Apwiiya. 33 Masi nlopwana oothela nokhala niiwasi-waasi ni citthu co ntuniyani, ukhala wiira nopheela waatteeliha nrima amwaarawe, 34 ni nokhala ookawannyaaca. Uhiya commo, nthiyana oohitheliya ni nthiyana hinapaca urupa ni nlopwana, neekurumica uvara miteko ca Apwiiya, wiira akhale owaarya mwiirutthuni wawe ni mmoopuweleloni wawe. Masi nthiyana ootheliya, nokhala niiwasiwaasi ni citthu contuniyani, ukhala wiira nopheela waatteeliha nrima awannyawe. 35 Kinooluma commo wiira kuukavihereni, akimpheela uwaateelihani upanka citthu cinoocivelani. Mi kimpheela wiira mpanke citthu comaana ni nvare miteko ca Apwiiya khula mahuku, woohikhala itthu yowuurikarikihelani.
36 Masi, wakhala wiira haavo hinathela awula hinatheliya ni nawoona wiira khankhitiri wiivaraca uphela uruparupa nintthu, ni oona wiira hopwahiha myaakha ceemirawo,* ila phi itthu inlamuliyaawe upanka: phataari uyo ntthuuyo uthela awula utheliya. Apankaka commo, khanhala uttheka. 37 Vano, wakhalaka wiira ntthuuyo naalakela wanrimani wawe uhithela awula uhitheliya ni naakhitiri wiivaraca nhina uphela uruparupa* ni ntthu, uyo ntthuuyo aahitheleke awula aahitheliyeke naahala upanka saana. 38 Ciicammo, ule nolakela uthela awula utheliya naapanka saana, masi ule nolakela uhithela awula uhitheliya, phintepa upanka itthu yomaana.
39 Nthiyana ootheliya hootthukiya ninlamulo ukati wootheene awannyawe unhalaaya ukhala akumi, masi awannyaawe yakhwaka, uyo nthiyanaayo naataphuwa wiira atheliye ninlopwana nkhwaawe, masi haana atheliyaka mwa Apwiiya.* 40 Moonelwaaka, uyo nthiyanooyo noohala utepa ukhala ootteeliya akhalaka woohitheliya; ni mi kinaakupali wiira kihaana ciicammo nnepa wowaarya wa Nluku.