Miteko co Mapostolu
10 U Sesareya ahaavo nlopwana mmoca eehaniya Korneliyu, nhooleli aanatoropa* okhurupu yo Italia. 2 Uyo aari nlopwana answalela ni aamoova Nluku ni atthu otheene owapuwani wawe. Aanaakavihera amasikhini ni khaahiyerera unlepela Nluku isontte. 3 Narumile 15 oora, uyo aahokhalana iwooni ni ahoona nlayikha na Nluku namwaattamelaka ni namwiihanaka: “Korneliyu!” 4 Oovaka, Korneliyu ahoweheeha nno nlayikhanno ni ahokoha co: “Isiyani pwiiya?” Nno nahaakhula: “Ulompa waa, uheewiya ni waakavihera waa amasikhini Nluku khanhala uliyala. 5 Phimaana, waarume alopwana phiyaaru va, wiira anrweele u Yope nlopwana neehaniya Simau, ncina nincuwelaciyaawe nikhanle Peturu. 6 Uyo nlopwanooyo, lukamile uwannyawe Simau, novara nteko ninttapala, inupaawe iri wakhiviru niipahari.” 7 Vano, nlayikha naamuulumananno urwaa waya, uyo ahowiihana anantekwaawe eeli ni natoropaawe mmoca aamoova Nluku aapanka mphantte waanamakaviheraawe, 8 uyo ahaahimeerya citthu cotheene ni ahaaruma u Yope.
9 Waaseele, anari ninttala ni anaattamenleene iyo isittattiiyo, Peturu ahowela nipirothi nooculu wiira alompe, waari 12 oora. 10 Vano, uyo yahonvola itala cinene, ni ampheela ulya. Ukati waatthenkaciyaaya iyoolya, uyo ahokhalana iwooni. 11 Uyo, ahoona irimu inahulyeele ni ahoona itthu yoolattanaca niilensoli yoovevyaala, inavareliye mmaloothoni oomacese ikhuruwelaka watuniyani. 12 Mmo cahaavo inama co metto micese, inwaa ni ciicammo inuni cowiirimu. 13 Ahiiwa ncu namwiirelaka: “Peturu, wunwe, wiive ni ukhuure!” 14 Vano, Peturu ahaakhula co: “Akintthuna Pwiiya, kontha mi akinapaca ukhuura inama inthanyaciya awula yoohirya. 15 Ni ncunno nahomwiirela-tho Peturu ikwaha yonayeeli co: “Uhiye wiihana coohiirya citthu Nluku cireerihilyaawe.” 16 Iyo yaheerannya ikwaha yoneeraru ni ikuweeyo, yahoturuseliya wiirimu.
17 Peturu ahosanka eekohaka itthu yoonalyaawe maanaaya isiyani. Uyo ukatyuuyo, alopwana yaarumiye ni Korneliyu yahokoha inupa ya Simau yaari vayi, ni yaheemela wankhorani. 18 Yahomwiihana ntthu aakhala iyo inupeeyo, ni yahonkoha wakhala wiira Simau aacuweliya ukhala Peturu, aalukamile mommo. 19 Peturu nanlelo oopuwelaka itthu yooniheriyaawe, nnepa wowaarya wahomwiirela: “Ahaavo alopwana araru anwaavya. 20 Wunwe ni waatthare woohoova, kontha thi mi kaarumile.” 21 Vano, Peturu ahokhuruwa ni ahowiirela ayo alopwanaayo co: “Nnomwavyeenyuuyo thi miiva, nnopheelani?” 22 Yahomwiirela co: “Korneliyu nhooleli aanatoropa, nlopwana osariya ni nomoova Nluku, ayuuta otheene ammuulumaaya saana, haakhela malakihero a Nluku himeriyaawe ninlayikha, wiira awiihaneni uwannyawe ni ooviriyaneni itthu nnopheeleenyu uhimya.” 23 Vano, Peturu ahowiirela akeleke ni ahaavaha mapuro wiira arupeke.
Waaseele, aahonwa ni ahorwaa nkhayi naayo, ni mayamunna o Yope yahonveleela. 24 Uvira waya nihuku nimoca, yahophiyaca u Sesareya. Khweeliini, Korneliyu anwaarerihaca, ni ahaathukumaniha amucyaawe ni asipatthannyaawe. 25 Peturu uphiya wawe, Korneliyu ahontthawelela, ahokhoroma uhoolo wawe ni ahonttitthimiha. 26 Vano, Peturu ahomunwusa amwiirelaka: “Wunwe ni miiva ciicammo kipinaatamu.” 27 Amoopanakoono mwaha, uyo ahokela mpaani ni ahaaphwanya atthu enci anathukumanne. 28 Uyo ahowiirela: “Nyuuva nnaacuwela sana-saana wiira ayuuta anaakhottiihiya ukhala nkhayi naatthu okhapila cikhwaawe. Masi Nluku hokoonihera wiira akinlamuliya unthanya ntthu awula umwiirela oohiirya. 29 Phimaana, ukati kiihaniyaaka, akilipalipile. Vano, kinaakoha kontha isiyani kiihaniyaaka?”
30 Korneliyu ahaakhula: “Mahuku macese uttuli, kanlompa kinari uwaani, cenya iwooranyenya, waari 15 oora, ahokikhumelela nlopwana uhoolo waka, aawanre ikuwo cowaarya. 31 Uyo nlopwanooyo aheera: ‘Ulompa waa uheewiya, ni waakavihera waa amasikhini Nluku khanhala uliyala. 32 Phimaana, unveleelihe ntthu u Yope wiira amwiihane Simau, nocuweliya ukhala Peturu. Uyo nlopwanooyo, lukamile uwannyawe Simau, novara nteko ninttapala, inupaawe iri wakhiviru niipahari.’ 33 Miiva kihowiihaniha woohipica ni weeva uhowa. Vano, niri otheene va, uhoolo wa Nluku wiira nuuviriyane citthu Yehova cuurumilyaawe unihimerya.”
34 Vano Peturu ahancera wuulumaca ni aheera: “Nna co kihoona wiira Nluku khanonthanla ntthu, 35 masi uyo nawaapheela atthu otheene ammoova ni ampanka citthu comaana. 36 Uyo ahaaveleelihera nuulumo nawe asaana o Isarayeli, alalyeeraka ihapari comaana connema anvarelaka nteko Yesu, ule khanle Pwiiya aatthu otheene. 37 Nyuuva, nnaacuwela mwaha woolumiya Yuteya otheene, waapacenre u Kalileya, Joau ulalyeera wawe mpattiso. 38 Amuulumaka Yesu aari o Nasaree, mananna Nluku canthanlilyaawe ninnepaawe wowaarya ni ikuru cawe, uyo aheetta ncoko wotheene apankaka citthu comaana ni aavonihaka atthu yaahuvihiya ni Tiyapu, kontha Nluku aari nuuyo. 39 Otheene cihu vaa, ninaacuwela citthu cipankilyaawe u Yuteya ni u Yerusalemu, masi yahonkhomela wanipottoni ni yahomwiiva. 40 Nluku ahomunweleliha nihuku noneeraru ni ahotthuniha wiira ooniye, 41 kahi naapoovu otheene, masi atthu athanliye khalayiiru ni Nluku, hiiva ninlyanne ni ninwuryanne wunwelelihiya wawe. 42 Uyo ciicammo horuma wiira naalalyeere apoovu ni naavahe usaahiti atthu otheene, wiira uyo thanliye ni Nluku, wiira akhale suwiisi aatthu akumi ni ookhwa. 43 Phiyooyo, ule, maporofeeta ammulumaaya yiiraka wiira ule nohala umwaamini naahala uleveleliya matampi mwancina nawe.”
44 Peturu nanlelo oolumacaka nnyo citthunnyo, nnepa wowaarya wahaakhuruwela atthu otheene yanviriyana. 45 Alopwana ookhuluvelya yaawile nkhayi ni Peturu yahokhala ootikhinihiya, kontha itthuvo yonnepa wowaarya yaanawaamorela ciicammo atthu oohikhala ayuuta. 46 Kontha ayo yanwiiwa yuulumaka iluuka cikhwaawe ni yanttitthimihaka Nluku. Vano, Peturu aheera co: 47 “Ala atthwaala, ahaakhela nnepa wowaarya toko hiiva. Niireke haavo nohala waathuwa maaci, aakhottiheraka upattisiya?” 48 Vano, ahoruma wiira apattisiye mwancina na Yesu Kristu. Ni ayo yahonlepela wiira akhale mahuku vakaani-tho naayo.