Yonayeeli ya Peturu
1 Miiva Simau Peturu, ipottha ni apostolu a Yesu Kristu, kinwantikhela ale arina waamini toko hiiva* nlattu wosariya ya Nlukwiihu ni moopoliihu Yesu Kristu.
2 Nhihiyerere ukhalana unamaana woonironya ni nnema nlattu woocuwelaca weekhweeli wa Nluku ni Yesu Apwiiyeehu. 3 Kontha Nluku niikuru cawe, honivaha* citthu cotheene nimpheeleehu muukumini wihu ni upheela unswalela uyova paasi, nlattu woncuwela saana Ule niihanne munttitthimihoni ni mmakhaleloni wawe. 4 Nlattu wo nnya citthunnya, Nluku honikhuluveliha* citthu cofayita ni cuulupale, wiira nlattu wo nnyo citthunnyo, nkhalane makhalelo arinaawe nnahiile citthu cootakhala co ila ituniyeela, cennyo cinkhumelela nlattu woopheela citthu cootakhala.
5 Nlattu wo iyo itthwiiyo, muncerere waamini winyu ukhanle ureera winyu nrima; ni ureera winyu nrima, ucuwelaca; 6 ucuwelaca winyu, uwiiriheni wiivaraca; wiivaraca winyu, uwiiriheni uvilela; uvilela winyu, uwiiriheni unswalela Nluku paasi; 7 unswalela winyu Nluku paasi, uwiiriheni ukhalana nifento no mayamunna; nifento ninyu no mayamunna, niwiiriheni waafenta atthu otheene. 8 Kontha mwakhalanaka nnya citthunnya, nnaahala wiimiha mihokorokho cinhela nhina ucuwelaca weekhweeli wa Apwiiyeehu Yesu Kristu.
9 Ntthu hirina ayo makhalelwaayo, uyo khanoona, ni naattiyelela miithwaawe wiira hoone iluusu* ni holiyala wiira matampyaawe okhalayi aholeveleliya. 10 Phimaana mayamunna, nhihiyerere wiikurumica ni uvaresesa wiihaniya winyu ni uthanliya winyu, kontha nyuuva mwaahihiyerereke nnyo citthunnyo, khannohala uhiya waamini winyu. 11 Naayo manannaayo, phinhaleenyu utthuniheriya ukela muumweneni woottitthima woohimala wa Apwiiyeehu ni Moopoliihu Yesu Kristu.
12 Iyo itthwiiyo phinkiiriha miiva ikwaha cotheene uwuupuserani nnya citthunnya, hataa ukhalaka wiira nyuuva nnaacuwela ni nri oolipa nhina ikhweeli ciitthucileenyu. 13 Masi, nanlelo kinarina ila irutthwiila,* kinoona ukhala itthu yomaana uwuupuserani nhina ikano cinoovahaakani, 14 kinaacuwela wiira woohipica irutthwaaka inaahala ukusiya, khampa Apwiiyeehu Yesu akihimenryaaya sana-saana. 15 Kinawiikurumica upanka yotheene inkhitiryaaka, wiira karwaaka nhale muupuwelaka* nnya citthunnya.
16 Mena, khunakhala nlattu wootthara ihantisi cowoothiya ni cookumihereriya naapinaatamu, hiiva nihaacuweliha ikuru ni uwa wa Apwiiyeehu Yesu Kristu; uhiya commo, hiiva nihokhala masaahiti owaarya wawe. 17 Uyo hottitthimihiya ni Nluku, Athumwaane, ukati wuulumilyaaya ala moolumwaala* yeeraka: “Ula phi mwanaka nonfentaaka ni nokitteeliha nrima venci.” 18 Iyee, hi naaheewa ayo moolumwaayo yakhumaka wiirimu, ukati waariihu umwaakoni wo waarya nuuyo.*
19 Phimaana, hiiva ninkupaliihu moolumo omaporofeeta wiira anaahala wiirannya, ni nnaapanka saana mwaviriyanaka sana-saana, ayo moolumwaayo anlikana ni ilampata immwaleela mapuro ooripela mpaka unsaaya ikhumaka itthonttwa yuulupale, wanrimani winyu. 20 Uhiya commo, nyuuva nnaacuwela sana-saana wiira khiivo inatiri iri nhina Cowantikhiya Cowaarya yantikhiye nimoopuwelelo aapinaatamu. 21 Kontha inatiri khinapaca ukumiheriya nuutthuna waapinaatamu, masi apinaatamu yooluma moolumo a Nluku, yakaviheriyaka* ninnepa wowaarya.*