Yoopacera ya Peturu
1 Mi Peturu, apostolu a Yesu Kristu, kinwantikhela oothanliya akhanle aletto amwaryenle ilapo yo Pontu, yo Kalaasiya, yo Kapatoosiya, yo Asiya ni yo Pitiiniya, 2 Athanliye khalayiiru ni Nluku Apaapeehu, ni nnepa wowaarya, wiira yiiwelele ni yaakhele iphome ya Yesu Kristu.
Nhihiyerere ukhalana nnema ni unamaana woonironya.
3 Attitthimihiye Nluku Apaapaaya Apwiiyeehu Yesu Kristu, Kontha, niikiriri caya cuulupale, ahoniphwanyiha uyariya wonaanaano wiira nikhalane niweherero neekhweeli nlattu wowunwelelihiya Yesu Kristu, 4 wiira naakhele itthuvo ihinontta,* yoohinanaraca ni ihinfuttya, isunkeriyeenyu wiirimu. 5 Nyuuva nnosunkiya niikuru ca Nluku, nlattu wowaamini, wiira moopwee wiimaleloni. 6 Nlattu wo iyo itthwiiyo, nyuuva nnaatteeliya nrima venci, hataa ukhalaka wiira ukati vakaani, nnaacukulacihiya ni citthu cinoottehattehani, 7 wiira waamini winyu woolipa, urina ifayita uvikana iwooru inontta, hataa ukhala wiira uttehattehiye ni mooro, moonele khampa itthu inwiirihani uttottopela, uttitthimiha ni uhisima ukati unhalaawe uwa Yesu Kristu. 8 Hataa ukhalaka wiira khannamoona nyuuva nnanfenta. Hataa ukhalaka wiira khannomoona nna coo, nyuuva nhomwaamini ni unawuutteelani nrima venci ni utteeliya winyu khaavo nokhitiri utaphulela, 9 ukhala wiira nneera mphwanyaka itthu inaavyeenyu nuwaamini winyu: ukhanle woopoliya.*
10 Yuulumaka nwo woopoliyanwo, maporofeeta yahohimya yaacaka unamaana woonironya uvahiyeenyu, yaheekurumica utothatotha sana-saana. 11 Ayo maporofeetaayo, yahopheela ucuwela ukati* ni citthu yakaviheriyaka ni nnepa wowaarya, wiira acuwele ukati caahalaaya umwiirannyeela Kristu citthu caahimiye khalayiiru. Uyo nnepooyo wahothoonyera khalayiiru mananna Kristu caahalaawe uhuva ni mananna caahalaawe uttitthimihiya. 12 Ayo maporofeetaayo yahohimeriya wiira khayeevarela nteko asineennyaaya, masi yoovarelani nteko nyuuva, yaacaka citthu cihimeeriyeenyu naale yaalalyeera ihapari comaana yakaviheriyaka ni nnepa wowaarya waakhuma wiirimu. Nnyo phi citthu malayikha ampheelaaya ucuwela.*
13 Phimaana, ntthenkace moopuwelelweenyu, wiira nvare nteko; nhiitthaale; nvaresese niweherero ninyu nrineenyu nlattu woonamaana woonironya munhaleenyu wooniheriya ukati unhalaawe uwa Yesu Kristu. 14 Khampa asaana owiiwelela, nhiye moopuwelelo oohiloka mwaarineenyu khalayi, ukati mwahancuweleenyu Nluku, 15 masi, khampa ule wiihanneni khanlyaawe owaarya, ni nyuuva ciicammo nkhaleke owaarya nhina meettelweenyu otheene, 16 kontha uhantikhiya co: “Nkhale owaarya, toko miiva cikhanlyaaka owaarya.”
17 Mwaalepelaka Apaapa anhukhumu niisariya, anhukhumuku khula ntthu nlattu wo miteko cawe, nwoove ukati nnokhaleenyu va watuninyani va khampa aletto. 18 Nyuuva nnaacuwela wiira khamoopoliye* nhina makhalelweenyu oohiloka, ni citthu cinontta, toko iparaata awula iwooru, toko nhimeriyeenyu naasinhiya-taateenyu.* 19 Masi moopoliye ni iphome yofayita cinene, khampa yo khontwa yoohirakalaca ni yoohihiiryaca, ikhanle ya Kristu. 20 Khweeliini uyo cuweliye ihinapacera ituninya, masi ooniheriye ula ukati wookhiceroola nlattu waawinyu. 21 Nlattu waawawe nyuuva nnaamwaamini Nluku, ule munwelelihile ni nttitthimihile, wiira mmwaamini ni munweherere.
22 Nna coo nyuuva nreerihiyeenyu* nlattu wowiiwelela winyu ikhweeli, unwiirihani wooniherana nifento no mayamunna neekhweeli, ntepe ufentana ni nrimeenyu wotheene. 23 Kontha nyuuva nhovahiya uyariya wonaanaano, kahi wo inuku inontta, masi wo inuku ihinontta,* wo nuulumo na Nluku nkumi, nokhala mpaka. 24 Kontha “apinaatamu ari toko* malasi, ni uttitthima waya unkhala toko ifoloore yo mmattani; malasi anawuuma ni ifoloore inaamora, 25 Masi moolumo* a Yehova* anaakhala mpaka.” Ni ayo “moolumwaayo” cikhanle ihapari comaana cilalyeeriyeenyu.