Yantikheliyaaya a Efesu
3 Phimaana, miiva Paulu, kitthukiye nlattu wa Kristu Yesu wiira kuuphwanyiheni ifayita nyuuva mwaatthivaa, . . . 2 Atthunaka nyuuva nhiiwa wiira miiva kihaakhela nrintti wowuukaviherani waakhela unamaana woonironya wa Nluku, 3 ni wiira isiiri cowaarya kiitthucihiye ni citthu cooniheriyaaka; khampa miiva kiwantikhenlyaakani wiipaceroni. 4 Vano, ukati unhaleenyu usoma, nnaahala woonenela wiira kihaana ucuwelaca wo isiiri cowaarya ca Kristu. 5 Atthu okhalayi, khayaahimeriye nnyo isiiri cowaaryannyo, khampa nna co cihimeriyaaya ni nnepa wowaarya maapoostolu ni maporofeeta wiira: 6 Atthu ahikhanle ayuuta, anaahala waataana ni Kristu Yesu nlattu wohapari comaana, waakhela ile Kristu aakhenlyaawe, ukhala irutthu imocaaru ni ninaahala waakhela nkhayi naayova itthuvo Nluku inikhuluvelihilyaawe. 7 Mi kihokhala nanteko a Nluku kinhimyaca nnyo citthunyo nlattu woonamaana woonironya ukithoonyenryaawe, avarelaka nteko nnepaawe wowaarya.
8 Uyo unamaana woonironyooyo kihothoonyiheriya miiva, uhookhalaru wiira thi miiva kitepile uyeva iriyari yaatthu otheene ookhuluvelya, kivahiye iyo iparakheeyo wiira kaahimeerye atthu ahikhanle ayuuta ihapari comaana cinuuluma iparakha cinci cinnivahaawe Kristu cihinkhitiriya waalikeliya, 9 ni wiira kiwiirihe atthu otheene ucuwela isiiri cowaarya, caavirihile ukati mwinci cinavithiye ni Nluku umpile citthu cotheene. 10 Nluku pankile iyo itthwiiyo, wiira avarelaka nteko nloko, aacuwelihe ahooleli ni akhulupale* o wiirimu ucuwelaca cinene uyova urinaawe, unoonannya nimananna oovirikana. 11 Iyo itthwiiyo invaranaca niitthu ihinhala umala, Nluku inompheelelaawe Kristu, khanle Pwiiyeehu, Yesu, 12 nonikhitiriha wuuluma nihoovaka itthu ni umwaattamela Nluku woohaanyihacera nlattu woomwaamini wihu Kristu. 13 Phimaana, nhoocyeele nlattu wo mahuviho anaananaaka mwaha waawinyu, kontha ayo mahuvihwaayo anaawiirihani uttottopeliya.
14 Phimaana, miiva kinaakhoroma uhoolo Waapaapa, 15 kontha ayo phumpile imuci cotheene, wiirimu ni va watuniyani va. 16 Kinaalompaka kinlepelaka wiira, nlattu wookhala Nluku hinlikananiya, alipihe mirima cinyu avarelaka nteko nnepaawe wowaarya, 17 ni wiira nlattu wo waamini winyu, mmweese Kristu wanrimani winyu wamoca ninifento ni wiira nkhale ookhikicerya waaliseersuni, khampa mitithari co miri cinkhalaaya. 18 Ciicammo, wiira nyuuva wamoca ni atthu ookhuluvelyaa otheene ncuwele sana-saana yaatapuwelo, irekamelo, yeemelelo ni yiiserelwaaya, 19 ni wiira ncuwele nifento na Kristu, mananna cuunuwilyaaya upwaha ucuwelaca, ni wiira nkhalane makhalelo otheene anvahaawe Nluku.
20 Ni wiira muncuwele Nluku novarela nteko ikuru cawe wiira anikavihere ukhitiri upanka citthu uvikana mananna canlepenleehu ni ciicammo mananna coopuweleehu, 21 atthu ahihiyerere unttitthimiha Nluku mpaka, nlattu wo nloko nawe ni nlattu wa Kristu Yesu. Amem.