Ya Arooma
4 Ukhala waya commo, isiyani nhiya-taateehu Aparahaamu yaaphwanyilyaawe? 2 Wootakihera, unari wiira Aparahaamu ooniye ukhala nasariya nlattu wo citthu caavaraawe, ahaana isariya yowiittottopa, masi kahi uhoolo wa Nluku. 3 Isiyani inhimyaaya itthu imoca imphwanyannya nhina Cowantikhiya Cowaarya? “Aparahaamu ahomwaamini Yehova, phimaana iyo yahomwiiriha wooniya ukhala nasariya.” 4 Kontha ntthu novara nteko aliviyaka, khunakhala wiira nothoonyiheriya unamaana , masi ikhanle itthu inlamuliyaawe uvahiya. 5 Uhiya commo, ntthu hinvara itthu masi amwaaminiki Ule nonhimya ntthu ootakhala nrima ukhala nasariya, nawooniya ukhala nasariya nlattu wowaamini wawe. 6 Inanna imocaaru, Davidi ciicammo homuuluma ntthu ootteeliya Nluku nomoonaawe ukhala nasariya, hataa avaraka miteko awula mena. 7 “Ootteeliya phaale avonyanihile nlamulo aleveleliyaka ni itampi caya cittiyelelaciye; 8 Ootteeliya phuule itampi cawe cinhala uhuupuweliya ni Yehova.”
9 Vano, niireke antteeliya paahi ale yuulihiye awula ciicammo anaatteeliya naale ahuulihiye? Kontha nineera: “Nlattu wowaamini waarinaawe Aparahaamu ahooniya ukhala nasariya.” 10 Ukatini Aparahaamu wooniyaawe ukhala nasariya? Nuulihiye awula hinaaya wuulihiya? Uyo aari hinaaya wuulihiya. 11 Ni uyo ahaakhela nthoonyero, nthoonyero nosariya, nlattu wo waamini waarinaawe hinaaya wuulihiya, wiira akhale athumwanaya atthu otheene arina waamini ahinaaya wuulihiya, wiira yooniye ukhala anasariya; 12 ni wiira uyo akhale athumwanaya atthu owuulihiya, kahi paahi ale anuulihana, masi ciicammo ale aneettela waamini, toko apaapeehu Aparahaamu waarinaaya ahinaaya wuulihiya.
13 Kontha khunakhala nlattu wo nlamulo Aparahaamu awula ucuulwaawe, waakhuluvelihiyaaya wiira yanhala uhalana ituniya, masi nlattu wosariya yarinaaya nlattu wowaamini. 14 Wakhala wiira ale ankhuluvela nlamulo phinhala waakhela itthuvo yaaleehaniye, waamini khurina-tho ifayita ni itthu yaakhuluvelihiye khinhala-tho wiirannya. 15 Khweeliini, nlamulo ninaawaana uviruwa wa Nluku, masi nipuro nihirivo nlamulo, ciicammo khuuvo uttheka.
16 Phimaana nikhuluvelihiyeehu nlattu wowaamini, wiira nlattu woonamaana woonironya wa Nluku ukhikiceriye ucuulu wa Aparahaamu, kahi paahi ale arina nlamulo, masi ciicammo ale arina waamini waarinaawe Aparahaamu, akhanle apaapeehu. 17 (Toko cantikhiyaaya: “Mi kihoopanka ukhala apaapaaya atthu enci.”) Iyo ooniheriye uhoolo wa Nluku ule aamwaaminnyaawe, ule naavaha ukumi atthu ookhwa ni nuuluma citthu cihirivo khampa cihaavo. 18 Uyo khaahala waayara asaana, masi nlattu wo niweherero naarinaawe, aanaamini wiira anhala ukhala nyari omaloko menci, toko Nluku anhimenryaawe eeraka: “Unaahala ukhalana ucuulu mwinci.” 19 Ni uhookhalaru wiira waamini wawe khawaalolovacile, uyo ancuwela wiira khaahala ukhitiri waayara asaana, (ukhala wiira uyo aarina myaakha 100), ni ciicammo ancuwela wiira Sara khaahala ukhitiri waayara asaana ukhala wiira aahooluvala. 20 Vano, nlattu wookhuluvelihiya ni Nluku, waamini wawe khawaalolovacile; masi ahokhala oolipa nlattu wowaamini wawe, anttitthimihaka Nluku. 21 Uyo ankupali wiira itthu Nluku yankhuluvelihilyaawe yanhala wiirannya. 22 Phimaana, “iyo yahomwiiriha wooniya ukhala nasariya.”
23 Vano moolumo, “iyo yahomwiiriha wooniya” khayantikhiye paasi nlattu wa Aparahaamu, 24 masi ciicammo nlattu waawihu, ninaahala wooniya ukhala anasariya, kontha ninaamwaamini Ule munwelelihile Yesu, Apwiiyeehu. 25 Uyo hovahereriya nlattu wo matampiihu ni honwelelihiya wiira nooniye ukhala anasariya.