Yonayeeli ya Akorintu
12 Mi kihaana keettottopaka. Hataa ukhalaka wiira akinhala uphurela itthu, masi mi kinaahimyaca citthu cootikhiniha cooniheriyaaka ni cihimeriyaaka na Apwiiya. 2 Kinancuwela nlopwana mmoca ari nanteko a Kristu, myaakha 14 uttuli, uyo ahokusiya wowaakuvyaaca wene nuurwaaniya irimu yoneeraru. Mi akincuwela wakhala wiira aakusiye niirutthu yeepinaatamu awula niirutthu yoominepani, masi Nluku phincuwela. 3 Iyeeni, mi kinancuwela uyo nlopwanooyo, uyo ahocisiya wowaakuvyaaca wene arwaaniyaka upeephoni, wakhala wiira arwaaniye niirutthwaawe awula mena mi akincuwela; masi Nluku phincuwela. 4 Naryeene upeephoni wonwo, uyo aheewa moolumo ahinlamuliya uhimiya ni ahintthunihiya ntthu wooluma. 5 Mi kinaahala wiittottopa nlattu wo uyo nlopwanooyo, masi akinhala wiittottopa nlattu wo miiva, uhikhanle wiittottopa nlattu wo citthu cinthonyera wiira miivano akinakuru. 6 Kontha hataa miivano kineettottopile, akaahala uthoonyera ukhala nlolo, kontha akaahala uhimya ikhweeli. Masi miiva kinaasempa upanka iyo itthwiiyo wiira ntthu hikittottopele nlattu wo itthu ntthu ihikoonilyaawe kipankaka awula ihikiiwilyaawe koolumacaka, 7 masi nlattu wo citthu cootikhiniha cooniheriyaaka.
Wiira kihitepe wiittottopa, ihaavo itthu inkihuviha, iyo inkihuviha khampa mwiiwa uhooheliya mwiirutthuni waka. Iyo itthwiiyo inkhala khampa nlayikha na Sotwani ninkaattakaca wiira kihitepe wiittottopa. 8 Kihaalepela Apwiiya ikwaha cookhala tthaaru wiira iyo itthwiiyo ihiye ukihuviha. 9 Masi ayo yahokiirela co: “Unamaana unoothoonyeraaka uhotosa, ukhala wiira ikuru caka cintepa winciva walolovacaka.” Phimaana ukitteelaka nrima, akinhala uhiyerera wiittottopa nlattu woololovaca waka, kontha kapankaka commo ikuru ca Kristu cinhala ukhala waculu waka khampa heema. 10 Coo, mi unaakicivela ulolovaca, uruwaniya, uthwennya citthu, ulupatthiya ni waanana marikariko, nlattu wa Kristu. Kontha kalolovacaka vale phinkhalanaaka ikuru.
11 Miiva kihokhala nlolo nlattu nyuuva mwaatthi woohikittottopela. Kontha mi kihothoonyera ukhala muulupale nhina wo citthu cotheene, waavikana maapoostolweenyu aneehimya ukhala oolupale, hataa ukhalaka wiira akinakhala itthu. 12 Khweeliini, mi kihowooniherani citthu cinthonyera wiira kikhanle Apostolu; mi kihothoonyera uvilela cinene, kihopanka mathoonyero, kihopanka miiriirya ni kihopanka citthu cootikhiniha. 13 Itthu ipankilyaaka iwiirihileni uvirikana ni maloko makhwaawe, phiila: Miiva khiivo itthu yuulepenlyaakani. Kiireke kihootthekelani nlattu woopanka commo? Wakhala wiira kihootthekelani, paasi kinawuulepelani ukilevelela.
14 Ila ikwaha yoneeraru impheelaaka uwa wuuthotolani, ni kawaaka nwo akinhala wuuryaani nrintti. Kontha khunakhala wiira asaana phinlamuliya uwaaverya mihakhu asithumwanaya, masi asithumwanayaayo phinlamuliya uwaaverya mihakhu asaanaaya. 15 Mi unaahala ukitteela nrima urihakaca citthu cotheene cirinaaka ni hataa ukumyaaka, nlattu wo nyuuva. Ukhala wiira kinawuufentani cinene, kiireke wiira nyuuva khamwaalamuliya ciicammo ukifenta? 16 Masi hataa ukhalaka wiira akuuryeeleni nrintti, nyuuva nneera wiira miiva “kihoothepyani” ni nneera wiira kihoovarihani “muntaphani.” 17 Kiireke miiva kihoonyonkani kaavarelaka nteko atthu yaarumaaka uwa nwo? 18 Mi kihonkhanyereriha Titu uwa wuuthotolani ni kahonruma munna nkhwaawe unveleela. Kiireke wiira Titu waawilyaawe nwo hoonyonkani? Keera miiva ni Titu nimpanka citthu cimocaaru?
19 Ukati wotheene uvinryoolava, mayamunna moopuwela wiira hi ninawiicaakiha iriyariinyu? Ukhala wiira hiivano atthari a Kristu, hi ninooluma ikhweeli uhoolo wa Nluku. Masi mayamunna, nkupali wiira citthu cotheene cimpankeehu nimpanka wiira nuulipiheni. 20 Kontha kinoova wuuphwanyani nnarina makhalelo yahaapheelaaka, ni ciicammo makhalelo nyuuva yahaapheeleenyu; makhalelo toko: Unyakulihana, woonelana nttima, uviruwa cinene, uhiiwanana, wootheryana citthu, waapana, wiicuunuwiha ni ciicammo uhiiwanana. 21 Atthunaka, ikwaha ikhwaawe inhalaaka uwa nwo, Nlukwaaka naahala ukoonihaca ihaaya iriyariinyu. Pooti ukhalaka wiira mi kinaahala uvara matampi ni woohittharuwa. Kinwaaca atthu yaapankile itthu yoohiirya woohittharuwa itthu yoohiloka yaapankilyaaya, toko urupihana woohiloka ni ukhalana makhalelo oohinamaana anoonihera wiira ayo khaanoona ihaaya.