Iwarakha yoopacera yantikheliyaaya akorintu
13 Mi hataa kuulumaka iluuka yaapinaatamu ni yo malayikha, masi kihirina nifento, kinhala ukhala toko ikoma innyakula awula iyuuma inaattanihiya niiyuuma ikhwaaya. 2 Ni hataa ukhalaka wiira mi kinaakhitiri uhimyaca citthu cinhala wiirannya uhoolo, kinaacuwela isiiri cotheene ca Nluku ni ucuwelaca nhina wo citthu cotheene ni kinaakhitiri ucusiha myaako nlattu wo waamini waka, masi kaahikhalaneke nifento, akinakhala itthu. 3 Ni hataa ciicammo ukhalaka wiira miiva kinaavaha maalyaaka otheene wiira kaaphwanyihe atthu itthu yoolya ni hataa kivahaka irutthwaaka wiira kiittitthimihe, masi kaahikhalaneke nifento, khiivo ivanryaaka.
4 Ntthu oofenta naavilela ni haana unamaana. Ntthu oofenta khanunla ihace. Uyo khaneethenca, khaneecunnuwiha, 5 khanveeha, khantotha upanka citthu cinoncivela uyova paasi, khanaakuva urusiya. Ntthu oofenta khaneesa wanrimani citthu coohiloka cimpankiyaawe. 6 Ntthu oofenta cinontteeliha nrima citthu cokhweeli, kahi citthu coohikhweeli. 7 Ntthu oofenta naavilela citthu cotheene, nawaamini citthu cotheene nawaareriha citthu cotheene ni khanoocyeela citthu cotheene.
8 Nifento khanimmala. Masi, ukhitiri uhimyaca citthu coohoolo unaahala umalamalihiya, ucuwela wuuluma iluuka cinci unaahala uvira; ni ucuwelaca citthu cinci unaahala umalamalihiya. 9 Kontha ucuwelaca wihu khumalenle ni citthu cinoolumeehu coohoolo khacimalenle, 10 masi ucuwelaca wihu wahalaka umalela ni ciicammo citthu coohoolo cahalaka umalela, citthu coohimalela cotheene cinaahala umalamalihiya. 11 Ukati waaryaaka mwanhima, mi kooluma, koopuwela ni kaawehera citthunnyo khampa mwanhima, masi nna co wuunuwa waka, kihomalamaliha makhalelo otheene eenamwannyaayo. 12 Kontha mahukwaala khaninoona sana-saana, ninkhala khampa ninoona ispeeliyu yoyuuma, masi wahoolo ninaahala woona co ni co. Mahukwaala kincuwela vakaani, masi wahoolo kinaahala ucuwela sana-saana, khampa miiva kincuweliyaaka sana-saana. 13 Vano, nhihiyerere nnya citthu tthaarunnya: Waamini, nweherero ni nifento, masi yuulupale va, nikhanle nifento.