Ya Arooma
15 Masi hiiva nirina waamini woolipa, naakavihere ale arina waamini woohilipa, ni nihipanke citthu wiira niicivelihe. 2 Khula ntthu apankeke citthu cinoncivela nkhunanawe wiira nilipihane. 3 Kontha Kristu khaapanka itthu wiira eecivelihe mwaneene, toko cantikhiyaaya wiira: “Ale anooruwanani ankiruwana miiva.” 4 Kontha citthu cotheene cantikhiye khalayi, cantikhiye wiira ciniitthucihe, wiira nlattu woovilela wihu ni nlattu wonimaaliho nimphwanyeehu nhina cowantikhiya cowaarya, nikhalane niweherero. 5 Nluku novaha uvilela ni nimaaliho oovaheni ciicammo makhalelo yaarinaawe Yesu Kristu, 6 wiira nkhale owaataana ni nkhalane ncu nimoca wiira munttottopele Nluku paapaawe Pwiiyeehu Yesu Kristu.
7 Phimaana, mwaakhelane toko Kristu ciicammo ciwaakhenlyaaweni, wiira Nluku attottopeliye. 8 Mi kinoohimeeryani wiira Kristu heekhaliha nanteko ayuuta wiira athoonyere ikhweeli ca Nluku ni awoonihere wiira citthu caakhuluvelihilyaawe asinhiya-taataaya cinawiirannya, 9 ni wiira amalaponi anttottopele Nluku nlattu wookhala nakiriri. Toko cantikhiyaaya wiira: “Phimaana mi kinaahala wuucuwela sana-saana iriyari yaamalaponi ni kinaahala uwiipela macipo wiira kittottopele ncinanaa.” 10 Ni Nluku neera ciicammo: “Nkhale ootteeliya, amalaponi wamoca naapoovu a Nluku.” 11 Ni ciicammo: “Ni amalaponi otheene anttottopele Yehova, ni apoovu otheene anttottopele. ” 12 Ni Isaiya hantikha co: “Naahala ukhumelela ntthu mmoca itthoko ya Yesee, wiira aalamulele apoovu omaloko menci, ni uyo ntthuuyo, apoovu aneera anwehereraka.” 13 Nluku novaha niweherero oovaheni utteeliya venci ni nnema nlattu wonkhuluvela, wiira nrimeenyu ucare niweherero nikaviheriyaka niikuru co nnepa wowaarya.
14 Mayamunna, mi kinaakupali wiira nyuuva nhaana nrima wooreera, nhaana ucuwelaca venci, ni wiira nyuuva pooti wanvahaneenyu ikano. 15 Vano, kihowantikhelani woohuukhuwakhuwani nnya citthunnya, wiira muupuwele-tho. Kipankile commo nlattu woonamaana woonironya kivahiyaaka ni Nluku, 16 wiira kikhale nanteko a Kristu Yesu wiira kaalalyeere amalaponi. Kinawiikurumica uvara nteko woolalya ihapari comaana ca Nluku, wiira amalaponi akhale khampa itthuvo cooreerihiya ni nnepa wowaarya.
17 Khweeliini kihaana isariya yowiittottopa mwa Kristu Yesu nlattu wonteko kinonvarelaaka Nluku. 18 Vano akinhala wuuluma-tho itthu ikiina, ihikhanle ile Kristu ipankilyaawe wiira amalaponi amwiiwelele, ni uyo nopanka iyo itthwiiyo avarelaka nteko moolumwaaka ni citthu cinvaraaka, 19 nlattu wo ikuru comathoonyero ni mitikhiniho, ni ikuru co nnepa wowaarya wa Nluku; ukhuma u Yerusalemu mpaka u liiriku kiholalyeera ihapari comaana cimmuuluma Kristu. 20 Ciicammo kaaholakela uhilalyeera mapuro Kristu aacuweliyaawe, wiira kihivare nteko mapuro ntthu nkhwaawe aapacenryaawe uvara; 21 masi toko cantikhiyaaya: “Ale ahinapaca ulalyeeriya anaahala umoona, ni ale ahinapaca wiiwa anaahala uncuweleeha.”
22 Phimaana ikwaha cinci kaahaateelihiya wuuthotolani. 23 Masi vano, kiholalyeera micoko cinci ni kinaapheela cinene uwa wuuthotolani. 24 Phimaana, ukati kinhalaaka uwa u Espanha, kinaapheela uwoonani ni usiveleeliya ni nyuuva nkwahaaka, kinamalihileene unukheliya kirinaaka ni nyuuva. 25 Masi nna co kinrwaa u Yerusalemu wiira kaakavihere atthu ookhuluvelya. 26 Kontha mayamunna otheene o Masetoniya ni o Akaya, ahovaha citthu caya ninrimaaya wotheene apankaka ncanko wiira yaakavihere ale oohuva akhanle ookhuluvelya o Yerusalemu. 27 Ayo mayamunnaayo ahovaha ninrimaaya wotheene, ni khweeliini ayo yancuwela wiira yahaana yapankaka iyo itthwiiyo; kontha wakhala wiira amalaponi anaapanka mphantte wo mihakhu co mminepani ca ayuuta, ayo ciicammo anlamuliya waakavihera ni mihakhu cirinaaya. 28 Vano kamalihaka uvara ula ntekoola ni kicuwelaka wiira ahaakhelela ula ncankoola ni mananna okhikicerya, kinaahala urwaa u Espanha ni kinaahala uvira wiira kawuuthotoleni. 29 Uhiya commo, mi kinaacuwela wiira ukati kinhalaaka uwa wuuthotolani kinaahala uwaana iparakha cinci ca Kristu.
30 Kinawuulepelani mayamunna, nlattu wa Apwiiyeehu Yesu Kristu ni nifento no nnepa wowaarya, wiira mwiikurumice unlompa Nluku wiira akikavihere, 31 wiira koopoliye mmatatani wa atthu o Yuteya ahimmwaamini Kristu ni nteko unvaraaka wo waakavihera mayamunna o Yerusalemu ukupaliye ni atthu ookhuluvelya. 32 Commo, nuutthuna wa Nluku, kinaahala uwa wuuthotolani kitteeliyaka nrima ni wiira nilipihane. 33 Ni wiira Nluku novaha nnema akhale ni nyuuva otheene. Amem.