Yantikheliyaaya Akalasiya
6 Mayamunna, wakhalaka wiira munneehu nawancera upanka itthu yoohiloka, hataa uyo hinaaya ucuwelela, nyuuva nneettiheriya ni nnepa wowaaryava, mmananihe unkavihera uyo munnooyo wiira ahiye upanka iyo itthwiiyo. Masi munkavihere nthoonyeraka unamaana. Ni ratta, wiira ni nyuuva nhipanke itthu yoohinamaana. 2 Nhihiyerere ukaviherana nhina mirintti cirineenyu, mwapankaka commo nnaahala weettela nlamulo na Kristu. 3 Kontha ntthu eecoonaka ukhalana ifayita waapwaha akhunanawe, masi hirina ifayita, uyo ntthuuyo neethepya imwanennyaawe. 4 Masi khula ntthu awehacere citthu cimpankaawe, ni apanka commo, naahala woona citthu cinhala untteeliha nrima mwaaneennyaawe, kahi nlattu wo wiilikaniha ni ntthu nkhwaawe. 5 Kontha khula ntthu nohala uteesa nrinttyaawe.
6 Uhiya commo, ule neetthucihiya nuulumo na Nluku, ammeele ule nomwiitthuciha, ifayita cimphwanyeraawe nuulumo na Nlukunno.
7 Nhiithepye mayamunna: Nluku khanthweelihiya. Kontha khula ntthu itthu inaalaawe, yeeyo phinhalaawe uhepha. 8 Kontha ule naala citthu cimpheelaaya irutthu, nohala uhepha ukwanyulaciya, masi ule naala citthu cimpheelaaya nnepa wowaarya, nohala uhepha ukumi woohimala. 9 Phimaana mayamunna, nihihiyerere upanka itthu yomaana, kontha napanka commo ninaahala uhepha waphiyaka ukatyaaya, naahilolovaceke. 10 Vano, ukati wotheene unkhitiriihu ukavihera, naakavihere atthu otheene, masi venci-venci ale akhanle amuciihu nlattu wo waamini.
11 Moone mananna cuunuwacilyaaya ileetera cantikhilyaaka nintata naka.
12 Ale ampanka citthu wiira yaacivelihe apinaatamu, phimmananiha wuukhanyererihani wuulihiya ni ayo ampanka iyo itthwiiyo wiira asempe ulupatthiya nlattu wo nipotto naakhomeliyaawe Kristu. 13 Kontha hataa ntthu uulihiyaka, iyo khinthoonyera wiira naweettela Nlamulo, masi ayo atthwaayo ampheela wiira nyuuvano muulihiye wiira yiittottope nlattu worutthweenyu. 14 Masi, mi akimpheela wiittottopa mena vakaani, uhikhanle wiittottopa nlattu wo nipotto naakhomeliyaaya Apwiiyeehu Yesu Kristu; mi kinoona wiira nlattu waawaya, ituniya ihokhwa, ni miiva kihokhwa nlattu wo ituniya. 15 Wuulihiya ni uhuulihiya khiivo irina ifayita, itthu yofayita cinene ukhanle ntthuuyo ukhala ikhiyumpi yonaanaano ya Nluku.* 16 Akhale ninnema ni yooneliye uthunku otheene ale aneettela ala malakiherwaala, iyee, yooneliye uthunku Asarayeli a Nluku.
17 Ukhuma ilelo mpaka unrweehu, hikhale ntthu nohala ukirikarikihela makhalelwaaka, kontha mwiirutthuni waka kihaana irotthela* cinthoonyera wiira kikhanle ipottha ya Yesu.
18 Mayamunna, unamaana woonironya wa Apwiiyeehu Yesu Kristu ukhale ni nyuuva nlattu woonamaana unoonihereenyu. Amem.