Yonayeeli ya Akorintu
8 Vano mayamunna, nimpheela wuucuwelihani unamaana woonironya wa Nluku wooniheriyaaya maloko o Masetoniya. 2 Ukati waananaaya mahuviho, ayo yahothoonyera utteeliya nrima ni yahothoonyera ukhala atthu oovaha uhookhalaru wiira ayo yaari atthu oohuva. 3 Kontha, citthu caavahilyaaya yaavahile yattharihaka makhalelwaaya, ni mi kinaavaha usaahiti wiira yahovaha citthu yavikanihaka nnye caarinaaya; 4 ahikhanyererihiyaka nintthu, ayo khayaahiyerera unilepela wiira acanke yapheelaka wiira yaakavihere atthu ookhuluvelyaa. 5 Ni yahopanka iyo itthwiiyo nimananna hiiva yahaaweherereehu, ukhala wiira yaheevaherera waakavihera Apwiiya ni ciicammo unikavihera hiiva, yapheelaka wiira apanke ile inoncivela Nluku. 6 Iyo itthwiiyo, yahoniiriha unkurumica Titu umaliha nteko waapanceryaawe wowaakhela micanko cinyu, ukhala wiira apacenre uyo ntekooyo ukati waaryaawe ni nyuuva. 7 Phimaana mayamunna, khampa nyuuva ciryeenyu mathaciri nhina citthu cotheene, toko: waamini, wuulumaca, ucuwelaca, wiikurumica ni nhina nifento ninoothoonyereehuni, ciicammo nthoonyere ukhalana mihakhu cinci nhina uvaha micanko.
8 Kahi wiira mi kinawaaca wuurumani upanka iyo itthwiiyo, masi kinawaaca wuuhimyeerani wiikurumica urinaaya akhunaninyu ni kimpheela woona wakhala wiira nifento nirineenyu nikhanle nokhweeli. 9 Kontha nyuuva mayamunna nnaacuwela unamaana woonironya unithoonyenryaaya Apwiiyeehu Yesu Kristu: uhookhalaru wiira ayo yaari thaciri, yahokhala ntthu oohuva nlattu wo nyuuva mayamunna, wiira nyuuva nkhalane mihakhu nlattu woohuva waya.
10 Koolumaka uyo mwahooyo kihaana nuulumo: uvaha ncanko unawuuphanyihani ifayita nyuuva, ukhala wiira mweecana kahi paasi nyuuva mwaahopaceriha uvara ula ntekoola, masi ciicammo mwahothoonyera uphela uvara ninrimeenyu wootheene. 11 Vano, mmalihe nteko mwancenreenyu woocankooyo nthoonyeraka uvaha ninrimeenyu wotheene toko ikwaha yaapacerihileehu ucanka. 12 Kontha, Nluku unoncivela venci navahaka ninrimeehu wotheene, ukhala wiira uyo nopheela wiira nivaheke ile hiivano inkhitiriihu uvaha, kahi ihinkhitiriihu. 13 Kontha akimpheela uhaarikarikihela makhalelo atthu akhwaawe masi wuurikarikihelani nyuuva; 14 ula ukatyuula, ukhalana winyu citthu cinci, unawaakavihera ale cinaathwa. Mwapankaka commo, ukhalana waya ayova citthu cinci unawuukaviherani nyuuva cinoothwaani va. Ni ala manannaala, mwaatthiva nnaakaviherana. 15 Toko wantikhiyaaya weeriyaka co: “Ntthu arina menci khaatepile ukhalana menci, ni ntthu arina vakaani, khaatepile ukhalana vakaani.”
16 Ninsukhurweele Nluku, ukhala wiira munneehu Titu nawuuwacerani cinene toko hiiva ninoowacereehuni, 17 kontha uhiya paasi upheela upanka ile nankurumicileehu, uyo imwanennyaawe holakela uwa wuuthotolani. 18 Ninanruma uwa wamoca ni Titu munneehu nottottopeliya mmalokoni motheene nlattu wo ile invaraawe wiira akavihere nteko woolalyeeriya ihapari comaana. 19 Kahi iyo paasi, uyo ciicammo hothanliya ni maloko otheene wiira eette wamoca ni hiiva ukati unvireehu nikawaka nnya micankoonya wiira attottopeliye Apwiiya ni wiira noonihere wiira hiiva ninaapheela waakavihera akhunanihu. 20 Nimpanka commo wiira nisempe wuulumiya pusya nintthu nlattu wo micanko cinwacereehu nnovaheenyu ninrimeenyu wootheene. 21 Kontha ‘hiiva citthu cotheene cimpankeehu nimpanka nimananna ookhuluvelyaa, masi kahi paasi uhoolo wa Yehova masi ciicammo uhoolo waapinaatamu.’
22 Uhiya commo, ninanruma munna nkhwaawe wiira awe nkhayi ni ayo mayamunnaayo, uyo munnooyo nihomoona eekurumicaka uwacera sana-sana citthu cinci; ni nnaco uyo nawoonihera uwacera sana-sana citthu cinvaraawe nlattu wowuukhuluvelani nyuuva mayamunna. 23 Vano, wakhala wiira haavo nohala upheela ucuwela Titu tipani, munhimyeere wiira uyo novara nteko wamoca ni miiva wiira nuukavihereni nyuuva; ni ciicammo wakhala wiira haavo nohala waatikhinaca mayamunna anhala uwa nkhayi nuuyo, munhimyeere wiira ayo arumiye mmalokoni ni ananttitthimiha Kristu. 24 Phimaana, nwoonihere ayo mayamunnaayo wiira nnawaafenta ni moonihere maloko otheene itthu yaaniirihile uwuulumani nyuuva niittottopaka.