Yoopacera ya Tiyaku
4 Cinkhuma vayi ikhotto ni uhiiwanana unoonannya iriyariinyu? Khacinweela nhina citthu cimpheeleenyu comwiirutthuni winyu, nnaananeenyu wanrimani winyu? 2 Nyuuva nnaapheela, masi khanrina. Khannohiyerera wiiva ni wunlela, masi khannophwanya itthu impheeleenyu. Khannohiyerera unyakulihana ni waana ikhotto. Nyuuva khanrina kontha khannolepela. 3 Mwalepeleka, Nyuuva khannovahiya, kontha nnolepela nimoopuwelelo oohinamaana, moopuwelaka citthu nnopheeleenyu mwiirutthuni winyu.
4 Atthu oohikhuluvelya, khannocuwela wiira waatanaca ni ituninya unkhala nwanani a Nluku? Kontha ule naataanaca ni ituninya nawiikhaliha nwanani a Nluku. 5 Awula nyuuva nnoona wiira ukhanle mahala Cowantikhiya Cowaarya uneeraaya: “Nrima nirineehu khunhiyerera ukhalana nttima”? 6 Masi, unamaana woonironya Uyo univahilyaawe ukhanle muulupale. Phimaana, Cowantikhiya Cowaarya cineeraaya: “Nluku khanaapheela atthu owiicoona, masi nawaavaha unamaana woonironya atthu owiiyeviha.”
7 Phimaana, mmwiiwelele Nluku; masi munkhottele Tiyapu, ni uyo naahala wuutthawani. 8 Mmwaattamele Nluku, ni uyo naahala uwaattamelani nyuuva. Nreerihe matateenyu, nyuuva anamatampi, ni nreeriye nrimeenyu, nyuuva nhincuwela itthu yoolakela. 9 Nriipiye nrima, ncukulace ni munle. Uthyaa winyu, ukhale wunla winyu, ni utteeliya winyu nrima ukhale uriipiya winyu nrima. 10 Mwiiyevihe wa miithoni wa Yehova* ni uyo naahala uwunnuwihani.
11 Mayamunna, nhiye uwuuluma pusya akhunaninyu. Ule nomuuluma pusya munna awula nonhukhumu munnaawe, nooluma pusya nlamulo ni nohukhumu nlamulo. Kontha nyuuva mwahukhumuku nlamulo, khanneettela nlamulo masi nnokhala suwiisyaaya. 12 Novaha nlamulo ni suwiisi khanle mmoca paahi, ule nokhitiri woopola ni utankanya. Masi nyuuva mwaapani, wiira munhukhumu nkhunaninyu?
13 Nviriyane, nyuuva nneera: “Ilelo awula meelo ninaahala upanka ikwaha nirwaaka ile isittattiile, unaahala uvira mwaakha mmoca ninari wonwo, ninaahala uvaanela ni ninaahala uphwanya nsurukhu mwinci”, 14 uhookhalaru wiira khannocuwela itthu inhala uwiirannyeelani meelo. Kontha nyuuva nnokhala khampa nihutte noowicisu nihimpica umalamala. 15 Uhiya commo, nyuuva mwaahala wiira: “Yehova atthunaka ninaahala ukhala, ni ninaahala upanka ila awula ile.” 16 Masi itthu ineerannya phiila, nyuuva nnawiicoona nlattu wo citthu cimpheeleenyu, masi nwo wiicoonanwo wotheene ukhanle wootakhala. 17 Vano, wakhala wiira ntthu naakhitiri upanka itthu yomaana masi uhookhalaru commo uyo phihipankaka, uyo naavara itampi.