Ya Arooma
8 Phimaana, ale ammwaataanana Yesu Kristu khanhala uhukhumwiya. 2 Kontha, nlamulo no nnepa ninvaha ukumi ni Kristu Yesu nihowoopolani munlamuloni no itampi ni nonookhwa. 3 Itthu nlamulo nahaakhitiryaaya upanka ukhala wiira naari noololovaca nlattu wo irutthu, Nluku hopanka anrumaka mwanawe ni irutthu yoolikanaca ni pinaatamu omatampi, ahukhumuku itampi yomwiirutthuni, 4 wiira citthu cosariya cinhimyaaya nlamulo ciniirannyeele, ukhala wiira hiiva khanineettela citthu comwiirutthuni masi nineettela citthu comminepani. 5 Kontha ale ankhala yeettelaka citthu comwiirutthuni anweheeha citthu comwiirutthuni; masi ale ankhala aweheehaka citthu comminepani, anweheeha citthu comminepani 6 Kontha uweheeha citthu comwiirutthuni cinoorwaana wuukhwani, masi uweheeha citthu comminepani unaanivaha ukumi ni nnema. 7 Kontha uweheeha citthu comwiirutthuni unkhala umwiinanana Nluku, ukhala wiira irutthu khineewelela nlamulo na Nluku; khweeliini, khinkhitiri wiiwelela. 8 Phimaana, ale aneetta aweheehaka citthu comwiirutthuni khankhitiri untteeliha nrima Nluku.
9 Vano, wakhalaka wiira nnepa wa Nluku khweeliini uri ni nyuuva, khanneetta nweheehaka citthu comwiirutthuni, masi citthu comminepani. Masi wakhalaka wiira ntthu kharina nnepa wa Kristu, uyo ntthuuyo khari wamoca ni Kristu. 10 Masi wakhala wiira Kristu ri nkhayi ni nyuuva irutthwiinyu ihokhwa nlattu wo matampi, masi nnepa ukhanle ukumi nlattu wosariya. 11 Phimaana wakhala wiira nnepa wa ule munwelelihile Yesu Kristu uri ni nyuuva, ule munwelelihile Kristu Yesu ciicammo naahala wuuvahani ukumi nyuuva avarelaka nteko nnepaawe uri ni ninyuuva.
12 Phimaana mayamunna, khaninkhanyererihiya weettela citthu comwiirutthuni, awula ukhala niweheehaka nnyo citthunnyo; 13 Kontha mweettelaka citthu comwiirutthuni nnaahala ukhwa; masi mwahiyaka weettela nnyo citthunnyo nnaahala ukhala akumi. 14 Kontha otheene ale aneettihiya ni nnepa wa Nluku, khweeliini akhanle asaana a Nluku. 15 Kontha nyuuva khamwaakhenle nnepa wowuuhuvihani wiira nkhalane-tho woova, masi mwaakhenle nnepa wiira nkhale a saana a Nluku ni nlattu wo uyo nnepooyo phinlepeleehu niiraka: “Aba, Paapa!” 16 Nnepa wa Nluku unaavaha usaahiti wiira khweeliini hiiva nikhanle asaana a Nluku. 17 Vano, wakhala wiira hiiva asaana a Nluku ciicammo ninawaakhela itthu nonivahaawe Nluku ni ninawaakhela itthu Nluku invahilyaawe Kristu, masi nihaana uhuva nkhayi ni uyo, wiira ciicammo nittitthimihiye nkhayi ni uyo.
18 Phimaana, citthu cinnihuviha nna co khacinakhala itthu nalattanihaka ni citthu cuulupale Nluku nohalaawe univaha wahoolo. 19 . kontha cowumpiya cinaaweherera nihuku ninhalaaya wooniheriya asaana a Nluku. 20 Kontha cowumpiya cihokhalihiya coohifayita, kahi nlattu wootthuna waya masi nlattu wootthuna wa ule khalihile coohifayita avahaka niweherero, 21 wiira cennyo cowumpiyannyo khacinhala ukhala-tho ipottha co matampi ni ukhwa ni cinaahala ukhalana utaphuwa woottitthima wa asaana a Nluku. 22 Kontha ninaacuwela wiira cowumpiya cotheene khacinhiyerera wiipulela ni woona uwerya mpaka nna. 23 Kahi iyo paasi, masi hiiva ciicammo, nikhanle itthuvo yoopacera, ukhanle nnepa, iyee, hiiva ninawiipulela wanrimani wihu ukati unweherereehu ukhalihiya asaana a Nluku, wiira nitaphuliye mwiirutthuni wihu nlattu wo ukhwa Yesu Kristu. 24 Kontha nihoopoliya wo nna niwehereronna; masi niweherero ninoonnya khaninakhala niweherero, kontha manannani ntthu nohalaawe uweherera itthu inoonaawe? 25 Masi nawehereraka itthu ihinooneehu khaninhiya uweherera nivilelaka.
26 Woolikanaca, nnepa ciicammo unaanikavihera nhina citthu cinniloloviha; kontha itafaawuti nirineehu ikwaha ikhwaawe khanincuwela itthu yoolepela ukati woolompa, masi nnepa wowaarya unaanikavihera ukati ninkhaleehu niipulelaka nihicuwelaka itthu yowuuluma. 27 Masi ule nowehaweha mirima naacuwela itthu impheelaaya nnepa, kontha uyo unawaakavihera atthu anonswalela Nluku apankaka itthu impheelaawe.
28 Hiiva ninaacuwela wiira Nluku nawiiriha citthu cowumpiya cotheene uvara nteko nkhayi wiira aphwanyere ifayita ale anonfenta, ale aneehaniya wiira yeerannyeehe itthu impheelaawe. 29 Ale yaapacenryaawe waavaha ifayita, yaayo ciicammo haalakelela wiira akhale toko mwanawe wiira akhale mwaana oopaceriya iriyari ya asunnawe. 30 Ale aalakelenlyaawe, ciicammo howiihana; ni ale wiihannyaawe, haahimya ukhala anasariya. Wiimaleloni ale yaahimilyaawe ukhala anasariya ciicammo haattitthimiha.
31 Vano ninhala wuulumani-tho, nhina nnyo citthunnyo? Wakhala wiira Nluku ri ni hiiva tipani nohala unirukunuwela? 32 Ukhala wiira uyo khoovelenle unvaha mwanawe, masi honvaherera nlattu wawihu, niireke wiira nkhayi nuuyo, khanhala univaha ciicammo nuunamaana citthu cikhwaawe cotheene? 33 Tipani nohala uwootherya ale athanliye ni Nluku? Nluku phaahimile ukhala anasariya. 34 Tipani nohala waahukhumu? Kristu Yesu thi ule khwile ni onwelelihiye, ule onkomile moono wonlopwana wa Nluku ni ciicammo nonikavihera.
35 Tipani nohala unimwalaniha ni nifento na Kristu? Niireke masakha, awula usanka, awula ulupatthiya, awula itala, awula uhikhalana itthu yoowara, awula yowoopiha, awula ikatana? 36 Toko cantikhiyaaya: “Nlattu wawaa, ninawiiviya khula ukati; ninoonihiya toko ikhontwaa cinrwaaniya wuuhitiyani.” 37 Uhiya commo, ninaakhitiri utthema citthu cotheene nlattu wo ule nifentile. 38 Kontha, miiva kinaakupali wiira hataa ukhwa, hataa ukumi, hataa malayikha, hataa ikuvernu, hataa citthu cirivo, hataa citthu cinhala uwa, hataa ikuru, 39 hataa irekamelo, hataa wiisa, hataa itthu ikhwaawe yowumpiya inhala unimwalaniha ni nifento nihu ni Nluku, niri ni Kristu Yesu, Apwiiyeehu.