Iwarakha yoopacera yantikheliyaaya akorintu
11 Nkitakihe khampa miiva kinontakihaaka Kristu.
2 Kinawuuttottopelani kontha nnaakuupuwela miiva nhina citthu cotheene ni nnaavarela nteko iyaawaano* kuuvahilyaakani. 3 Masi kimpheela ncuwele wiira nhooleli anlopwana khanle Kristu, nhooleli anthiyana khanle nlopwana; ni nhooleli a Kristu khanle Nluku. 4 Nlopwana nolompa awula nuuluma myaha ca Nluku nakhunenle murwaawe, nomuulihihaca muru nhoolelyaawe. 5 Masi nthiyana nolompa awula nuuluma myaha ca Nluku woohikhuneela murwaawe, nomuulihihaca muru nhoolelyaawe, kontha unkhala khampa uyo nthiyanooyo metthile mputu. 6 Kontha nthiyana aahikhuneeleke murwaawe, haana umettha mputu; masi wakhala wiira unaamoonihaca ihaaya umettha mputu, uyo haana ukhuneela murwaawe.
7 Phimaana, nlopwana khanlamuliya ukhuneela murwaawe, kontha Nluku mumpile eelattanihaka uyoova ni naathoonyera uttitthima urinaawe Nluku, masi nthiyana nothoonyera uttitthima urinaawe nlopwana. 8 Kontha nlopwana khumpiye ivareliyaka nteko irutthu yanthiyana, masi nthiyana phumpiye ivareliyaka nteko irutthu yanlopwana. 9 Ni uhiya commo, nlopwana khumpiye nlattu wonthiyana, masi nthiyana phumpiye nlattu wonlopwana. 10 Phimaana, nlattu wo iyo itthwiiyo ni nlattu wo malayikha, athiyana ahaana yakhuneelaka murwaaya wiira athoonyere wiiwelela waya.
11 Masi, wanlokoni Naapwiiya athiyana anaapheela ukaviheriya naalopwana ni alopwana anaapheela ukaviheriya naathiyana. 12 Kontha khampa nthiyana ompiyaawe ivareliyaka nteko irutthu yanlopwana, nlopwana ciicammo noyariya ninthiyana; masi citthu cotheene cumpiye ni Nluku. 13 Muupuwele ila itthwiila: Niireke unaareera nthiyana unlompa Nluku hikhunenle murwaawe? 14 Keera nnawoona wiira inanna cumpiyaaya apinaatamu, nlopwana unnuwihacaka ikharari niiculihaca muru mwaneennyaawe? 15 Masi nthiyana unnuwihacaka ikharari iyo itthwiiyo inaamwiiriha uttottopeliya. Kontha nthiyana hovahiya ikharari, uyo khumpiye wiira attiyelele murwaawe. 16 Vano, wakhala wiira haavo novaanyiha ila ilemeela, hiiva khanirina ikhwaawe ni hataa maloko a Nluku.
17 Masi wowuuvahani nnya ikanonnya miiva akinoottottopelani, kontha mmamikutthaanoni winyu khannothukumana wiira mphwanyere ifayita, masi wiiwiihera masakha. 18 Kontha, yoopacera, kiheewa weeriyaka wiira mwathukumanaka wiira mpanke mikutthaano cowanlokoni, khanneewanana; ni mi kinaakupali iyo itthwiiyo. 19 Kontha khweeliini iriyariinyu cinaahala ukhumelela ittiini cikhwaawe* wiira acuwannyee phaapani athanliye ni Nluku.
20 Mwathukumanaka vale, nyuuva khannothukumana wiira nlye iyoolya yoohiyu ya Pwiiya. 21 Kontha, ukati unthukumaneenyu wiira nlye iyo iyoolyeeyo, nyuuva nnopaceraka ulya iyoolyeenyu, phimaana akhwaawe ankhalaka oovoliyeene, masi akhwaawe ankhalaka oohapaliya. 22 Kiireke nyuuva khanrina inupa wiira nlye ni nwurye wonwo? Awula nnawaaca uhittitthimiha nloko na Nluku ni uwoonihaca ihaaya ale ahirina itthu? Isiyani inlamuliyaaka wuuhimyerani? Kiireke kihaana wuuttottopelani? Mi akinhala wuuttottopelani hataa vakaani nlattu wo nnyo citthunyo.
23 Kontha itthu yoohimenryaakani kihimeeriye Naapwiiya: Wiira uhiyu waya nihuku naavariihiyaaya Apwiiya Yesu, ayo yahokusa iphaawu imoca, 24 ni umaliha waya ulompa, ayo yahomyaaniha iphaawiiyo ni yaheera: “Ila inthoonyera irutthwaaka, inhala wuuphwanyihani ifayita. Nhihiyerere upanka ila itthwiila nkuupuwelelaka.” 25 Ayo yahopanka itthu imocaaru niikoopu yoviinyu, umaliha waya ulya, yaheera: “Ila iviinywiila inthoonyera iphomyaaka yonleehano nonaanaano inhala umwarusiya wiira yuuphwanyiheni ifayita. Nhihiyerere upanka ila nkuupuwelelaka.” 26 Kontha, khula ukati nnohaleenyu ukhuura iyo iphaawiiyo ni uwurya iyo iviinywiiyo, nnohala ukhala nlalyaaka ukhwa wa Apwiiya, ni mpanke iyo itthwiiyo mpaka anhalaaya uwa.
27 Phimaana, ule nokhuura iphaawu ni nowurya iviinyu ihimphwanelaka upanka iyo itthwiiyo, naattheka nlattu wo irutthu ni iphome yaapwiiya. 28 Vano, ntthuuyo wiira akhuure iphaawu ni awurye iviinyu, haana apaceraka wiiwehacera mwaneennyaawe. 29 Kontha ule nokhuura iphaawu ni nowurya iviinyu woohiiwehacera mwaneennyaawe, naahala uhokhumwiya. 30 Phimaana, atthu enci iriyariinyu anaaweryaaciya ni ari owoocyaaca, ni enci akhwaawyaayo ahokhwa. 31 Masi, wakhalaka wiira ninawiiwehacera mwaaneeneehu, khaninhala uhukhumwiya. 32 Masi, hiiva nahukhumwiyaka, ninttarusiya ni Yehova, wiira nihikwanyulaciye nkhayi naatthu ontuniyani. 33 Phimaana mayamunna, ukati unthukumaneenyu wiira nlye iyoolya yoohiyu ya Apwiiya, nwehererane. 34 Wakhala wiira haavo ntthu involale itala, apacere ulya uwannyawe, wiira ukati unhaleenyu uthukumana, ntthuuyo hinhala ulya ahalaka uttarusiya.