Yantikheliyaaya a Efesu
1 Miiva Paulu kikhanle apostolu a Kristu Yesu nuutthuna wa Nluku, kinwantikhela ila iwarakheela mayamunna o Efesu akhanle ookhuluvelyaa ni ammwaataanana Kristu Yesu:
2 Nkhalane unamaana woonironya ni nnema ninvahaawe Nluku, akhanle Apaapeehu, ni ninvahaaya Apwiiyeehu Yesu Kristu.
3 Attottopeliye Nluku, akhanle Athumwanaya Apwiiyeehu Yesu Kristu. Kontha honivaha iparakha cotheene cinkhuma wiirimu, avarelaka nteko nnepaawe wowaarya, nlattu hiiva wookhala atthari a Kristu. 4 Ni kontha honithanla wiira naataane ni Kristu, ila ituniyeela ihinaaya wumpiya, wiira nikhale owaarya ni oohimatampi uhoolo wawe nlattu wo nifento nawe. 5 Ciicammo, kontha uyo mwaneennyaawe honithanla wiira nikhale asaanaawe nlattu wa Yesu Kristu, khampa cincivenlyaaya ni cimpheelaawe, 6 wiira attitthimihiye nlattu woonamaana woonironya unithoonyenryaawe, anvarelaka nteko mwanawe nonfentaawe. 7 Nlattu wo iphomyaawe hiiva nihoopoliya ni nihophwanya utaphuwa, niholeveleliya itampi cihu, nlattu woonamaanaawe woonironya.
8 Uyo honithoonyera venci cinene unamaanaawe woonironya, anivahaka ucuwelaca ni ankhili 9 nuutthuna wawe, unicuweliha wawe isiiryaawe yowaarya. Iyo invaranaca niitthu inoncivela ni ilakenlyaawe, 10 wiira waphiyaka ukati uyova uthanlilyaawe, naahala waavererya mananna oolokihera citthu cawe. Nohala upanka iyo itthwiiyo, anvahaceraka citthu cotheene Kristu, citthu ciri wiirimu ni ciri vathi. Iyee, ule, 11 Nluku niirihilyaawe umwaataanana ni nithanlilyaawe wiira naakhele itthuvo wamoca nuuyova, khampa cilakenlyaawe wiiraneeha citthu cotheene ni mananna ampheelaawe ni anoncivela, 12 wiira ninttottopele hiiva nipacenre umwanriiha Kristu va nlattu woottitthima wawe. 13 Nyuuva ciicammo nhomwanriiha Kristu, ukati mwiiwileenyu moolumo eekhweeli ni ihapari comaana cooluma woopoliya winyu. Umwaamini winyu Kristu, Nluku hoothanlani ninnepaawe wowaarya. 14 Uyo nnepa wowaaryooyo unaathoonyera wiira hiiva ninaahala waakhela citthu cinikhuluvelihalyaawe Nluku. Pankile iyo itthwiiyo, wiira anoopole hiiva nikhanle apoovwaawe, ni iyo itthwiiyo inaahala umwiiriha uyova uttottopeliya.
15 Phimaana, miiva ciicammo ikhumelo kiiwilyaaka mananna cinthoonyereenyu waafenta Apwiiya Yesu ni mananna cinaafenteenyu mayamunna ookhuluvelyaa, 16 akinhiyerera unsukhuru Nluku nlattu waawinyu. Mi akinhiya wuuromolani ukati unlompaaka. 17 Wiira Nluku a Pwiiyeehu Yesu Kristu, khanle Paapeehu owaarya, oovaheni ikuru wiira nkhitiri ukhala atthu oocuwelaca ni wiiweeha sana-saana citthu cinhimyaawe, ni ala manannaala wiira nyuuva muncuwele sana-saana. 18 Nluku hotthukula mirima cinyu, wiira ncuwele ni moone nweherero uyo wuuvahilyaaweni ni ciicammo citthu comaana cikhuluvelihilyaawe waavaha atthu ookhuluvelya. 19 Wiira ncuwele mananna cincivilyaaya ikuru cawe cinithoonyenryaawe hiiva nimmwaaminiva. Nnyo ikuru cawe cincinnyo cithoonyeriye ni citthu cipankilyaawe. 20 Uyo hoonihera nnyo ikurunnyo amunwelelihaka Kristu ni amweesaka moonnwaawe wonlopwana wiirimu. 21 Uyo homweesa waculu wo ikuvernu cotheene, ukhulupale wotheene, ikuru cotheene, ulamulela ni macina otheene, kahi paasi ila ituniyeela masi ciicammo ituniya inhala uwa. 22 Ciicammo, honvahacera citthu cotheene ciri vathi inyaa cawe ni honkhaliha nhooleli o citthu cotheene co wanlokoni. 23 Nno nlokonno nikhanle irutthwaawe ni uyo naavaha yotheene impheelaaya.