Yoopacera ya Tiyaku
5 Athaciri nviriyane! Mwiicunlele ni mwiicoonele uthunku nlattu wo ihasara inhala wuuphwanyani. 2 Mihakhu cihu cihontta ni ikuwo cinyu cihokhuuriya naasimunku. 3 Iwoorwiinyu ni iparaateenyu ihonyeela nrenci, ni nrencyaaya unaahala wuuhimyani ni unaahala ukhura irutthwiinyu. Mihakhu nyuuva cithukumanihileenyu cinhala ukhala khampa mooro mahuku ookhicera. 4 Moone! Nsurukhu nhiileenyu waaliva ananteko yaahepha mmamattani winyu unlepela isontte, ni nnyo isonttennyo caatthu yaathukumaniha icoolya caahephiya, Yehova nhooleli aanatoropa heewa. 5 Nyuuva mwampuha ni mwahaana citthu cotheene caapheeleenyu. Mirima cinyu cinkhala khampa inama cinlya wiira cineneve mpaka nihuku ninhalaaya uhitiya. 6 Nyuuva nhonhukhumu ni nhomwiiva nasariya. Nluku khacinoncivela citthu cimpankeenyu.
7 Phimaana mayamunna, nthoonyere uvilela mpaka wanhalaaya uwa Apwiiya. Namalima, naaweherera mihokorokho commattani wawe ni noweherera ooniheraka uvilela, mpaka cinwaaya ipula coopacera ni ipula coomalela. 8 Inanna imocaaru, nyuuva nhaana nthoonyiheraka uvilela nlipihaka nrimeenyu, kontha nihuku na Apwiiya nihaattamela.
9 Mayamunna, nhittekuttane wiira nhihukhumwiye. Moone! Suwiisi ri wankhora. 10 Mayamunna, nuulumaka uhuvihiya ni uvilela, mwaatakihe maporofeeta, yuulumile mwancina na Yehova. 11 Moone, ninwoona ukhala ootteeliya* ale yaathoonyenre uvilela khalayi. Nyuuva nheewa wuulumiyaka uvilela waathoonyenryaawe Jó ni nhoona mananna Yehova wantthuvenlyaawe; nhoona wiira Yehova umwinciva uthunku ni ikiriri.
12 Mayamunna, nhiye ulupela nromolaka irimu awula itthaya, ni nhilupelele hataa itthu. Masi mweeraka “iye” akhaleke iye, ni mweeraka “mena”, akhaleke mena, wiira nyuuva nhihukhumwiye.
13 Haavo nohuva iriyariinyu? Uyo hihiyerere ulompa. Haavo untteenle nrima? Uyo eepe isaalimu. 14 Haavo nowerennya iriyariinyu?* Uyo awiihane mahumu owanlokoni, wiira anlompele yamwiitthelaka makhura mwancina na Yehova. 15 Ni ulompa umpankiya nuwaamini, unaahala unkavihera ukhala saana, ni Yehova* naahala unvoniha. Ni ciicammo wakhalaka wiira hovara matampi naahala uleveleliya.
16 Phimaana, nhimeryane itampi cinyu woohikhuwakhuwa ni nlompelane, wiira nvonihiye. Ulompa umpankaawe ntthu osariya uhaana ikuru.* 17 Eliyasi aari nlopwana aarina makhalelo toko hiiva nirineehu; uhookhalaru commo, ukati waalompilyaawe venci wiira ihirupe ipula, khayaarupile ipula ile ilapweele mpaka waavinryaaya myaakha miraru ni mweeri 6. 18 Vano, uyo aholompa-tho ni yahorupa ipula, ni caheema mihokorokho.
19 Mayamunna ntthu ahapusiyaka iriyariinyu ni ahiyaka weettela ikhweeli, ni ntthu nkhwaawe ankaviheraka uturuwa, 20 ncuwele wiira ule nomwiiriha namatampi uturuwela iphiro yomaana, naamoopola* wiira hikhwe ni naahala uttiyelelaca itampi cinci.