Yonayeeli ya Akorintu
4 Ukhala wiira nihovahaceriya ula ntekoola nlattu woonamaana wa Nluku, nihihiyerere uvara. 2 Masi, nihimyace citthu cotheene cinoolihaca muru, citthu cinvithiya, nihoothe nimeettelweehu ni ciicammo nihaakakhanihe nuulumo na Nluku. Masi ninhimyaca ikhweeli ca Nluku ni nipanke iyo itthwiiyo, wiira niwoonihere apinaatamu ikhweeli cotheene ca Nluku. 3 Wakhala wiira khweeliini ihapari comaana cinlalyeereehu cihoovithiya,* avitheliye atthu anhala ukwanyulaciya. 4 Ale nluku o ila ituniyeela aatthukilyaawe moopuwelelwaaya, wiira ahoone waarya wo iluusu urinaaya ihapari comaana ca Yesu Kristu, ule nonithoonyera makhalelo a Nluku. 5 Kontha khaninlalyeera niicaacaka hiiva, masi ninlalyeera myaha ca Apwiiya Yesu Kristu, ni ninlalyeera nicaacaka hiiva, wiira nikhanle ipottha cinyu nlattu wa Yesu. 6 Kontha Nluku phinre co: “Nipuro no ipiphi ipharele iluusu,” ni iyo iluswiiyo ineera ipharelaka wanrimani wihu, wiira Nlattu wa Kristu, mirima cihu cimwaleeliye nuuttitthima urinaaya waarya wa Yesu.
7 Masi, hi nihaana ula nhakhuula mmwaapuni, wiira ikuru impwaha ikuru ya ntthu, ikhale ya Nluku kahi yaawihu. 8 Khula mphantte anaaniphwanya masakha, masi ayo masakhaayo khankhitiri uniphunyereriha mpaka wahinkhitiriihu wiinyeenya. Ninkhala khampa nihootthukeliya, masi kahi wahinkhitiriihu uvara itthu. 9 Ninaalupatthiyaka, masi khaninnyanyaliyaka; ninaamoruseliyaka vathi, masi khanimmalamalihiyaka. 10 Khula ukati hi ninaahuvihiyaka venci khampa Yesu caahuvihiyaawe, wiira ukumyaawe ukhale ni hiivano. 11 Kontha hiiva niri akumiva, ukati wotheene ninawaanana ukhwa nlattu wa Yesu, wiira ukumi wa Yesu ukhale mwiirutthuni wihu inkhwa. 12 Hiiva ninawaanana ukhwa, masi nyuuva mwaatthiva nnohala uphwanya ukumi.
13 Vano, ukhala wiira otheene cihu ninawaamini moolumo yantikhiye aneera co: “Kinawaamini, phimaana kinoolumaaka,” hiiva ciicammo ninawaamini phimaana ninoolumeehu, 14 nicuwelaka wiira ule munwelelihile Yesu, ni hiiva ciicammo naahala unummweleliha ni naahala unirwaana nipuro niryaawe Yesu, wiira hiiva nakhale nuuyova. 15 Citthu cotheene nnyo cimpankiya nlattu waawinyu, wiira unamaana woonironya utepe winciva, ukhala wiira atthu enci anansukhurweelaka Nluku wiira anttottopele uyova.
16 Phimaana, hiiva khaninoocyeela; uhookhalaru wiira irutthweehu ineera imalamalaka,* khweeliini hi ninaakupaleela wiira nrimeehu uneera ukhalihiyaka wonaanaano khula nihuku. 17 Kontha, hataa ukhalaka wiira mahuviho anaananeehu anaahala uvira ni khaanakhala moolupale, ayo mahuvihwaayo anaaniriha hiiva uttitthimihiya cinene, uttitthimihiya uhinhala umala, 18 nihitepaka wuupuwela citthu cinoonnya masi citthu cihinoonnya, kontha citthu cinoonnya cinaahala uvira, masi citthu cihinoonnya cinaahala ukhala mpaka.