Yantikheliyaaya a Efesu
4 Phimaana, miiva Paulu kitthukiye nlattu wa Apwiiya, kinawuulepelani wiira nkhalane makhalelo omaana khampa ale nyuuva yiihaneliyeenyu, 2 nthoonyeraka wiiyeviha, upisa nrima ni uvilela. Nhaana nvilelanaka ni nifento. 3 Mwiikurumice wiira uhimale waataana urineenyu unookaviheraayani nnepa wowaarya ukhalana, nhihiyereraka ukhalana nnema naakhwiinyu. 4 Iri irutthu imoca paasi ni nnepa wowaarya mmoca, khampa nweherero mwiihaneliyeenyu ukhanlyaaya mmoca paasi. 5 Ri Pwiiya mmoca paahi ni ninaamini citthu cimocaaru cimmuuluma uyova, urivo mpattiso mmoca paasi; 6 ri Nluku mmoca paasi ni athumwanaya atthu otheene, uyo phikhanle nkhulupale waavikana atthu otheene, naaniiriha upanka citthu cimpheelaawe ni niikuru cawe nakhitiri upanka citthu cotheene.
7 Otheene cihu nihaakhela unamaana woonironya wa Nluku, ni Kristu phinivahile iyo iparakheeyo. 8 Kontha cowantikhiya cowaarya cineera co: “Waawelaawe uculu, ahaakusa atthu ootthukiya, ni ayo atthwaayo haavaha wiira akhale itthuvo ceepinaatamu.” 9 Vano weeriyaka “waawelaawe uculu” maanaaya isiyani? Maanaaya wiira hopaca ukhuruwela vathi awula va watuniyani va. 10 Yoole aakhuruwilyoole, ciicammo howela upwaha irimu* cotheene, wiira amalihere upanka citthu cotheene.
11 Ni uyo haavaha akinaayo wiira akhale maapoostolu, maporofeeta, anamalalyeera ni akhwaawyaayo aavahile wiira awacere maloko,* ni akinakwaayo wiira akhale eetthucihi. 12 Wiira yaakavihere atthu ookhuluvelya urukunusa makhalelwaaya, wiira arweehele uhoolo nteko woolalyeera, wiira alipihace nloko ninkhala toko irutthu ya Kristu, 13 mpaka waamini wihu unhalaaya ukhala mmocaaru ni wanhaleehu uncuweleeha sana-saana mwaana a Nluku, ni mpaka hiiva ninhaleehu ukhala ookhomaala* wanomphiyeereehu Kristu nhina wo citthu cotheene. 14 Ni nihikhale toko anamwaane, anvonyeriya uno-nuuno toko mawimpi ni anvonyeriya uno-nuuno ni khula inanna yo meetthucihero, ni ciicammo uwalaalaca nuulavilavi waapinaatamu. 15 Ninifento ni nuulumakoono ikhweeli, nuunuwe nhina citthu cottheene, mpaka wankhitiriihu untakiha ratta nhooleli onloko na Nluku, Kristu. 16 Nlattu waawawe, irutthu yottheene inawaataana ni miphantte cotheene comwiirutthuni cinaakaviherana wiira cipanke itthu irutthu impheelaaya. Wakhalaka wiira khula mphantte wo mwiirutthuni unaavara ntekwaaya ni mananna omaana, iyo itthwiiyo inaakavihera irutthu wuunuwa wiira itepe woonihera ufenta.
17 Phimaana, mwancina Naapwiiya, kinawuuhimyeerani ni kinawuusovenrihani* wiira nhikhalane makhalelo toko arinaaya amalaponi, kontha ayo antthara moopuwelelwaaya oohiloka. 18 Nlattu woohanyuriha ni woolipiha nrimaaya, ayo ahoripeleliya mmopuweleloni waya ni anaavirikaniha ile impheelaawe Nluku. 19 Ayo khancuwela-tho itthu ikhanle yomaana ni itthu ikhanle yoohinamaana, ni ukati wootheene ampanka citthu coohinamaana ni khantosiya upanka nnyo citthunnyo.
20 Masi nyuuva nheetthuca wiira Kristu kahi phiryaawe ciicammo, 21 khweeliini, Yesu heetthuciha ikhweeli, vano wakhala wiira nyuuva nhomwiiwelela ni nheetthucihiya ni uyova, nnaacuwela sana-saana nnya citthunnya. 22 Nyuuva nheetthucihiya wiira nhiye meettelweenyu otheene okhalayi oohinamaana, kontha uhoonannya wiira ayo meettelwaayo akhanle oohinamaana, ukhala wiira yahoothepyaani nlattu wo citthu caapheeleenyu. 23 Nhihiyerere urukunusa moopuwelelweenyu, 24 ni mweettele makhalelo onaanaano, apankiye ciweheriyaka citthu cimpheelaawe Nluku, toko isariya yeekhweeli ni ukhuluvelya.
25 Phimaana, ukhala wiira nhohiya wootha, nhimyerane ikhweeli atthu otheene, ukhala wiira otheene cihu nikhanle irutthu imoca. 26 Pooti uviruwa, masi nhittheke, nhihiyerere ncuwa nakelaka nnaviruwileene; 27 nhinhiyere ikhato Tiyapu. 28 Ule nennya hinnye-tho, uhiya commo, eekurumice uvara nteko nimatataawe wiira ile inhalaawe ukhitiri uphwanya ammeele ule hirina. 29 Nhuulume nanka nuulumo nimoca nooveeha, masi muulume moolumo oolipiha, wiira ale aneewa aphwanyere ifayita. 30 Ni nhinriipihe nrima Nluku,* oothanlileni wiira mwaakhele utaphuwa nlattu wookhwa wa Yesu.
31 Nhiye inanna cotheene conrukwa, uviruwa, unyoonyiya, upwapwa ni moolumo oohinamaana wamoca ni citthu cotheene coohinamaana. 32 Masi nthoonyerane unamaana otheene winyu, nvilelane, nlevelelane otheene winyu, toko Nluku oolevelenlyaaweni anvarelaka nteko Kristu.