Miteko co Mapostolu
20 Uvukuwa waya unyakulihaniyanwo, Paulu ahowiihana atthari ni ahaalipiha, ni waaleeha wawe ahokhuma arwaaka u Masetoniya. 2 Uyo aheetta nnye micokonnye ni aahimeryaka atthari moolumo menci oolipiha. Vano ahophiya u Keresia. 3 Uyo, ahokhala nwo myeeri miraru, masi ukhala wiira ayuuta yaaholeehana umwiiva ukati waahalaawe ukela nkalawani arwaaka u Siiriya, uyo ahoopuwela uturuwa aviraka u Masetoniya. 4 Uyo aaveleeliye ni Sopari mwaana a Piiro o Pereya, Aristarku ni Sekuntu o Tesalonika, Kaayu o Terpe, Timotiyu o porovinsiya yo Asiya, Tiikiku ni Tiroofimu. 5 Ayo alopwanaayo yahohoolela ni yahonanriiha u Trowate. 6 Nahowela ikalawa u Filipu, uvira waya mahuku ophaawu coohiheliya ifermentu, ni uvira waya mahuku 5, nahaaphwanya u Trowate ni nwo nahoviriha mahuku 7.
7 Nihuku noopacera nosumana, ninathukumanne wiira nilye, Paulu ahopacera uwuulumana atthu yaarivo, ukhala wiira anhala ukhuma wasaaka, Paulu ahotaphulela mwaha mpaka uhiyu iriyari. 8 Phimaana, caahaavo ilampata cinci isaala yooculu, nipuro naathukumanneehu. 9 Mmirawo mmoca eehaniya Ewuutiku onkomile wakhiviru niicanela, ahorupa ukati Paulu woolumaawe, ni nlattu woomooceeha ikhovennyo ahomora antaare oneeraru. Urwennya waya wiira ooniye, aaphwanyiye nakhwile. 10 Masi Paulu ahokhuruwa, ahonrupela waculu, ahonkapatta ni aheera: “Nhisanke, kontha ula nanlelo nkumi!” 11 Vano, Paulu ahoturuwela uculu, ahomyaaniha iphaawu ni ahokhuura. Khaahiyerenre uwoopana mwaha atthwaayo mpaka usa ni usa waya uyo ahorwaa. 12 Yahoncisa mmirawooyo nari nkumi ni unaatteenle nrima.
13 Nahohoolela mpaka nipuro naaryaawe naviiyu, ni naahorwaa u Asu, naarweehu umwaakhelela Paulu ninaviiyu toko caanihimenryaawe, kontha uyo aarweele mwentto. 14 Vano, uniphwanya wawe u Asu, hi naahomwaakhelela nnaviiyuni ni nahorwaa u Mitileni. 15 Waaseele, nahowela ikalawa nahorwaa mpaka waattamela isiri co Kiyo, nihuku nonayeeli naahophiya u Saamu ni nihuku noneeraru naahophiya u Miletu. 16 Paulu aholakela uheemela u Efesu wiira hirihakace ukatyaawe iporovinsiya yo Asiya, kontha uyo anaakuvyaaca wiira aphiye u Yerusalemu wiira wakhitiryaa vale aphiye nihuku no ifesta yo Pentekositi.
17 Vano, nari u Miletu, uyo ahowiihaniha mahumu o nloko no Efesu. 18 Uwa waya, uyo ahowiirela co: “Nyuuva nnaacuwela sana-saana meettelwaaka iriyariinyu, ikhumelo nihuku kiwilyaaka iprovinsiya yo Asiya. 19 Kihaavarela nteko Apwiiya khampa ipottha nimiithori, kittehattehiyaka nlattu woolupatthiya naayuuta. 20 Uhookhalaru commo, akihiile wuuhimeryani citthu caahala wuuphwanyihani ifayita,ni kihaalalyeera hataa uwiitthuciha atthu inupa ni inupa. 21 Masi, mi kiholalyeera mapuro otheene, ni kihaalalyeera ihapari ayuuta ni hataa akereku, wiira yaalamuliya uttharuwa, unturuwela Nluku ni umwaamini Pwiiyeehu Yesu. 22 Ni vano, kikaviheriyaka ni nnepa wowaarya, kinaarwaa u Yerusalemu uhookhalaru wiira akincuwela itthu inhala ukiirannyeela nwo. 23 Masi kinaacuwela wiira khula isittatti, nnepa wowaarya unaakihimeerya wiira unaakiiweherera utthukeliya mmakhattya ni ukikhumelela masakha. 24 Masi mi, akintepa uvaha ifayita cinene ukumyaaka, masi kinvaha ifayita nteko uvahaceriyaaka woolalyeera na Apwiiya Yesu wiira kimalihe, kilalyeeraka ihapari comaana cinooluma unamaana woonironya wa Nluku.
25 Vano, kihocuwela wiira nyuuva kuulalyeraakani* umwene, khannohala ukoona-tho. 26 Vano, nyuuva nkhanle masaahiti wiira ilelo, akinhala uttheka nlattu wophome yaatthu,* 27 Kontha akihiile wuuhimyeerani itthu impheelaawe Nluku. 28 Mwiiwehawehe mwaaneeneenyu ni nwehawehe ikhontwaa nnepa wowaarya wuuvahacenryaayani ni wiira nwehawehe nloko na Nluku, uyo thumilyaawe niiphome yamwanawe. 29 Kinaacuwela wiira karwaaka, anaahala uwa iriyariinyu amwiici owoopiha, anhala uhiwacera ikhontwaa saana, 30 ni hataa iriyariinyu, anaahala ukhumelela alopwana anhala wuuluma citthu coohiloka wiira atthari akhalane moopuwelelo mamocaaru naayo awayaayo.
31 Phimaana, nhiitthaale ni nhiliyale wiira myaakha miraru, uhiyu ni uthana, mi akihiile wuukurumicani wo khula ntthu nimiithori. 32 Ni vano, kinoohiyani mmatatani wa Nluku ni nuulumo nawe ninooluma unamaanaawe woonironnya, nuulumo ninhala wuulipihani ni ninhala waavaha itthuvo ale otheene akhanle ooreerihiya. 33 Akipheenle iparaata hataa iwooru ni hataa ikuwo yantthu. 34 Nyuuva nnaacuwela wiira kihovara nteko nimatataakaala wiira kikhalane citthu caakithwa ni citthu caathwa apatthannyaaka. 35 Kihowooniherani nhina citthu cotheene, wiira mwavaraka nteko ala manannaala mwiikurumicaka, nhaana waakavihera atthu oololovaca ni nhiliyalaka moolumo Apwiiya Yesu yinryaaya: ‘Uvaha unaatteeliha nrima venci, upwaha waakhelaka.’”
36 Umaliha wawe wuuluma nnya citthunnya, ahokhoroma nkhayi naatthu otheene ni aholompa. 37 Otheene yahopacera wunla venci; vano yahonkapatta Paulu ni yahompecari, 38 kontha ayo yahoriipiya nrima, nlattu uyo woowiirela wiira khayaahala woona-tho ikhovyaawe. Vano, yahonveleela mpaka unaviiyuni.