Yoopacera ya Peturu

4 Ukhala wiira Kristu hohuva mwiirutthuni, nyuuva mwiitthenkace* mmoopuweleloni; kontha ule nohuva mwiirutthuni hohiya uvara matampi, 2 wiira nhirihakace ukatiinyu mpankaka citthu cinaacivela apinaatamu, masi mpankaka itthu inoncivela Nluku. 3 Khalayi nyuuva mwanhononaca ukumiinyu mpankaka citthu cimpankaaya atthu ontuniyani, ukati mwaarineenyu meettelo oohihisima,* waakhaleenyu cuucivelakani citthu coohiloka, uhapaliya, ifesta coohiloka, uwurya cinene ni waaswalela attontto.* 4 Ayo anawuutikhinacani, kontha nhohiya weettela makhalelo oohinamaana aneettelaaya,* phimaana anaawuulumani pusya. 5 Masi ayo atthwaayo anaahala waakhula uhoolo wawe ule nohala waahukhumu atthu akumi ni atthu ookhwa. 6 Phimaana, nlattu wo yeela itthwiila ihapari comaana alalyeeriyaaya ciicammo atthu ookhwa, hataa yahukhumwiyaka mwiirutthuni toko cintthunaaya atthu, akhale akumi munnepani toko cintthunaawe Nluku.

7 Masi uhaattamela wiimaleloni wo citthu cotheene. Phimaana, nkhalane moopuwelelo omaana* ni nhihiyerere ulompa. 8 Uhiya commo, nfentane venci, kontha nifento ninaattiyelela matampi menci. 9 Nwaakhele akhunaninyu, woohittekutta. 10 Ukhala wiira khula ntthu hovahiya ucuwelaca, avarele nteko nwo ucuwelacanwo wiira aakavihere atthu akiina nuunamaana woonironya wa Nluku unooniheriya ni mananna menci. 11 Ntthu oolumaka oolume khampa ntthu nohimya moolumo a Nluku; ntthu avaraka nteko, avare khampa ntthu nokhuluvela ikuru cinvahaawe Nluku; wiira nhina citthu cotheene Nluku attitthimihiye nlattu wa Yesu Kristu. Uttitthima ni ikuru cikhanle cawawe mpaka. Amem.

12 Mayamunna nhisanke nlattu wo marikariko* nnaananeenyu, ukhalaka toko nyuuva inwiirannyeelani itthu nyuuva ihincuweleenyu. 13 Uhiya commo, nhihiyerere utteeliya ukati nnaananeenyu masakha Kristu aanannyaawe, wiira nyuuva ciicammo ntteeliye, ni wuucareni utteeliya ukati unhalaaya wooniheriya uttitthima wawe. 14 Wakhala wiira nyuuva khannohisimiya* nlattu wo ncina na Kristu, nyuuva nkhanle atthu ootteeliya, kontha nnepa wowaarya, iyee, nnepa wa Nluku uri ni nyuuva.

15 Iriyariinyu hikhale ntthu nohuva nlattu wo wiiva, winnya, utakhala nrima, awula wiikelakeliha citthu caasineene. 16 Wakhala wiira haavo nohuva nlattu wookhala nkristau, hoone ihaaya, hihiyerere unttitthimiha Nluku akusaka ncina nawe. 17 Uhophiya ukati wiira cipaceriye ihukhumu, ni nnyo ihukhumunnyo cinhala upacera naapoovu a Nluku. Vano wakhala wiira ninhala upaceriya hiiva, isiyani inhala uwiirannyeela ale ahineewelela ihapari comaana ca Nluku? 18 “Wakhala wiira nasariya naahala wiikurumica wiira oopoliye ni Nluku, vano isiyani inhala umwiirannyeela ule himmwiiwelela Nluku ni namatampi? 19 Vano, ale anhuva nlattu woopanka itthu impheelaawe Nluku yiivaherere* mmatatani wa Mumpi ookhuluvelyaa, ni ukati yooyo apanke citthu comaana.