Ya Arooma
7 Mayamunna, niireke wiira nyuuva khamuncuwela, (kinwuulumana ale ancuwela nlamulo), wiira nlamulo ninonhoolela ntthu nari nkumi? 2 Wootakihera, nlamulo nineera wiira nthiyana ootheliya haana ukhala naawannyawe; masi yakhwaaka vale nlamulo ninantaphula. 3 Phimaana, nthiyana ootheliya aahiyaka awannyawe ni arwaaka ukhala ninlopwana nkhwaawe, nohala wiireliya wiira neetta uluva. Masi awannyawe yakhwaaka, nlamulo ninantaphula, ni atheliyaka-tho ninlopwana nkhwaawe, khanhala wiireliya-tho neetta uluva.
4 Vano,mayamunna , nyuuva nhokhwa munlamuloni nlattu wo ukhwa wa Kristu, wiira muntthare uyova, ule unwelelihiye muukhwani, wiira niimihe mihokorokho ca Nluku. 5 Kontha ukati naakhaleehu nicivelihaka irutthwiihu, nipankaka citthu cootakhala, nlamulo naahonoonihera wiira niniimiha mihokorokho caahala uniiva. 6 Masi nnaco, nihotaphuliya khanintthara-tho nlamulo, ukhala wiira nlamulo khaninkhiri-tho upanka itthu. Phimaana, nihokhitiri ukhala ipottha ca Nluku, neettihiyaka ni nnepa uhiya ni nlamulo toko khalayi
7 Ninhala wuulumani-tho? Niireke nlamulo itampi? Mena! Khweeliini mi akaahala ucuwela itampi nihikhanle nlamulo. Wootakihera, mi akaahala ucuwela nttima nlamulo nihinre: “Nhikhalane nttima.” 8 Masi nlattu wo nlamulo, itampi ihokiiriha ukhalana nttima ninci, kontha woohinlamulo itampi khinkhala. 9 Khweeliini, khalayi mi kaakhala woohinlamulo. Masi uwawaya nlamulo, itampi ihoturuwela, masi mi kihokhwa. 10 Ni nlamulo koonihaaka toko wiira ninaavaha ukumi, kihoonenela wiira ninawiiva. 11 Kontha itampi ituruwenle nlattu wo nlamulo, ihokiiriha upanka citthu coohinamaana, ni iyo itampiiyo ihokiiva. 12 Coo, nlamulo veekha caya nikhanle nowaarya, ni nrumo nikhanle nowaarya, nosariya ni nomaana.
13 Vano, niireke itthu yomaana phikiivile? Khweeliini mena! Masi itampi phikiivile, wiira yoonannye khampa itampi, ikiirihaka ukhwa nlattu wo itthu yomaana, wiira nlattu wo malamulo, itampi itepe ukhala itampi. 14 Kontha ninaacuwela wiira nlamulo nikhanle no mminepani, masi mi kikhanle ntthu kitumihiye nlattu wo itampi. 15 Kontha mi akincuwela itthu impankaaka. Kontha akimpanka itthu impheelaaka, masi kimpanka itthu inkirusa. 16 Phimaana, wakhala wiira kimpanka itthu kihimpheelaaka, kinaakupali wiira nlamulo nikhanle nomaana. 17 Vano akinakhala miiva kimpanka, masi itampi phinkiiriha upanka. 18 Kontha miiva, kinaaca irutthwaaka, khiivo itthu yomaana mwiirutthuni waka; kontha kinaapheela upanka itthu yomaana, masi akinkhitiri. 19 Kontha akimpanka itthu yomaana kimpheelaaka, masi itthu yoohinamaana ihimpheelaaka himpankaaka. 20 Vano wakhala wiira kinaapanka itthu ihimpheelaaka, akinakhala miiva kimpanka, masi itampi irinaaka phinkiiriha upanka.
21 Mi kihoonenela nlamulo ninkeettiha: Kapheelaka upanka itthu yomaana, inaawa uhoolo waka itthu yoohinamaana. 22 Mi khweeliini, ninaakicivela ninrimaaka wotheene nlamulo na Nluku. 23 Masi, mi kinawoona nlamulo nikhwaawe mwiirutthuni waka naanaka ninlamulo nikhwaawe, niri mmoopuweleloni waka ni nikiirihaka weetta ninlamulo no itampi niri mwiirutthuni waka. 24 Mi kikhanle nlopwana ootakhaliya! Tipani nohala ukoopola ila irutthwiila inkirweeha wuukhwani? 25 Kinansukhuru Nluku, nlattu wa Yesu Kristu Apwiiyeehu! Co, nimoopuwelelwaaka, mi kikhanle ipottha yo nlamulo na Nluku, masi niirutthwaaka, mi kikhanle ipottha yo nlamulo no itampi.