Miteko co Mapostolu
3 Peturu ni Joau yaarwaa ulompa utempulu ukati woothana, waari 15 oora, 2 ni yahomoona nlopwana mmoca ahaakhitiri weetta ikhumelo iyareelo, nateesiye uyo ukatyuuyo. Uyo, anrwaaniyaka khula nihuku wankhorani wootempulu, weehaniya Nkhora Wooreera, wiira aalepele icimoola atthu yaakela ntempulu. 3 Uyo nlopwanooyo, umoona wawe Peturu ni Joau akelaka ntempulu, ahopacera waalepela icimoola. 4 Vano, Peturu ni Joau yahonweheeha uyo nlopwanooyo, ni Peturu aheera: “Nkaniwehe.” 5 Uyo ahopacera waaweheeha awehereraka wiira anhala uvahiya itthu. 6 Vano, Peturu aheera: “Akirina iparaata hataa iwooru, masi irinaaka phinoovahaaka. Mwancina na Yesu Kristu o Nasaree, weetteke!” 7 Vano, uyo ahonvarela ntata no moono wonlopwana ni ahomweemesa. Metto cawe ni ikokoottho cawe, cahokhala saana, 8 ni uyo ahotupha ni aheemela, ahopacera weetta ni ahokela ntempulu nkhayi naayo, eettaka, atuphatuphaka ni anttottopelaka Nluku. 9 Ni atthu otheene yahomoona eettaka ni anttottopelaka Nluku. 10 Ni atthwaayo yahoncuwelela wiira ule nlopwanoole phiyoole oonkomaka Wankhorani Wooreera wo utempulu, ni yahokhala ootikhinihiya nlattu wo itthu yankhumelenle.
11 Nanlelo nlopwanooyo navarenle ntata na Peturu ni Joau, atthu yahotthawelela nipuro naaryaaya, neehaniya Nipirothi na Salomau, anaryeene ootikhinihiya cinene. 12 Ukati Peturu woonilyaawe iyo itthwiiyo, ahowiirela atthwaayo: “Apoovu o Isarayeli, kontha isiyani nnokhaleenyu ootikhinihiya venci, nniweheehaka toko ula nlopwanoola nimwiirihile weetta niikuru cihu awula nlattu wonswalela wihu Nluku? 13 Nluku a Aparahaamu, a Isaaki ni a Yaakopi, Nluku aasinhiya-taateehu, honttitthimiha nantekwaawe Yesu, ule nyuuva mwanvariihileenyu ni mwankhottileenyu uhoolo wa Pilatu, waahookhalaru wiira uyo aholakela untthukula. 14 Khweeliini, nyuuva nhonkhotta nlopwana owaarya ni nasariya. Ni mwaholepela wiira atthukuliye nlopwana aawiivakaca atthu, 15 ni nhomwiiva Ntthu Ofayita Cinene novaha ukumi. Masi Nluku, homunweleliha ni hiiva ninaacuwela iyo itthwiiyo. 16 Ni nlattu woncina nawe ni wowaamini wihu ncina nawe, phi itthu imwiirihile uvona ula nlopwana nnomooneenyuula. Nlattu woomwaamini wihu Yesu, ula nlopwanoola hokhala saana. 17 ‘Mayamunna, koocuwela wiira mpankile nnya citthunnya woohicuwela, khampa cipankilyaaya ahooleliinyu. 18 Masi, naala manannaala, Nluku heerannyeeha itthu yaahimilyaawe aavarelaka nteko maporofeeta, wiira co: Kristu ahaana ahuvaka.
19 Nrukunuse meettelweenyu ni nhiye moopuwelelweenyu oohiloka, wiira matampiinyu aleveleliye ni wiira wuuphwanyeni ukati wo nnema wa Yehova 20 ni uyo ooveleelihereni Kristu nthanleliyeenyu, Yesu. 21 Yesu, haana akhalaka wiirimu mpaka ukati cinhalaaya ulokihaciya citthu cotheene, Nluku cuulumilyaawe aavarelaka nteko maporofeetaawe owaarya okhalayi. 22 Khweeliini, Moceesi heera: ‘Yehova, Nlukwiinyu, naahala unthanla iriyariinyu porofeeta mmoca oolikana ni miiva. Mmwiiwelele citthu cotheene nohalaawe wuuhimeryani. 23 Khweeliini, ule nohala uhimwiiwelela uyo porofeetooyo, naahala utankanyiya iriyari yaapoovu.’ 24 Ni maporofeeta otheene, upacera Samuweli, yaaholalya sana-saana itthu yaahala wiirannya ala mahukwaala. 25 Nyuuva nkhanle asaana omaporofeeta ni onleehano Nluku aapankannyaawe asinhiya-taateenyu, ukati waamwiirenlyaawe Aparahaamu: ‘Nlattu wo uculwaa anaahala ucaalihiya maloko otheene o watuniyani.’ 26 Nluku umunweleliha wawe Nantekwaawe, aapacenre wuuveleeliherani nyuuva wiira oocaliheni, ookavihereni uhiya meettelweenyu oohiloka.”