Yantikheliyaaya Akalasiya
5 Kristu nooponle wiira nikhalane nwo utaphuwanwo. Phimaana mayamunna, nhihiyerere wiikurumica ukhala oolipa ni ciicammo mwiikurumice wiira nhituruwele-tho ukhala ipottha.
2 Nkiiweehe mayamunna! Miiva Paulu, kinwiirelani wiira nyuuva moolihiyaka vale, Kristu khanhala ukhalana ifayita muukumini winyu. 3 Kinawuuhimyeerani-tho wiira khula nlopwana nokupaleela wuulihiya, uyo haana eewelelaka Nlamulo notheene. 4 Nyuuva nnomananiha ukhala nasariya nlattu woweettela nlamulo, khannomwaataanana Kristu; nyuuva nhokhotta imwaneeneenyu unamaana woonironya unithoonyenryaawe Yesu. 5 Masi hiivano, nikaviheriyaka ninnepa wowaarya ninaahala uweherera cinene wooniya ukhala anasariya nlattu wo waamini wihu. 6 Kontha atthari a Kristu Yesu, wuulihiya ni uhuulihiya khiivo inoonaaya ukhalana ifayita, ayo anoona ukhalana ifayita waamini unthoonyeriya ni nifento.
7 Nyuuva mweera ntthawaka saana, vano tipani uuhinhileni wiiwelela ikhweeli ciitthucileenyu? 8 Citthu cineetthucihaaya atthu yuuhinhileni khacinakhumaka itthu wa Nluku wiihanneni. 9 Ifermentu vakaani inaarunwiha iphepa yoweethenya. 10 Kinaakhuluvela wiira nyuuva nkhanle atthari Apwiiya va, khannohala wuupuwela mananna makhwaawe; masi ale anokukureehani anaahala uhukhumwiinya toko cimphwanelaaya, pooti ukhala pani. 11 Mayamunna, waari wiira nanlelo kineetthuciha wuulihaniya, nyuuva khamwaahala ukilupattha. Ni itthu kineetthucihaaka nhina mananna Yesu ciiviyaawe wanipottoni, khamwaahala uvaanyiha. 12 Mi khaapheela wiira ale anvirikaniha itthu ineetthuceenyu, yiihune* imwanennyaaya.
13 Mayamunna, nyuuva nhothanliya wiira nkhalane utaphuwa. Nhivarele nteko utaphuwa winyu wiira mpake citthu cinoocivelani imwaneeneenyu, uhiya commo, nthoonyeraka nifento, nvare nteko khampa ipottha, mwaakaviheraka mayamunneenyu. 14 Kontha Nlamulo notheene nimpheela uhimya itthu imoca, ineera: “Unfente nkhunanaa khampa cineefentaa.” 15 Vano, wakhala wiira khannohiyerera ulumana ni ukhuurana, ratta wiira nhimalamalihane.
16 Masi kinwiirelani: nhihiyerere weetta nkaviheriyaka ninnepa wowaarya, ni nhipanke citthu cinoocivelani. 17 Kontha citthu nyuuva cinoocivelani kahi nnepa wowaarya phimpheelaaya. Ni nnepa wowaarya citthu cimpheelaaya khacinakhala citthu nyuuva cinoocivelani; nnyo citthunyo khacinvaranaca, phimaana nyuuva khannopanka citthu cinoocivelani. 18 Uhiya commo, wakhala wiira nnokaviheriya ni nnepa wowaarya, nyuuva khannokhanyererihiya weettela nlamulo.
19 Citthu cimpheelaaya irutthu cinawoonannya sana-saana. Nnyo citthunnyo phinnya: Urupihana woohiloka, citthu coohiirya, makhalelo oohinamaana anoonihera wiira ntthuuyo khanoona ihaaya, 20 waaswalela anluku oohikhweeli, ukhwiri, uhiiwanana, unyakulihana, ihace, uviruwa cinene, uvaanyihana, uhaataana, utthara citthu cineetthucihaaya apinaatamu, 21 urama, uhapaliya, ifesta coohinamaana ni citthu cikhwaawe toko nnya. Mi kinawuuhimyeerani toko kaapacilyaaka wuuhimyeerani: Ale ampanka nnya citthunnya khanhala ukela muumweeneni wa Nluku.
22 Masi nhokorokho wonnepa wowaarya phuula: nifento, utteeliya, nnema, uvilela, unamaana, ureera nrima, waamini, 23 umaala, wiivaraca. Khanivo nlamulo ninvirikaniha* nnya citthunnya. 24 Atthari a Kristu Yesu, ahokhomela irutthwaaya wanipottoni ni ciicammo citthu caacivela ni yaapheelaaya.
25 Ukhala wiira nineettihiya ninnepa wowaarya wa Nluku, nihihiyerere ukhala neettiheriyaka nuuyo nnepa wowaaryooyo. 26 Nhiittottope, ni nhiwiirihe akhunaninyu usinttana, ni ciicammo nihiramane.