Yantikheliyaaya Akalasiya
4 Kinoohimyeerani wiira, wakhalaka wiira ule nohalana nhakhu nanlelo mwaana, uyo khanvirikana niipottha, hataa ukhalaka wiira mihakhu cotheene cikhanle caawawe, 2 kontha ahaavo anonwacera uyova ni ciicammo anwacera inupeeyo, mpaka wanhalaaya uphiya nihuku naathanlilyaaya athumwaane khalayiiru. 3 Inanna imocaaru, ukati waaryeehu asaana, hiiva ciicammo naari ipottha yomoolumacero ni yo makhalelo o ila ituniyeela. 4 Masi uphiya waya ukati, Nluku ahonveleeliha mwanawe, ni uyo ahoyariya ni nthiyana ni aheewelela nlamulo, 5 wiira awoopole ale aneettela nlamulo, ni wiira hiiva anoone ukhala asaanaawe.
6 Vano, ukhala wiira nyuuva nkhanle asaanaawe, uyo hoveleeliha nnepa wowaarya wa mwanawe wanrimani wihu, ni uyo nnepooyo unaakhuwela weeraka: “Aba,* Paapa!” 7 Vano, nyuuva khannakhala-tho ipottha, masi nkhanle asaana; ni ukhala wiira nkhanle asaana a Nluku, nyuuva ciicammo nnaahala waakhela ile yuuhiyenryaaweni.
8 Khweeliini, ukati nyuuva mwaariinyu nhinancuwela Nluku, mwaari ipottha caale nyuuva mwaawiihaneenyu anluku, masi khweeliini ahikhanle anluku. 9 Vano nnaco nyuuva nnoncuweleenyu Nluku, awula nnocuweliyeenyu ni Nluku, kontha isiyani nnopheeleenyu upanka citthu co va watuniyani va? Citthu coohiitthu awula citthu cihimphureliya itthu? Ni kontha isiyani nnopheeleenyu ukhala ipottha co nnyo citthunnyo? 10 Nyuuva nnawuupuwelaka wiira ahaavo mahuku, myeeri, ukati ni myaakha cootepa ukhalana ifayita ni nnaapankelaka ifesta. 11 Kinawoovaka wiira wiikurumica waka wiira kuukavihereni uhala ukhala wo mahala.
12 Mayamunna, kinawuulepelani wiira: Nkhale toko miiva, kontha miiva kari toko nyuuva, ni nyuuva khiivo yaakipankileenyu yootakhala. 13 Masi nyuuva mayamunna nnaacuwela wiira ikwaha yaapacerihilyaaka wuulalyeerani, waari nlattu woowerennya. 14 Ni hataa ukhalaka wiira irettaaka yahoorikarikiha makhalelweenyu, nyuuva mwaatthi khamwaakithanyile ni hataa khamwaakikhottile; masi mwaahokaakhelela khampa nlayikha na Nluku ni khampa Kristu Yesu. 15 Utteeliya winyunwe uri vayi? Kontha mi kinaakupaleela wiira wanakhitiryeele,* nyuuva mwaatthi mwanhala ukupali ukumiha miithweenyu ni ukivaha miiva. 16 Kiireke wiira miiva kihokhala mwiinaniinyu* nlattu wowuuhimyerani ikhweeli? 17 Ayo atthwaayo, anaapanka yotheene inkhitiryaaya wiira nkhale mphanttyaaya, kahi wiira ayo ihaavo inoopheelelaayani yomaana; uhiya commo, ayo ampheela wiira nyuuva nhikaataanane masi mwaavaresese ayova. 18 Khweeliini, unaareera ntthu upanka yotheene inkhitiryaawe wiira nyuuva nkhale mphanttyaawe, wakhalaru wiira nopanka wiira ookavihereni; ni inlamuliya upankiya iyo itthwiiyo kahi kinarivo, masi ciicammo kihirivo. 19 Asaanaaka, kihoturuwela-tho woona uweryaa, nwo uweryanwo unlikanaca khampa wanthiyana nopheela uyara, ni kinaahala woona uweryaa mpaka wanhaleenyu uthoonyera ukhalana makhalelo a Kristu. 20 Mi kampheela ukhala iriyariinyu ni uwuulumanani nimananna oovirikana, ukhala wiira nna co kihoosanka cinene nlattu waawinyu.
21 Nkihimyeere! Kiireke nyuuva nnopheela weetteela nlamulo va, khannoviriyana itthu inhimyaaya Nlamulo? 22 Wootakihera, uhantikhiya wiira Aparahaamu ahaana asaana eeli, mmocooyo anyanre niipotthaawe ni nkhwaawyooyo anyanre naamwaarawe; 23 mwaana anyanryaawe niipotthooyo, anyanre khampa noyariyaawe mwaana nkhwaawe, masi mwaana anyanryaawe naamwaarawyooyo, aahookhuluvelihiya ni Nluku. 24 Nnya citthunnya cikhanle nthoonyero paasi: ala athiyana eelyaala anthoonyera maleehano meeli. Nimocanno naapankiye umwaakoni Sinaayi, nno ninaakumihera asaana oohala ukhala ipottha, nno nleehanonno ninlikana ni Akaari. 25 Akaari khanle Sinaayi, mwaako umphwanyannya ilapo yo Arapiya, ni nothoonyera ukhala Yerusalemu o naanaano, khanle ipottha wamoca naasaanaawe. 26 Masi Yerusalemu ooculu, ri ootaphuwa ni uyo khanle anumwanihu.
27 Kontha uhantikhiya co: “Ntteeliye nrima nyuuva athiyana nhinyarava, ntthape nyuuva athiyana nhinoona uweryaa nlattu wooyarava; kontha asaana aathiyana oohiiya awannyaya khaamala winciva, waavikana asaana aathiyana arina awannyaya.” 28 Nyuuva mayamunna, nkhanle asaana ookhuluvelihiya, khampa Isaaki caaryaawe mwaana ookhuluvelihiya. 29 Masi, toko vaavale khalayi vale mwaana aayariye ni mananna cinyariyaaya anamwane akhwaawe wanlupatthaaya mwaana aakhuluvelihiye, iyo itthwiiyo ineera yeerannyaaka mahukweehwaala. 30 Masi Cowantikhiya Cowaarya cinhimyani? “Moomole ipottheeyo wamoca nimwanayooyo, kontha mwaanooyo khanhala waakhela yoohiyeriya wamoca ni mwaana aathiyana ahikhanle ipottha.” 31 Phimaana mayamunna, hi khaninakhala asaana opottha, masi nikhanle asaana aathiyana ahikhanle ipottha.