Miteko co Mapostolu
13 U Antiyokiya, yahaavo maporofeeta ni anamwiitthuciha owanlokoni: Pernape, Simeau, aacuweliya ukhala Nigeri, Lusiyu o Sireeni, Manayeeni eetthucihiye ni Herooti nhooleli o distiritu ni Saulu. 2 Yanswalelakoono Yehova ni anatthukile, nnepa wowaarya wahowiirela: “Nkaawayanihere Pernape ni Peturu nlattu wo nteko unhalaaya ukivarela.” 3 Vano, umaliha waya utthuka ni ulompa, ayo yahoweesera matata ni yaahaahiya urwaa.
4 Vano, ale alopwana yaavelelihiye ni nnepa wowaaryaale, yahorwaa u Seleusiya ni yahovirelela u Siipere. 5 Ukati yaaphiyalyaaya u Salamina, yahopacera ulalyeera ihapari comaana ca Nluku mmasinakooka caayuuta. Ni Joau ciicammo aari nkhayi naayo, khampa namakavihera.
6 Umaliha wawe ulalyeera iiliya yotheene mpaka u Pafusi, ahomphwanya nlopwana mmoca eehaniya Pariyesu, aari nanyanka ni porofeeta owootha. 7 Uyo aari nkhayi ni Kovernatoore oporovinsiya yo Rooma, Sergiu Paulu, nlopwana oocuwelaca. Uyo, ahomwiihana Pernape ni Saulu, kontha apheela wiiwa moolumo a Nluku. 8 Masi, Elimasi nanyanka (ncina nawe phintaphulelaaya), ahancera waavaanyiha amananihaka unhapusa kovernatoore wiira haamini. 9 Vano, Saulu ciicammo eehaniya Paulu, wahoncara nnepa wowaarya ni ahonweheeha uyo nlopwanooyo, 10 ni aheera: “Weeva ukhanle nlopwana owootha ni nopanka citthu coohinamaana, mwaana a Tiyaapu, mwiinani o citthu cotheene cosariya, khunhala uhiya wuuluma pusya mittala ca Yehova? 11 Uviriyane: Yehova naahala wuuhukhumu, ni unaahala uhiya woona ncuwa ukati vakaani.” Woohipica, ahoona itthapwe ni ipiphi, ni uyo ahopacera weetta aapaapelaka ni amananihaka umphwanya ntthu, wiira anvarele moono. 12 Vano, kovernatooryooyo woona wawe itthu yeerannyeele, aahaamini, kontha ahokhala ootikhinihiya ni citthu ceetthucihiyaawe ca Yehova.
13 Paulu ni atthu yaarinaawe yahokela nkalawani u Pafusi ni yahophiya u Perke ilapo yo Panfiliya. Masi, Joau ahaahiya ni ahoturuwela u Yerusalemu. 14 Masi, ayo yahopanka ikwaha ukhuma u Perke ni yahophiya u Antiyokiya, u Pisiitia. Yahokela nsinakooka nihuku nosaapatu ni yahonkoma. 15 Umalihiya waya usomiya malamulo o maporofeeta, nhooleli oosinakooka aahoruma wiirelaciya: “Mayamunna, mwakhalana nuulumo nowaalipiha apoovu, pooti wuuluma.” 16 Vano, Paulu ahonwa, ahonwusa ntata ni aheera:
“Alopwana o Isarayeli ni otheene ale ammoova Nluku, nviriyane! 17 Nluku aala apoovwaala, Nluku o Isarayeli, ahaathanla asinhiya-taateehu, uyo ahaattitthimiha ukati waakhalaaya ilapo yahaari yawaya, ilapo yo Wiciipitu ni ahaakumiha nwo nintata nawe nokuru. 18 Ni wookhalaka myaakha 40, uyo ahaavilela muuthakoni, 19 ahokanyulaca maloko 7 olapo yo Kanaa ni ahaavaha ilapweeyo. 20 Citthu cotheene nnyo, ceerannyeele nhina myaakha 450.
“Vano, aahaavaha masuwiisi mpaka Samuweli porofeeta. 21 Masi, ayo yahonlepela mwene, ni Nluku ahaavaha Sawuli, mwana a Kiisi, aakhuma nloko na Pencamii, ni aaholamulela myaakha 40. 22 Nluku umwaakha wawe Sawuli umwene, aahonthanla Davidi wiira akhale mwene, yooyo aamulumilyaawe eeraka: ‘Kihomphwanya Davidi, mwaana a Yesee, nlopwana nokitteeliha nrima, ni uyo, naahala upanka citthu cotheene cimpheelaaka.’ 23 Toko caakhuluvelihilyaawe, Nluku aahaawaanela moopoli asarayeli, Yesu, aakhuma nloko naawawe uyo nlopwanooyo. 24 Hinawa Yesu, Joau ahaalalyeera apoovu otheene o Isarayeli, mpattiso waathoonyera uttharuwa. 25 Waahookhalaru commo, ukati waamalihaawe ntekwaawe, Joau aaneeraka: ‘Nyuuva nnoona wiira miiva tipani? Mi akinakhala yooyo. Khweeliini, uttuli waka, naawa ntthu ookipwaha, ni mi khunkiphwanela utthukulaca mikhoyi cosantaliya cawe.’
26 Mayamunna, ucuulu wonloko na Aparahaamu ni otheene nyuuva nnomoova Nluku, nnya ihapari nnya, niveleeliheriye hiiva. 27 Kontha atthu ankhala u Yerusalemu ni ahoolelyaaya, khancuwelenle uyo moopolyuuyo, masi, uvara waya nteko khampa masuwiisi, aheerannyeeha moolumo o maporofeeta, ansomiya khula isaapatu. 28 Waahookhalaru wiira khayooniye itthu yootakhala yaavanryaawe wiira eeviye, ayo yahonkhanyereriha Pilatu wiira arume wiiviya. 29 Ni, upankiya waya citthu cantikhiye khalayiiru aaciyaka uyo, aahokumihiya wa mwirini vaa ni ahorwaaniya mmahiye. 30 Masi Nluku ahomunweleliha, 31 ni mahuku menci, uyo aahaakhumelela ale yaakhumannyaawe u Kalileya arwaaka u Yerusalemu. Ayo, nna co phinvaha usaahityaawe iriyari yaapoovu.
32 Vano, hiiva ninoolalyeerani ihapari comaana cinooluma itthu yaakhuluvelihiyaaya asinhiya-taateehu. 33 Nluku, honipankela itthu yaakhuluvelihilyaawe asinhiya-taateehu, hiiva asaanaaya, amunwelelihaka Yesu, khampa cantikhiyaaya nhina isaalimu: ‘Weeva ukhanle mwanaka, ilelo, kikhanle athumwana.’ 34 Nlattu Nluku woomunweleliha anvahaka irutthu inhala uhikhwa ni hataa wuntta, Uyo hohimya eeraka: ‘Kinaahala wuuvahani moolumo onifento ni ookhuluvelya, kankhuluvelihilyaaka Davidi.’ 35 Ihantikhiya isaalimu ikhwaawe ciicammo, yiiriyaka: ‘Khunhala unhiya nswalyaa ookhuluvelya onttaka.’ 36 Davidi ahonvarela nteko Nluku ukatyaawe, uyo hokhwa, hovithiya ni hontta. 37 Masi, ule Nluku munwelelihilyaawe, irutthwaawe khayonttile.
38 Phimaana, mayamunna, ncuwele wiira nlattu wo uyo nlopwanooyo, phinleveleliyeenyu itampi cinyu, 39 ni nlattu wo uyo nlopwanooyo, otheene ule nomwaamini naahala wooniya ukhala nasariya ni citthu cotheene caahalaawe wooniya uhikhala nasariya nlattu wonlamulo na Moceesi. 40 Vano, mwiikhikicere wiira ihuuphwanyeni ile yaahimiye nimaporofeeta: 41 ‘Nyuuva anamatarawa, mooneke, moove ni nkhume, kontha kinvara nteko ala mahukweenywaala, nteko nyuuva unhaleenyu uhikupali-tho hataa nhimeriyaka sana-saana.’”
42 Ukati waakhumaaya, atthwaayo yahaalepela isontte wiira yawuulume-tho nnyo citthunnyo isaapatu yaahala uwa. 43 Umala waya nkutthaano nsinakooka, ayuuta ni anattiini enci yahontthara Paulu ni Pernape, ni ukati waawuulumanaaya, yaanaalepela wiira ahihiyerere wooniheriya unamaana woonironya wa Nluku.
44 Uphiya waya isaapatu, atthu otheene oosittatti yahothukumana wiira yiiwelele nuulumo na Yehova. 45 Ukati ayuuta waawonnyaaya atthu enci, yahokhala ninttima ni yahopacera uvaanyiha itthu Paulu yaahimyaawe. 46 Vano, Paulu ni Pernape yahowiirela ayuuta alipaka nrima: “Nahaana upacera wuulalyeerani nyuuva nuulumo na Nluku. Ukhala wiira nhokhotta ni nneecoona uhiphwanela waakhela ukumi woohimala, ninrwaa vano waalalyeera atthu ahikhanle ayuuta. 47 Kontha Yehova honiruma eeraka: ‘Kihoothanlani wiira nkhale nthuko waatthu, wiira mwalalyeere woopoliya mpaka mapuro oottayi ontuninyani.’”
48 Ukati atthu yahaari ayuuta weewilyaaya iyo itthwiiyo, yahotteeliya ni yahopacera uttottopela nuulumo na Yehova, ni atthu otheene yaapheela woopoliya wiira aphwanye ukumi woohimala yahokhala atthari. 49 Uhiya commo, nuulumo na Yehova nanlalyeeriya ule ncokoole wotheene. 50 Masi, ayuuta yahaatheperya athiyana yaattitthimihiya ni yaamoova Nluku, hataa ciicammo, alopwana oolemelihiya cinene o iyo isittattiiyo wiira yanlupatthe Paulu ni Pernape, ni yahowoomola uyo ncokooyo. 51 Vano, ayo yahokukuttha ntthupi nonnyaani waya wiira naakhalele usaahiti ni yahorwaa u Ikoniyu. 52 Ni attharyaayo khayaahiyerera ukhala ootteeliya ni unaacanre nnepa wowaarya.