Anamawehaweha 12

Asarayeli yahokhuma umwaakoni Sinai ni yahopacera weetta nkwaha yaviraka muuthakoni. Uphiya waya nipuro neehaniya Kate, Yehova ahonruma Moceesi wiira anthanle ntthu mmoca wo khula nihimo. Moceesi waathanla wawe yahokhumelela alopwana 12. Vano Moceesi aahoweerela ayo alopwana 12 ayo co: “Urwennye u Kanaa ni yawehiye itthayeeyo yakhala wiira yomaana ni yooreera ulima. Mwawehe isittattinnyo mananna ciryaaya ni wakhala wiira apoovwaayo okuru awula mena.” Vano, ayo alopwanaayo yaahorwa u Kanaa

Ukhala waya mahuku 40, yaahoturuwa ni yahowaana mihokorokho ceehaniya fiiku, romaa ni uva. Vano yahopacera waahimeerya asarayeli citthu connyaaya, yiiraka co: “Itthayeeyo yomaana, masi apoovwaayaayo okuru cinene. Ni isittattinnyo citekeliye imuuru coorekamaca.”Masi Kalepe aari yooyo nkwahooyo, aheera co: “Masi uhookhalaru commo, hi pooti wanaatthemeehu.” Kontha isiyani Kalepe woolumacaawe commo? Kontha anonkhuluvela cinene Yehova khampa namawehaweha mmoca eehaniya Josuwe. Masi anamawehaweha 10 ayo yahaakhula yiiraka co: “Hataa vakaani! Kontha atthu o Kanaa akhanle atthu oorekama. Neelattaanihaka ni ayova, ninkhala khampa macoope.”

Ukati asarayeli weewilyaaya ayo moolumwaayo, yaahowoova cinene atthu o Kanaa. Vano ayo yahopacera uhimeryana yeeraka nttwee nituruwele Wiciipitu. Josuwe ni Kalepe yahomananiha waamaaliha asarayeli, yeeraka co: Khaninlamuliya uwoova. Yehova naahala unikhikicera. Naahihiyeru unkhuluvela ni umwiiwelela.

Asarayeli khayaapheela wiiwa hataa-itthu. Mpaka ayo yaholakela umwiiva Josuwe ni Kalepe! Manannani Yehova oonenlyaawe iyo itthwiiyo? Uyo ahomwiirela Moceesi co: “Mi kihaapankela asarayeli citthu cinci coovirikana ni uhookhalaru commo, ayo khampheela ukiiwelela. Phimaana, anaahala ukhala va wuuthakoni vaa myaakha 40 ni anhala ukhwela vaava. Atthu anhala uphiya u Kanaa nohala ukhala Josuwe ni Kalepe naasaanaaya ayo asarayeelyaayo.”