Josuwe ni Macipiyonita

Atthu otheene u Kanaa yanheewa mananna yaakwanyulaciyaaya isittatti yo Yerikho. Vano mamwennyaayo yaaholakela uwaanana asarayeli. Masi atthu akhwaawe o isittatti yo u Kanaa yeehaniya Macipiyonita, yaaholakela woothereriha wiira khayaari o Kanaa. Phimaana, ayo yaahaathanla alopwana wiira yaware mattapwatta ni arwee yamwiirele Josuwe co: “Ninkhuma uttayi. Niheewa mananna Yehova wooponlyaaweni Wiciipitu ni u Mowapi. Mwanikhuluvelihaka wiira khannontuphela isittattiihu, ninaahala ukhala ipottha cinnyu.”

Josuwe aahaamini citthu caahimilyaaya ni ahaakhuluveliha wiira khaahala waatuphela. Masi uvira waya mahuku mararu, Josuwe aahonenela wiira khayaari atthu yaakhuma uttayi, masi yaari o Kanaa mommo. phimaana, uyo ahaakoha co: “Kontha isiyani nnithepacileenyu?” Ni ayo yahaakhula yiiraka: “Nanoova, kontha ninawaamini wiira Yehova naahala wuukaviherani utthema isittatti yo Kanaa. Sontte ihiwiive apoovwiihu!” Ukhala wiira Josuwe aahakhuluveliha wiira khaahala waatuphela, uyo ahaahiya yaakhalacaka.

Uvira waya ukati, mamwene 5 Makananewu yaahorwaa waatuphela Macipiyonita. Masi Josuwe nkhayi naanakhottwaawe yaholakela urwaa waakavihera macipiyonita. Ayo yaahoviriha uhiyu mmoca yeettaka. Ni usa waya yahopacera waana ikhotto. Makananewu yaahosanka ni yaahopacera utthawelaca khula mphantte. Vano khula mphantte waatthawelaaya Yehova aanaamorosela maluku moolupale o ceelo wiira aamalamalihe. Vano Josuwe, aahonlepela Yehova wiira ncuwanno neemele. Masi uyo, aari hinaapaca woona ncuwa neemelaka. Isiyani yaamwiirihile ulepela iyo itthwiiyo? Kontha Josuwe aanonkhuluvela venci Yehova. Vano, naahovira nihuku nteru woohiila. Asarayeli waatthema waya anakhotto otheene ni mamwenyayaayo, ncuwanno nahopacera weetta ni waheela.