Davidi ni Koliyasi

Yehova ahomwiirela Samuweli wiira arwee uwannyawe Yesee wiira anthanle mwaamwanawe mmoca wiira akhale mwene o Isarayeli. Ukati Samuweli waaphiilyaawe ahomoona mwaana oopacera a Yesee ni ahoopuwela wiira ari yooyo. Masi Yehova aheera co: “Khanakhala uyo kinthanlilyaaka. Mi akinaaweha atthwaayo makhalelo orutthwaaya, masi kinweha nrimaaya.”

Vano Yesee ahaawaana-tho asaanaawe 6. Masi Yehova khaathanlile hataa mmoca. Samuweli ahonkoha Yesee wakhala wiira khaarina-tho mwaana nkhwaawe. Uyo ahaakhula eeraka: “Kihaana itthyaako, neehaniya Davidi, masi rweele uliha ikhontwaa.” Vano Yesee ahoruma urwa wiihaniya. Ukati Davidi waaphiilyaawe, Yehova ahomwiirela Samuweli wiira ahonthanla Davidi. Samuweli ahomwiitthela makhura mmuru wawe ooniheraka wiira aari mwene o Isarayeli.

Uvira waya ukati, Mafilisteu yahorwa uwaanana ikhotto asarayeli. Nakhotto mmoca o Mafilisteu oosancama cinene eehaniya Koliyasi mahuku otheene anaatarawaca asarayeli eeraka: “Kinoona toko khaavo ntthu nokhitiri ukaanana mpaka ukitthema. Akhumelelaka ntthu nohala ukaanana mpaka ukitthema, miiva nkhayi ni anakhottwaaka ninhala ukhala ipottha cinyu. Masi miiva koottemakani nyuuvaca otheene nnohalaca ukhala ipottha cihu.”

Nkwaha mmoca Davidi ahaarweehela iyoolya asinyeenyaawe ukhottoni. Uphiya wawe nwo ahomoona Koliyasi aaveehaka ni aaruwanaka asarayeli, Davidi aheera, mi kinaarwaa umwaattakanana. Masi Sawuli ahomwiirela mena, weeva khumala uyeva. Davidi ahaakhula co: “Yehova naahala ukikavihera.”

Vano Sawuli ahomwiirela aware ikaruma cokhotto. Masi Davidi aheera wiira akinkhitiri waana ikhotto kinawanre nnya ikaruma nya. Vano Davidi ahowya ifiskaawe ahorwa mpaka umoolokoni ni ahottotta maluku 5 ni ahohela munrupani wawe ahotthimakaca mpaka nipuro naaryaawe Koliyasi. Koliyasi umoona wawe aheera co: “Nkaawa va mwammirawo, kimpheela uwiiva ni irutthweeyo urihela utakhwani wiira ikhuuriye niinama.” Masi Davidi khoovile. Uyo ahaakhula eeraka: “Wee umpheela ukaanana ukhuluvelaka ikatana ni nivaka. Masi mi kinhala uwaanana kinkhuluvelaka Yehova. Weeva unoopuwela wiira unaanana asarayeli? Ummwaanana Yehova. Atthu otheene va anaahala woona wiira Yehova haana ikuru uvikana ikaruma cokhotto. Uyo naahala wuuvaherera mmatatani wo asarayeli.”

Davidi aahohela nluku nfiiskani wawemmo. Ni ahonamula niikuru cawe cotheene ni Yehova aaheeriha nlukunno unlatha koliyasi wayuuci. Koliyasi ahomora ni ahokhwa. Mafilisteu otheene yahotthawa yoovaka. Nhokhitiri woona mananna Davidi ankhuluvenlyaawe Yehova? Weeva ciicammo unankhuluvela Yehova?