Ayo yaholalyeera yalipaka nrima

Ahaavo nlopwana mmoca ooheetta onkomaka mahuku otheene wankhora itempulu alepelaka icimoola. Nihuku nimoca, Peturu ni Joau yahorwaa utempulu ni uyo nlopwanooyo ahaalepela nsurukhu. Peturu ahomwiirela co: “Kinawuuvaha itthu yofayita cinene uvikana nsurukhu. Mwancina na Yesu, wunwe ni weette!” Vano, uyo nlopwanooyo ahancera weetta! Atthu enci yonne iyo itthwiiyo yahokhala ootikhinihiya ni yahokhala atthari a Yesu.

Masi anankuttho ni ale yeehaniya masatusewu yahoviruwa ni yahonrwaana utiripunaali Peturu ni Joau. Uphiya waya utiripunaali, yahokohiya tipani aavahile ikuru wiira anvonihe ule nlopwanoole. Peturu ahaakhula co: “Yesu Kristu, ule mwiivileenyu, phinivahile ikuru.” Anankuttho ni masatusewu yahaakhottiiha uvira yamuulumaka Yesu. Masi Peturu ni Joau yaheera: “Hi khaninhala uhiya umuuluma Yesu!”

Peturu ni Joau yaholeviya ni yahorwaa waahimerya atthari akhwaawe itthu yeerannyeele. Otheene yaholompa ni yahonlepela Yehova wiira aakavihere. Phimaana, Yehova ahaavaha nnepa wowaarya ni ayo khayaahiile ulalyeera yalipaka nrima ni waavoniha atthu. Atthari a Yesu khayaahiyerera winciva. Masi masatusewu khuwaacivela uwoona atthari yincivaka. Phimaana, yahaatthukiiha maapostolu. Hataa ukhalaka commo, nlayikha na Yehova nahorwaa ukhattya uhiyu ni nahotthukula mikhora co nkhattya ni nahowiirela maapostolu co: “Nturuwele utempulu ni nhihiye uwiitthuciha atthu.”

Waaseele, masatusewu yahowoona maapostolu yaakhumile nkhattya yeetthucihaka ntempulu. Toothoni, ayo yahaavara ni yahaarwaana utiripunaali. Nankuttho muulupale aheera co: “Hiiva keera nihookhottiihani umuuluma Yesu?” Masi Peturu ahowaakhula co: “Hiiva nimpacera umwiiwelela Nluku khampa nhooleli, kahi apinaatamu.”

Atthu ootiripunaali yahorusiya cinene ni yaapheela uwiivakaca maapostolu. Masi nlopwana mmoca eehaniya Kamaliyeeli aheera co: “Mwaatthi, ratta naala alopwanaala! Pooti ukhalaka wiira Nluku ri naayo. Vano nyuuva, khweeliini, nnopheela unrukunuwela Nluku?” Atthu ootiripunaali yahaamini waahiya maapostolu. Masi ahinaaya waahiya, ayo yahowaattakaca ni yahowiirela wiira ahilalyeere-tho. Hataa ukhalaka commo, maapostolu yaholipa nrima. Mahuku otheene, ayo yaanaalalyeera ihapari comaana ntempulu ni mmawaani.