Nlattu wookenyuwa, ihokhumelela itthu yomaana!

Helen naakenyuwa neemenle wakariinyuni yo wuulalyeerani. Asithiyana eeli anaavira uhoolo waya ikariinyu.

ASITHIYANA eeli yaaneetta yaviraka nipuro nootumihaciya wasittatti yo Baguio, u Filipinas. Ayo yahoona ikariinyu imoca invareleehu nteko wuulalyeerani, masi yaahowiira upwaha paahi. Helen, nrokorihu mmoca eemenle wakariinyuni, ahaaweha ayo asithiyanaayo ni ahokenyuwa cinene. Ayo asithiyanaayo khayeemenle, masi yahokhala ootikhinihiya nlattu wo mananna caakenyuwalyaawe nrokorihu.

Wahoolo, ale asithiyanaale yaari nkarerani yaturuwelaka uwannyaya ni yahoona Isalau yo Umwene imoca inantikhiye ileetara connyaaya wakariinyuni: jw.org. Phimaana yahokhuruwa nkarerani wiira yoone iwoora co mikutthaano cantikhiye wankhorani waya Isalau yo Umwene, ni iyo isalawiiyo yaathukumana maloko menci.

Ahinavira mahuku menci, ayo asithiyanaayo yahorwaa wankutthaanoni. Nnaacuwela tipani yaapacenryaaya umoona ukati waakenlyaaya nsalau yo Umwene? Helen! Yoole ukatyuule, ayo yahomuupuwela; uyo aari nrokorihu aawehile ni aakenyuwile ukati waavinryaaya wakariinyuni. Helen naattonka mananna caakhanlyaawe. Uyo neera: “Ukati waakattamenlyaaya, mi kahosanka. Kahoopuwela wiira ihaavo itthu atthunaka itthekilyaaka.” Ayo asithiyanaayo yahonhimerya Helen isiyani yaawiirihile urwaa ule nkutthaanoole.

Ale asithiyanaale, anaakenyuwa nlattu womphwanya nrokorihu Helen Usalauni yo Umwene.

Ale asithiyanaale wahaacivela cinene woona nkutthaano ni waacuwela mayamunna. Ayo yiicoonile khampa yaari uwaani. Ukati waawonnyaaya mayamunna akhwaawe yakwecaka nsalau umala waya nkutthaano, ayo yaholepela ukavihera. Mwanthiyana mmocooyo hokhuma u Filipinas ni hothamela ilapo ikhwaawe, masi nkiinooyo neera arwaaka umikutthaano ni hancera usomihiya Ibiiblya—nlattu wookenyuwa, ihokhumelela itthu yomaana!