Mwaanaacuwela?
Niireke wiira arooma yaanantthunihera usikhiya ntthu aakhomeliya wanipottoni khampa Yesu caakhomeliyaawe?
ATTHU enci anaacuwela ihantisi yo mbiiblyani inhimya wiira Yesu ahokhomeliya wanipottoni iriyari wo anakhirini eeli. (Mat. 27:35-38) Masi ahaavo atthu anvaanyiha Ibiiblya uhimya waya wiira irutthu ya Yesu yahotthenkaciya wiira isikhiye mmahiye.—Mark. 15:42-46.
Anamasoma ivangeeliyu akhwaawe khayaamini wiira ntthu aakhomeliye wanipottoni aanaasikhiya mmahiye khampa caasikhiyaaya atthu akiina yaakhwa woohikhomeliya wanipottoni. Ayo yaakupali wiira ntthu aakhomeliya wanipottoni aasikhiya niinanna yoovirikana. Namasoma neehaniya Ariel Sabar hantikha nrevistani wawe ineehaniya Smithsonian ataphulelaka nlattuni ayo woopuwelaaya commo: “Ale yaakhomeliya wanipottoni yaakhala anakhirini oolupale. Ni anamasoma akhwaawe unawaarika ukupali wiira arooma yanhala waahiya ayo atthwaayo yasikhiyaka khampa caasikhiyaaya atthu akhwaawe. Arooma yaapheela waattarusa ayo anakhirinnyaayo; phimaana, yaanaahiya irutthu caya cinakhomeliye wiira akhuuriye niinama co ntakhwani. Makhuva yaahalahala, yaanaariheliya munlikittini.”
Masi anamathipa ahokhitiri woonelela itthu ikhwaawe. Mwaakha wo 1968, yahophwanyiya makhuva a nlopwana aakhomeliye wanipottoni. Makhuvaawe yaaphwanyiye ncoko wo waattamela u Yerusalemu nhina mahiye aayuuta. Ayo makhuvaayo yaaphwanyiye nkaaxani waaheliyaaya makhuva a ntthu ookhwa. Nhina waya, nahophwanyiya nikhuva nimoca naarina ipereku. Iyo iperekwiiyo waaphimiyaaya, yahoniya wiira yaarina icentímetro 11.5. Nno nikhuvanno yaari ikottokottho ya nlopwana eehaniya Yehochanan. Sabar heera: “Iyo itthwiiyo yahomaliha uvaanyihaniya waarivo wakhala wiira ivangeeliyu cinooluma usikhiya wa Yesu cinhimya ikhweeli awula mena. Nikhuva na Yehochanan nihoonihera wiira arooma yaanaatthuniha usikhiya mmahiye ntthu aakhomeliya.”
Nno nikhuvanno ciicammo ninaakavihera ucuwela mananna Yesu caakhomeliyaawe wanipottoni. Masi ninawoonihera itthu yuulupale: ntthu aakhomeliya wanipottoni khampa nakhirini aanaatthuniheriya usikhiya ni irutthwaawe khayaarihiya ni khayaattikheliya munlikittini. Phimaana, Ibiiblya yeeraka wiira irutthu ya Yesu yahotthenkaciya ni yahosikhiya, iyo inhimya ikhweeli. Citthu coonelenlyaaya anamathipa cinaathoonyera wiira Ibiiblya khinootha.
Itthu yuulupale cinene, ukhalaka wiira Yehova phaakhuluvelihile wiira Yesu aanaahala usikhiya iriyari yaalopwana mathaciri. Khaavo ntthu aahala uhiiha nuulumo na Yehova wiirannya.—Isai. 53:9; 55:11.