MPANTTA 9
Manannani omaana owiitthenkaca wiira nirwee unkutthaanoni?
Camboja
Ucrânia
Mwakhala wiira nyuuva nneera nsomaka Ibiiblya ni Masaahiti a Yahova, pooti ukhalaka wiira nnaatthenkacaka mwaha nnohaleenyu usoma uhinaphiya ukati awula nihuku noosoma. Wanhala ureera upanka itthu imocaaru nhinaaya urwaa umikutthaanoni wihu co wanlokoni wiira mphwanyere ifayita. Uhihiyera utthenkaca mikutthaano co khula isumana phinhala wuuphwanyihani ifayita cinci.
Nthanle nihuku ni nipuro nnohaleenyu wiitthenkaca. Ukatini nyuuva nnokhitiriinyu wiitthenkaca ratta? Wicisuru nhinaaya wancera uvara miteko, awula nnamalihile uvara miteko? Awula uhiyu, asaaniinyu anarweele urupa? Hataa nhooryanihaka usoma ukati mwinci, nlakele ukati munhaleenyu uviriha mwiitthenkacaka ni mwiikurumice wiira ihikhale itthu inhala wuucerewihani. Mwaavye nipuro nihinnyakuliya ni nttipihe iraatiyu, itelevisau ni telefoone wiira cihuunyakuleni. Ulompa nhinaaya usoma unaahala wuukaviherani uvukula wuupuwela citthu cinoovahani isukhuli khula nihuku, ni wiira mooryaanihe wuupuwelela paasi Nuulumo na Nluku.—Afilipo 4:6, 7.
Nkhwererye mwacipwo ni mwiitthenkace wiira mwakomentari. Woopacera, mwaavye ucuwela mwahani untafitiya. Muupuwele itiitulu awula ikapiitulu yo mwaha untafitiya, nwehacere manannani khula mwaatiitulu cintaphulelaaya mwaha wotheene, ni mwaavye ucuwela khula ilatarato itthu ineetthucihaaya ni ntothe ucuwela isiyani impheeliya wiira mwiiweehe mmakohoni owuupusera. Vano, nsome iparaagarafu ni mphwanye waakhuliya waya nikoho no iparaagrafu. Mwaavye ni nsome iversiikulu cotheene cantikhiye ni muupuwele inanna cinlikanaaya ni mwaha untafitiinyu. (Miteko 17:11) Mwaphwanyaka waakhuliya waya, nkhwererye awula mpintari wiira nhiliyale. Ukati wonkutthaano, nyuuva pooti wunwusa moono, ni mwathanliyaka pooti ukomentari woohisoma mparaagarafuni ni woohipica pica.
Usoma myaha cotheene coovirikana cintaphuleliya khula isumana mmikutthaanoni, cinaahala wuukaviherani wuncerera “mihakhu” cinyu co ucuwela citthu combiiblyani.—Matewus 13:51, 52.
Isiyani inlamuliyeenyu upanka wiira mwiitthenkace nhinaaya urwaa onkutthaanoni?
Inannani inlamuliyeenyu wiitthenkaca wiira mwakomentari onkutthaanoni?