Atthu 8 yahoopwa ni yahokela ituniya yonaanaano

Nowee ahokela nkalawani nkhayi naamucyaawe ni inamannyo. Vano, Yehova ahotthuka nkhorooyo ni yahopacera urupa ipula. Yahorupa ipula yinci mpaka ituniya yotheene yahocara maaci. Masi ikalaweeyo yahopacera uphempa. Atthu otheene yahaakenle nkalawanimmo yahokhwa. Masi Nowee ni amucyaawe yaari ookhikiceriyeene nkalawanimmo. Woonela waa, ayo khawaattenle nrima nlattu woomwiiwelela Yehova?

Yahorupa ipula mahuku 40 uthana ni uhiyu. Vano, ipuleeyo yahaamusa. Vakaani-vakaani, maacyaayo yahopacera uvukuwa ni ikalaweeyo yaheemela waculu mwaako. Masi ntuniyani nanlelo yahaavo maaci menci. Phimaana, Nowee naamucyaawe khiyaakuvenle ukhumaca nkalawanimmo.

Vakaani-vakaani, maaci yaacanre yahowelela. Wahovikana mwaakha mmoca Nowee ni amucyaawe anari nkalawani. Vano, Yehova ahowiirela wiira pooti ukhumaca nkalawanimmo. Ukhumaca waya, yaakhalaca toko yaakelaca ituniya yonaanaano. Ukhala wiira masakha ni ikhirini caahomalamala, Nowee wamoca naamucyaawe yahotteeliya nrima nlattu wowoopoliya ni Yehova. Phimaana, yahonvaha Yehova itthuvo.

Yehova ahotteeliya venci nlattu wo iyo itthuvweeyo. Yehova ahowiirela wiira khaahala uwaana-tho maaci menci wiira akwanyulace ituniya. Uyo Ahokumihera nikhwi noopacera wiira Nowee ni amucyaawe ahiliyale wiira Yehova khaahala uwaana-tho maaci menci toko cole. Uhopaca woona nikhwi? Woonakavale nikhwi, wuupuwele itthu Yehova yanhimenryaawe Nowee

Vano, Yehova ahomwiirela Nowee wiira aayare asaana ni yincive watuniyani.