IHANTISI 42
Jonataa aari mpatthani oolipa nrima ni ookhuluvelya
Mwaana oopacera a Sawuli eehaniya Jonataa, uyo aari nakhotto oolipa nrima mpaka Davidi aheera wiira Jonataa anaakuva cinene unvikana saaka ni ahaana ikuru unvikana kharamu. Nihuku nimoca Jonataa ahowoona Mafilisteu anari waculu mwaako. Nuuyo ahomwiirela nrumiyaawe co: “Wakhalaka wiira ale mafilistewaale anaaniihana wiira nawaanane, iyo inoonihera wiira Yehova naahala unikavihera waatthema.” Iyo phiitthu yeerannyaale, Mafilisteu yahomwiihana Jonataa ni namakaviheraawe. Ayo, yaheerelaca wiira awelace wamwaakoni ni yaanace ikhotto. Ayoca yahorwaaca ni yahowiivakaca Mafilisteu 20.
Ukhala wiira Jonataa aari mwaana oopacera a Sawuli, uyo phaahala ukhala mwene yakhwaka athumwaane. Masi Jonataa ancuwela wiira Yehova ahonthanla Davidi wiira akhale mwene. Waahookhalaru commo, Jonataa khankhalela nttima Davidi. Phimaana Jonataa ni Davidi waari upatthani muulupale ni ayo yahokhuluvelihana ukhikicerana ni waakihana ukhottoni. Wiira amoonihere wiira aari mpatthani o maana, Jonataa ahonvaha ikacakwaawe, ikatanaawe, nivaka nawe ni isintu awaraawe ukhottoni.
Ukati Davidi wantthawaawe mwene Sawuli, Jonataa ahorwa unwehaweha mpatthannyaawe Davidi ni ahomphwanya. Umphwanya wawe ahomwiirela co: “Davidi, ukhale okuru ni oolipa nrima, Yehova hoothanla weeva wiira ukhale mwene, hataa apaapa anaacuwela iyo itthwiiyo.”
Jonataa aholeva ukumyaawe ikwaha cinci wiira ankavihere mpatthannyaawe. Ukati waacuwenlyaawe wiira athumwaane yaapheela umwiiva Davidi, Jonataa ahopanka yotheene yaakhitiryaawe wiira awiirihe athumwaane urukunusa moopuwelelwaaya. Vano athumwaane ucuwela waya wiira Jonataa ankavihera Davidi, yahorusiya cinene.
Uvira waya ukati, Jonataa nkhayi naathumwaane yahokhwaaca ukhottoni. Vano Davidi ahomwaavyaavya Mefiposeti mwaana a Jonataa ni ahomwiirela co: “Athumwana yaari mpatthannyaaka muulupale. Phimaana, kinaahala wuuwacera muukumini waa motheene. Unhala ukhala wapuwani waka ni unhala ulya wa meeca waka.” Davidi khanliyanle mpatthannyaawe Jonataa. Waanoocivelani ukhalana mpatthaniinyu khampa Jonataa?
“Nfentane khampa mi koofentilyaakani. Khaavo rina nifento ninci unvikana ule levile ukumyaawe wiira awoopole apatthannyaawe.”— Joau 15:12, 13