Mwapattisiyaka nnaahala uphwanya iparakha cinci!

Yesu enre wiira makristau ahaana yapattisiyaka. (Nsome Matewus 28:19, 20.) Masi mpattiso maanaaya isiyani? Ni isiyani ntthu inlamuliyaawe upanka wiira apattisiye?

1. Mpattiso maanaaya isiyani?

Nuulumo “upattisiya” nikhanle neeluuka ikereku. Nno nuulumonno maanaaya “ucuwya.” Iyo phi itthu yaamwiirannyenle Yesu ukati waapattisiyaawe mmoolokoni Jordau. Irutthwaawe yotheene yahocuweeya mmaacini. Nincuwela iyo itthwiiyo kontha Ibiiblya ineera wiira upattisiya wawe, uyo ‘ahokhuma mmaacini mmo.’ (Markus 1:9, 10) Khampa Yesu Kristu, makristau eekhweeli ukati umpattisiyaaya, irutthu yotheene inaacuweeya mmaacini.

2. Ntthu apattisiyaka nothoonyera isiyani?

Nihuku ntthu nopattisiyaawe, naathoonyera wiira uyo honvaherera ukumyaawe Yehova. Manannani ntthuuyo cineevahereraawe wa Yehova? Hinaaya upattisiya, uyo nanlompa Yehova anhimyeeraka wiira naapheela unswalela mpaka. Uyo naakhuluveliha wiira nohala unswalela Yehova paasi ni upanka itthu inoncivela Yehova phinhala ukhala itthu yofayita cinene muukumini wawe. Uyo naalakela ‘wiikhotta’ ni uhihiyerera utthara citthu ciitthucihilyaawe Yesu ni ntakihero nawe. (Matewus 16:24) Wiivaherera ni upattisiya phinonkavihera ntthu ukhalana upatthani woolipa ni Yehova ni ale anonswalela.

3. Wiira ntthu apattisiye, isiyani inlamuliyaawe upanka?

Nyuuva nhinaaya upattisiya, nhaana mpacaka ucuwela myaha ca Yehova ni umwaamini. (Nsome Maberewu 11:6.) Mwatepaka ucuwela myaha ca Yehova ni mwakhalanaka waamini, nyuuva nnaahala unfenta cinene. Vano, woohaanyihacera, nyuuva nnaahala upheela uwiitthuciha atthu myaha cawe ni upanka citthu cinoncivela ni unyema citthu cinonrusa. (2 Timotiyu 4:2; 1 Joau 5:3) Ntthu eekurumicaka ukhalana ‘meettelo omaana’ uhoolo wa Yehova, uyo atthunaka naahala upheela uvaherera ukumyaawe ni upattisiya. (Akolosu 1:9, 10).a —Moone niwehero.

MUNCERERE WIITTHUCA WINYU

4. Mpattiso wa Yesu unaaniitthuciha citthu cinci

Nsome Matewus 3:13-17 wiira ncuwele citthu cinniitthucihaaya mpattiso wa Yesu. Mwamalihaka usoma, moopele mwaha ala makohwaala:

• Niireke Yesu aapattisiye nari mwanhima?

• Manannani caapattisiyaawe? Niireke aacile unaanihiya nimaaci vakaani mmuru wawe?

Yesu upattisiya wawe, uyo ahancera uvara nteko wootepa ukhalana ifayita waavahiyaawe ni Nluku. Nsome Luka 3:21-23 ni Joau 6:38. Mwamalihaka usoma, moopele mwaha nna nikohonna:

• Yesu upattisiya wawe, ntekoni waatepaawe uhoolelihera muukumini wawe?

5. Waanaakhitirya nyuuva upattisiya

Wiivaherera wa Yehova ni upattisiya nyuuva pooti woonaka ukhala nrintti muulupale. Masi mwaahihiyerereke wiitthuca myaha cawe ni weettela citthu cineetthuceenyu, nyuuva khunhala wuurikelani upanka iyo itthu yootepa ukhalana ifayiteeyo. Moone mananna atthu akhwaawe cikhitinryaaya upanka iyo itthwiiyo. Moone IVIDIYU.

IVIDIYU: Manannani cinlamuliyeehu ulipihaca upatthaniihu ni Yehova? (1:11)

Nsome Joau 17:3 ni Tiyaku 1:5. Mwamalihaka usoma, moopele mwaha nna nikohonna:

• Isiyani inhala unkavihera ntthu wiitthenkaca wiira apattisiye?

1. Hiiva nineevaherera wa Yehova namwiirelaka wiira nimpheela unswalela uyova mpaka

2. Nihuku nimpattisiyeehu, ninawaathoonyihera atthu wiira nihonvaherera ukumiihu Nluku

6. Napattisiyaka vale ninaapanka mphantte waamuci a Yehova

Napattisiyaka vale, hiiva ninawancera upanka mphantte waamuci o waataana amphwanyannya ntuninyani motheene. Hataa niphwanyannyaaka ilaponi awula nikhalaka okhapilani, otheene cihu ninaamini citthu cimocaaru ni ciicammo nineewelela malamulo a Nluku mamocaaru. Nsome Isaalimu 25:14 ni 1 Peturu 2:17. Mwamalihaka usoma, moopele mwaha nna nikohonna:

• Ntthu apattisiyaka, inannani yoopatthani unkhalanaawe ni Nluku ni ale anonswalela?

UTHIKILELA

Yesu heetthuciha wiira makristau ahaana yapattisiyaka. Masi wiira ntthuuyo apattisiye, haana umwaamini Yehova, unyema citthu cinonrusa ni wiivaherera.

Wuupuwela

• Mpattiso isiyani ni kontha isiyani urinaaya ifayita?

• Wiivaherera unvaranaca cani nimpattiso?

• Citthuni cinlamuliyaawe upanka ntthu hinaaya wiivaherera wa Yehova ni upattisiya?

MWAPHEELAKA UCUWELA CITTHU CIKIINA

Mwiitthuce mpattiso isiyani ni isiyani uhikhanlyaaya.

“Mpattiso isiyani?” (Mwaha umphwanyannya nsayitini jw.org)

Nsome citthu cinlamuliyaawe upanka ntthu wiira apattisiye.

“Unfenta ni unsukhuru Yehova unansovenriha ntthu upattisiya” (Ukhalenla, yo Março yo 2020)

Nsome ihantisi ya nlopwana mmoca aalakenle upattisiya kahi nlattu wo wiiwa paasi.

“Ayo yaapheela wiira kooneleleke ikhweeli co mbiiblyani imwaneennyaaka” (Ukhalenla, 1 yo Fevereiro yo 2013)

Mwiitthuce nlattuni unaareera upattisiya ni manannani cinlamuliyeenyu wiitthenkaca wiira mpattisiye.

“Kihaana kipattisiyaka?” (Os Jovens Perguntam — Respostas Práticas, Volume 2, ikapiitulu 37)