Umwene wa Nluku isiyani?

Itthu yootepa ukhalana ifayita inoolumaaya Ibiiblya ukhanle Umwene wa Nluku. Yehova naahala uvarela nteko uyo umwennyooyo wiira ituninya yotheene akhalihe ipeephoni. Masi uyo umwennyooyo ikhanle isiyani? Nincuwela cani wiira uyo umwennyooyo uneera ulamulelaka? Uyo umwennyooyo isiyani ipankilyaaya? Ni isiyani uyo umwennyooyo unhalaaya upanka wahoolo? Nhina ula mpanttoola ni unttharana, anaahala waakhuliya ayo makohwaayo.

1. Umwene wa Nluku ikhanle isiyani, ni tipani khanle Mwene o uyo umwennyooyo?

Umwene wa Nluku ikhanle ikuvernu itthonkomanihilyaawe Yehova. Yesu Kristu phiri Mwene, ni uyo neera alamulelaka naryeene wiirimu. (Matewus 4:17; Joau 18:36) Ibiiblya ineera wiira Yesu ‘phinhala ukhala Mwene mpaka.’ (Luka 1:32, 33) Ukhala wiira Yesu phiri Mwene o Umwene wa Nluku, uyo naahala waalamulela atthu otheene anhala uphwanyannya va watuninyani va.

2. Phaapani anhala ulamulela ni Yesu?

Yesu khanlamulela veekha. Atthu “o mahimo otheene, iluuka cotheene, apoovu otheene ni olapo cotheene . . . anaahala ulamulela ituninya” wamoca nuuyova. (Apokalipise 5:9, 10) Atthu anhala ulamulela ni Yesu Kristu anhala ukhala akavi? Ikhumelo Yesu waawilyaawe va watuninyani va, atthu imiliyau cene ahokhala makristau. Masi niireke wiira otheene ayo anaahala ulamulela nuuyova? Mena. Atthu 144.000 paahi phinrwaa wiirimu wiira yalamulele nkhayi ni Yesu. (Nsome Apokalipise 14:1-4.) Makristau akiinaayo anhala ukhala apoovu a Nluku anhala ukhala va watuninyani va.—Isaalimu 37:29.

3. Kontha isiyani Umwene wa Nluku phiri womaana uvikana ikuvernu ca apinaatamu?

Ahooleli okuvernu ca apinaatamu hataa yapheelaka upanka citthu comaana, kharina ikuru yoopanka citthu cotheene cimpheelaaya. Ni unaaphiyaka ukati unaakakhanihiyaaya ninhooleli nkhwaawe. Masi nhooleli o Umwene wa Nluku, Yesu, khanhala waakakhanihiya ni mwene nkhwaawe. Nluku ‘hotikitherya Umwene uhinhala utankanyiya.’ (Daniele 2:44) Yesu naahala ulamulela ituninya yotheene ni naahala waawacera ratta atthu otheene, woohaathanla. Uyo khanle nanifento, namaana ni nasariya. Ciicammo, uyo naahala uwiitthuciha atthu utafitana toko cinaatafityaawe: ninifento, nuunamaana ni niisariya. —Nsome Isaiya 11:9.

4. Umwene wa Nluku unaahala ulamulela ituninya yotheene

Ikuru irinaawe Yesu yoolamulela khinlikananiya niikuru ya nhooleli nkhwaawe pacile ukhala wa watuninyani va. Nsome Matewus 28:18, ni mwamalihaka usoma, moopele mwaha nna nikohonna:

• Ikuru irinaawe Yesu yoolamulela invirikana cani niikuru irinaaya ahooleli aapinaatamu?

Ikuvernu ca apinaatamu cinawaakakhanihiyaka. Ni khula ikuvernu irina ncokwaaya woolamulela va watuninyani va. Vano Umwene wa Nluku unhala ulamulela cani? Nsome Daniele 7:14, ni mwamalihaka usoma, moopele mwaha ala makohwaala:

• Kontha isiyani unaareera ucuwela wiira Umwene wa Nluku “khunhala utankanyiya”?

• Kontha isiyani unaareera ucuwela wiira uyo umwennyooyo unaahala ulamulela ituninya yotheene?

5. Ikuvernu ca apinaatamu cihaana caakakhanihiyaka

Kontha isiyani Umwene wa Nluku umpheelaaya waakakhaniha ikuvernu ca apinaatamu? Moone IVIDIYU, ni mwamalihaka woona, moopele mwaha nna nikohonna:

IVIDIYU: Umwene wa Nluku isiyani?— Ividiyu yoothikileliya (1:41)

• Citthuni cinkhumelela nlattu ila ituninyeela woolamuleliya niikuvernu ca apinaatamu?

Nsome Eklesyaste 8:9, ni mwamalihaka usoma, moopele mwaha ala makohwaala:

• Nyuuva woonela winyu, Umwene wa Nluku khweeliini uhaana waakakhanihaka ikuvernu ca apinaatamu? Kontha isiyani?

6. Umwene wa Nluku urina ahooleli ancuwela masakha arineehu

Mweneehu Yesu hopaca ukhala va watuninyani va niirutthu yeepinaatamu. Phimaana, uyo naacuwela “uhiicoorya wihu.” (Maberewu 4:15) Uhiya commo, Yehova aathanlile atthu 144.000, alopwana ni athiyana ookhuluvelya wiira yalamulele ni Yesu. Ayo akhanle atthu “o mahimo otheene, iluuka cotheene, apoovu otheene ni ilapo cotheene”.—Apokalipise 5:9.

• Nneecoona cani ucuwela winyu wiira Yesu ni ale anhala ulamulela wamoca nuuyova anaacuwela masakha arineehu? Kontha isiyani?

7. Malamulo o Umwene wa Nluku akhanle omaana uvikana malamulo okuvernu cotheene ca apinaatamu

Ikuvernu ca apinaatamu cinaakumihera malamulo wiira caakavihere ni caakhikicere apoovu. Umwene wa Nluku ciicammo uhaana malamulwaaya. Nsome 1 Akorintu 6:9-11, ni mwamalihaka usoma, moopele mwaha ala makohwaala:

• Nyuuva woonela winyu, ila ituninyeela yaahala ukhala cani unari wiira atthu otheene anawiiwelela malamulo a Nluku?a—Moone niwehero.

• Nyuuva woonela winyu, Yehova haana isariya yoopheela uwoona atthu yiiwelelaka malamulo o umwennyaawe? Kontha isiyani?

• Isiyani inthoonyera wiira atthu ahineewelela ayo malamulwaayo pooti ukhitiri urukunusa mirima caya?—Moone iveerusu 11.

UTHIKILELA

Umwene wa Nluku ikhanle ikuvernu yokhweeli itikitheriye wiirimu inhala ulamulela ituninya yotheene.

Wuupuwela

• Ahooleli okuvernu ya Nluku phaapani?

• Kontha isiyani Umwene wa Nluku ukhanlyaaya ikuvernu yomaana uvikana ikuvernu cotheene caapinaatamu?

• Isiyani Yehova impheelaawe wiira apanke ale ampheela ulamuleliya nuumwennyaawe?

MWAPHEELAKA UCUWELA CITTHU CIKIINA

Moone nipuro nihimilyaawe Yesu wiira phitikitheriyaaya Umwene wa Nluku.

“Umwene wa Nluku ikhanle itthu irinaawe ntthu wanrimani wawe?” (Mwaha umphwanyannya nsayitini jw.org)

Kontha isiyani Masaahiti a Yehova anoonaaya ukhala itthu yootepa ukhalana ifayita uhoolelihera wiiwelela malamulo o Umwene wa Nluku kahi okuvernu ca apinaatamu?

Mayoovaresesa Umwene wa Nluku (1:43)

Moone itthu inhimyaaya Ibiiblya iwaacaka atthu 144.000 anaathanlaawe Yehova wiira yalamulele ni Yesu.

“Tipani norwaa wiirimu?” (Mwaha umphwanyannya nsayitini jw.org)

Athiyana amoca anari nkhattya, isiyani yaakupalihile wiira Nluku paasi phinhala ukhitiri umalamaliha citthu coohinamaana cimpankiya va watuninyani va?

“Waavya waka ituninya yoohipankiya citthu coohinamaana” (Despertai!, yo Novembro yo 2011)