MWAHA WOOSOMIYA 7

Ncuweleehe ukhulupale urinaaya mahumu wanlokoni

“Kristu [khanle] nhooleli o wanlokoni, ni moopoli o ila irutthwiila.”—EFESU 5:23.

NINHALA WIITTHUCANI?a

1. Itthuni imoca inaakavihera apoovu a Yehova ukhala owaatanaca?

HIIVA unaanitteela nrima cinene nlattu wookhala iriyari yaapoovu a Yehova. Kontha isiyani hiiva ninkhaleehu ninnema ni naatanacaka? Itthu imoca, ukhalaka wiira otheene ninawiikurumica wiira naahisime ale Yehova aavahacenryaawe ukhulupele. Khweeliini, nacuweleehaka saana nlattuni Yehova tthenkacilyaawe wiira ukhale uhoolela, phintepeehu ukhala owaataana.

2. Makohoni anhaleehu waakhula nhina ula mwahoola?

² Nhina ula mwahoola, ninaahala wiitthuca tipani rina ukhulupale wanlokoni. Ciicammo ninaahala waakhula ala makohwaala: Ntekoni Yehova waavahilyaawe asirokorihu wanlokoni? Niireke wiira wanlokoni khula nlopwana nanhoolela khula nrokorihu? Niireke ukhulupale urinaaya mahumu unaalikaana nuukhulupale urinaaya ahooleli itthoko? Nttwee nipacere woona mananna cinlamuliyeehu waawehera asirokorihu o wanlokoni.

NINLAMULIYA WAAWEHERA CANI ASIROKORIHU O WANLOKONI?

3. Isiyani inhala unikavihera utepa ulemeliha nteko unvaraaya asirokorihu o wanlokoni?

³ Hi ninawaalemeliha cinene asirokorihu o wanlokoni aneekurumica waawacera saana amucyaaya, ulalyeera ihapari comaana ni ukavihera nloko. Nhina ula mwahoola, ninaahala wuupuwela mananna Yehova ni Yesu cinaaweheraaya asirokorihu o wanlokoni ni ciicammo ninaahala woona mananna Paulu caaweheraawe athiyana. Iyo inaahala unikavihera utepa waalemeliha asirokorihu.

4. Ibiiblya inthoonyera cani wiira Yehova nawaalemeliha alopwana ni ciicammo athiyana?

⁴ Ibiiblya inthoonyera wiira Yehova nawaalemeliha alopwana ni athiyana. Muupuwele itthu yaakhumelenle ukati wo maapostolu. Alopwana ni ciicammo athiyana yahaakhela nnepa wowaarya wa Yehova wiira apanke mitikhiniho, toko wuuluma iluuka cinci. (Mite. 2:1-4, 15-18) Alopwana ni athiyana yahothanliya ni nnepa wowaarya wiira arwee yalamulele wamoca ni Kristu wiirimu. (Akalas. 3:26-29) Ni alopwana ni athiyana anaahala uvahiya iparakha yookhalana ukumi woohimala watuninyani. (Apoka. 7:9, 10, 13-15) Alopwana ni athiyana ahovahaceriya nteko woolalyeera ni wiitthuciha ihapari comaana. (Mat. 28:19, 20) Wootakihera, ilivuru yo Miteko inawuuluma nteko womaana waavanryaawe nrokorihu mmoca eehaniya Pirisila. Uyo wamoca naawannyawe, Akila, yahonkavihera wiiweeha ratta ikhweeli nlopwana oocuwelaca eehaniya Apoolu.—Mite. 18:24-26.

5. Toko cinthoonyeraaya Luka 10:38, 39, 42, Yesu aawehera cani athiyana?

⁵ Yesu aanawaahisima athiyana. Yesu khaari toko ahooleli ottiini mafarisewu o ule uwakatyuule. Ayo alopwanaayo khayaawoona athiyana ukhalana ifayita. Khayaapheela uwuulumana waatthuni, ni mpaka yaanaakhotta woopela mwaha Cowantikhiya Cowaarya wamoca naathiyana. Masi Yesu khaawoopana myaha ca Nluku alopwana paasi, masi hataa ciicammo athiyana uyo aanaawoopanaka nnyo myahannyo.b (Nsome Luka 10:38, 39, 42.c) Yesu aanaatthuna wiira athiyana antthare mapuro yaalalyeeraawe. (Luka 8:1-3) Ni mpaka Yesu ahaava athiyana iparakha yowaahimyeera maapostolu wiira uyova ahonwelelihiya.—Joau 20:16-18.

6. Apostolu Paulu aathoonyenre cani wiira aanawaahisima athiyana?

⁶ Apostolu Paulu ahomuupusera Timotiyu wiira ahaana aattitthimihaka athiyana. Paulu ahomwiirela Timotiyu wiira aalamuliya waawacera athiyana owuuluvala khampa miyanumwaane, ni athiyana amirawo khampa miyanuunwaawe. (1 Tim. 5:1, 2) Paulu ahonkavihera Timotiyu ukhala nkristau ookhomaala, masi uyo ankupali wiira anumwaane ni apiipyaawe Timotiyu phaapacenre umwiitthuciha Timotiyu “cowantikhiya cowaarya.” (2 Tim. 1:5; 3:14, 15) Nhina iwarakha Paulu yaawantikhenlyaawe arooma, uyo ahaasalaamiha athiyana o wanlokoni enci, aromolaka macinaaya. Paulu khaacile woona paasi miteko caavanryaaya ayo athiyanaayo, masi uyo aheekurumica wuuluma itthu yaahala uthoonyera wiira anttottopela cinene nteko waavaraaya.—Aroo. 16:1-4, 6, 12; Afili. 4:3.

7. Makohoni ampheeleehu waakhula?

⁷ Iparaagarafu cisomileehu mpaka va, cihoniitthuciha wiira Ibiiblya khinthoonyera wiira alopwana phirina ifayita cinene waapwaha athiyana. Asirokorihu akhanle atthu oofenta, oovaha ni ikhanle iparakha yuulupale waakhalana ayo asirokorihwaayo wanlokoni. Mahumu anawaakhuluvela asirokorihu wiira akavihere ukhala nnema ni wiiwananiya wanlokoni. Masi nanlelo ahaavo makoho ninlamuliyeehu waakhula. Toko ala: Nlattuni Yehova unrumaawe wiira ukati nkiina, athiyana ahaana yakhuneelaka muru? Nlattu woothanliya ukhala mahumu awula arumiya o wanlokoni, niireke khula munna o wanlokoni khanle nhooleli o khula nrokorihu?

NIIREKE WANLOKONI KHULA NLOPWANA NANHOOLELA KHULA NROKORIHU?

Yesu howunkoma wahiceni wawe wiirimu, amwaleeliyaka nuuttitthima wa Yehova. Vathi wawe, cihaawo ilatarato cinthoonyera upankiyaka nkutthaano wanlokoni, upankiyaka uswali waamuci ni nrokorihu asomaka Ibiiblya veekha. Nnyo citthunno cinhimyaciya nhina iparaagarafu 8 ni iparaagarafu 11 mpaka 14.

8. Toko cinthoonyeraaya Efesu 5:23, niireke khula munna o wanlokoni khanle nhooleli o khula nrokorihu? Ntaphulele.

⁸ Woohincivihaca, waakhuliya waya ukhanle ‘mena’! Kristu paahi phiri nhooleli aasirokorihu otheene o wanlokoni. (Nsome Efesu 5:23.d) Watthokoni, nlopwana hovahaceriya waahoolela amwaarawe. Mwaana mwanlopwana oopattisiya khanakhala nhooleli aanumwaane. (Efesu 6:1, 2) Ni wanlokoni, ukhulupale urinaaya mahumu wiira yaahoolele mayamunna, uhaana mpika. (1 Atesal. 5:12; Mabere. 13:17) Nrokorihu oohitheliya hiile ukhala naasithumwaane, nanlelo naahala waahisima asithumwaane ni mahumu. Masi nhoolelyaawe khanle Kristu, toko ciryaaya alopwana otheene o wanlokoni.

Nrokorihu asomaka Ibiiblya veekha. — Athupa ahiile ukhala naasithumwanaya anhooleliya ni Yesu (Nwehe iparaagarafu 8)

9. Kontha isiyani imaara cikiina asirokorihu unlamuliyaaya ukhuneela muru?

⁹ Hataa ukhalaka commo, Yehova haathanla alopwana wiira ahoolele wanlokoni. Uyo khaavahile athiyana uyo ukhulupalyooyo. (1 Tim. 2:12) Kontha isiyani? Uyo pankile iyo, kontha nopheela wiira nloko nihihiyerere ukhala noothotokannya, khampa cinvahacenryaawe Yesu wiira akhale nhooleli a nlopwana. Pooti ukhumelelaka itthu inhala umwiiriha nrokorihu uvara nteko waalamuliyaawe uvara nlopwana. Yakhumelelaka iyo, Yehova nopheela wiira uyo nrokorihuuyo akhuneela muru.e (1 Akor. 11:4-7) Khunakhala wiira Yehova nopheela iyo itthwiiyo nlattu woowoona alopwana ukhalana ifayita waapwaha athiyana. Masi uyo nopheela waakavihera athiyana wiira ahisime ukhulupale uvahacenryaawe. Vano, nttwee naakhule nna nikohonna: Ahooleli itthoko ni mahumu arina ukhulupaleni?

UKHULUPALE URINAAYA AHOOLELI ITTHOKO NI MAHUMU

10. Isiyani inhala umwiiriha humu ukumihera malamulo wanlokoni?

¹⁰ Mahumu ananfenta Kristu ni anaafenta ikhonthwaa civahaceriyaaya ni Yehova ni Yesu wiira awacere. (Joau 21:15-17) Masi nlattu humu o wanlokoni woopheela uhoolela nloko, uyo pooti wuupuwela wiira khanle toko nyari uhoolo wo mayamunna. Uyo pooti wuupuwela co: ukhala wiira nyari naakumihera malamulo wiira aakhikicere amucyaawe, humu ciicammo pooti ukumihera malamulo wiira akhikicere nloko. Uhiya commo, woohicuwelela, mayamunna akiina pooti umwiiriha humu upanka iyo itthwiiyo. Wootakihera: ayo mayamunnaayo yapheelaka ulakela upanka itthu, anonlepela humu wiira aahimerye itthu yoohala upanka. Masi niireke ukhulupale urinaaya mahumu unaalikaana nuukhulupale urinaaya ahooleli itthoko?

Humu ataphulelaka mwaha unkutthaanoni wo wanlokoni. — Mahumu anawaakavihera mayamunna o wanlokoni ukhalana upatthani woolipa ni Yehova ni anawaathoonyera wiira anawaafenta. Yehova haavahacera mahumu nrintti wo waakumiha wanlokoni atthu anvara matampi ahinttharuwa (Nwehe iparaagarafu 11-12)

11. Manannani cinlikanacaaya ukhulupale urinaaya ahooleli itthoko ni ukhulupale urinaaya mahumu o wanlokoni?

¹¹ Apostolu Paulu hohimya mananna cinlikanacaaya ukhulupale urinaaya ahooleli itthoko ni ukhulupale urinaaya mahumu o wanlokoni. (1 Tim. 3:4, 5) Wootakihera, Yehova nopheela wiira asaana awiiwelele mayapaapaaya. (Akol. 3:20) Inanna imocaaru, uyo nopheela wiira mayamunna o wanlokoni awiiwelele mahumu. Yehova noweherera wiira ahooleli itthoko ni hataa mahumu, yaakavihere ale anaahoolelaaya ulipihica waamini urinaaya. Uyo ciicammo noweherera wiira yaathoonyere wiira anawaafenta. Ni toko cimpankaaya ahooleli itthoko omaana, mahumu ciicammo anawaakavihera mayamunna yaakhumelenle masakha. (Tiya. 2:15-17) Uhiya commo, Yehova nopheela wiira mahumu o wanlokoni ni ahooleli itthoko yaakavihere akhunanaya wiiwelela malamulwaawe. Masi ciicammo, uyo nawaahimerya ayo wiira ‘ahihiye weettela citthu cantikhiye’ mbiiblyani.—1 Akor. 4:6.

Munna ahoolelaka uswali waamuci. — Ahooleli itthoko ahovahaceriya ni Yehova nrintti wo waahoolela amucyaaya. Hinaaya ulakela itthu, nhooleli itthoko oofenta, nopaca waaleehananaamwaarawe (Nwehe iparaagarafu 13)

12-13. Toko cinthoonyeraaya Arooma 7:2, ukhulupale urinaawe nhooleli itthoko unvirikana cani ni ukhulupale urinaawe humu?

¹² Masi, ukhulupale urinaaya mahumu o wanlokoni ciicammo unaavirikana ni ukhulupale urinaaya ahooleli itthoko. Wootakihera, Yehova haavahacera mahumu nrintti wookhala toko masuwiisi, ni ayo pooti waakumiha wanlokoni atthu anvara matampi ni ahinttharuwa.—1 Akor. 5:11-13.

¹³ Wiikiina, Yehova honvahacera nhooleli itthoko ukhulupale uhaavahacenryaawe mahumu. Wootakihera, uyo nanvaha nyari ukhulupale wiira akumihere malamulo oohala utthariya wapuwani ni uruma wiira ayo malamulwaayo yeetteliye. (Nsome Arooma 7:2.f) Toko co: nhooleli itthoko haana isariya yoolakela iwoorani asaanaawe inlamuliyaaya uturuwela wapuwani weelaka. Ni wakhalaka wiira asaanaawe khantthara nno nlamulonno, uyo haana isariya yo waattarusa. (Efesu 6:1) Masi nhooleli itthoko oofenta, nopaca waaleehanana amwaarawe hinaaya ukumihera nlamulo; kontha ooyeeli akhanle “irutthu imoca.”g—Mat. 19:6.

MUNHISIME KRISTU KHANLE NHOOLELI O NLOKO NEEKRISTAU

Yesu howunkoma wahiceni wawe wiirimu, amwaleeliyaka nuuttitthima wa Yehova. — Yesu nohooleliya ni Yehova,masi uyo phinhoolela nloko (Nwehe iparaagarafu 14)

14. a) Toko cinthoonyeraaya Markus 10:45, kontha isiyani Yehova haana isariya yonvahacera Yesu uhoolela nloko? b) Ntekoni uvahaceriyaaya Mphwinko wo Mahumu Unhoolela? (Nwehe ikwaaturu “Nteko wo Mphwinko wo Mahumu Unhoolela.”)

¹⁴ Nlattu Yesu wo wiivaherera wiira anoopole, Yehova honthuma khula ntthu o wanlokoni ni khula ntthu nohala upheela ukhala ntthari a Kristu. (Nsome Markus 10:45;h Mite. 20:28; 1 Akor. 15:21, 22) Ukhala wiira Yesu hovaha ukumyaawe wiira anoopole, uyo haana isariya yoothanliya ni Yehova wiira akhale nhooleli o nloko no makristau. Ukhala wiira khanle nhooleliihu, Yesu haana isariya yookumihera malamulo anhimya isiyani khula ntthu, khula itthoko ni khula nloko inlamuliyaaya upanka. Ni uyo haana isariya yooniruma weettela ayo malamulwaayo. (Akalas. 6:2) Masi uhiya paahi unihelela malamulo, ihaavo itthu ikhwaawe Yesu impankaawe. Uyo naanivaha iyoolya yoominepani ni naaniwacera ninifento otheene cihu.—Efesu 5:29.

Nteko wo Mphwinkowo Mahumu Unhoolela

Mayamunna o Mphwinko wo Mahumu Unhoolela khanakhala asineene waamini wihu. (2 Akor. 1:24) Ayo anawaamini wiira Yesu Kristu phinhooleli nloko no makristau, ni anawaamini ni nrimaaya wotheene itthu Yesu yaawiirenlyaawe attharyaawe: “Otheene cinyu nkhanle mayamunna.” (Mat. 23:8) Ukati yooyo, ayo anawaafenta cinene mayamunna ni anawiikurumica waawacera. Yahooleliyaka ni Yesu Kristu, mayamunna o Mphwinko wo Mahumu Unhoolela anaavaha malakihero ofayita wiira yaathotokanihe apoovu a Yehova ntuninyani motheene. Ayo phinaathanla Mahumu Anhoolela Ipeteli ni mamootoli osirikwiitu. (Efesu 4:7-13) Mamootoli osirikwiitu phinaathanla mahumu o mmalokoni. (Mite. 14:23; Titu 1:5) Mayamunna o Mphwinko wo Mahumu Unhoolela ciicammo anaalemeliha nrintti urinaaya wowaavaha apoovu a Nluku iyoolya yoominepani ni malakihero o mbiiblyani. Ayo ampanka iyo, yaveleeliheraka iwarakha ni yakumiheraka ilivuru, iporokaraama co TV JW, mmacikolani coomwene, mmamikutthaanoni, mmakonkereesuni ni mmamithukumanoni cosirikwiitu. (Mite. 15:22-35) Cakhumelelaka ihasara ni masankiho makhwaawe, mayamunna o Mphwinko wo Mahumu Unhoolela anaathoonyera mananna cinaafentaaya mayamunnaaya. Cakhumelelaka nnyo citthunnyo, ayo mayamunnaayo woopica anaapanka itthu wiira yaakavihera mayamunna.j

15-16. Citthu cuulumalyaawe nrokorihu neehaniya Marley ni munna mmoca neehaniya Benjamin ciwiitthucihileni isiyani?

¹⁵ Kristu phaavahacenre alopwana wiira yaahoolele athiyana. Phimaana, asirokorihu yattharaka malakihero anvahiyaaya naayo alopwanaayo, anthoonyera wiira ananhisima Kristu. Nrokorihu mmoca nokhala u Estados Unidos neehaniya Marley, naathikilela ahimyaka itthu inoopuwelaaya athiyana makristau enci. Uyo neera: “Nrintti uvahaceriyaaka wookhala nthiyana ootheliya ni o wanlokoni, unaakicivela venci. Mi nanlelo kihaana kiikurumicaka wiira kiwehere ratta ukhulupale Yehova utthenkacilyaawe. Masi awannyaka ni hataa mayamunna o wanlokoni, khula ukati anaakihisima ni anaakisukhuru nlattu wo miteko cotheene cinvaraaka. Iyo inaakikavihera wiira uhikirike ukhala nthiyana owiiwelela.”

¹⁶ Mayamunna yaahisimaka asirokorihu o wanlokoni, ayo alopwanaayo anthoonyera wiira anaacuweleeha ukhulupale Yehova utthenkacilyaawe. Munna mmoca nokhala u Inglaterra neehaniya Benjamin, neera: “Ikomentaariyu cinvahaaya asirokorihu umikutthaanoni co wanlokoni, cinaakiitthuciha cinene. Ni asirokorihu o wanlokoni anaavaha miruku comaana cinonkavihera ntthu ucuwela usoma Ibiiblya ni ukhala namalalyeera omaana. Miteko cotheene cinvaraaya wanlokoni cikhanle cofayita.”

17. Nlattuni otheene cihu ninlamuliyeehu uhisima ukhulupale utthenkacilyaawe Yehova?

¹⁷ Atthu o wanlokoni otheene—alopwana, athiyana, ahooleli itthoko ni mahumu—otheene yacuweleehaka ni yahisimaka ukhulupale utthenkacilyaawe Yehova, ninaakhala nnema wanlokoni. Itthu yuulupale cinene, ukhalaka wiira ninawaattottopela Apaapeehu onifento, Yehova.—Isaa. 150:6.

NCIPO 123 Obedecemos a Jeová e à Sua Organização

a Ntekoni Yehova waavahilyawe asikorihu wanlokoni? Niireke wiira wanlokoni khula nlopwana nanhoolela khula nrokorihu? Niireke ukhulupale urinaaya mahumu unaalikaana nuukhulupale urinaaya ahooleli itthoko? Nhina ula mwahoola, ninaahala woona mananna Ibiiblya inaakhulaaya ala makohwaala.

b Nwehe iparaagarafu 6 nhina mwaha woosomiya uneera “Mwaakavihere asirokorihu o wanlokoni,” nrevistani Ukhalenla yo Setembro 2020.

c Luka 10:38 Yeettakoono, yahophiya aliteeya amoca. Uphiya waya ayo aliteeyaayo, nthiyana mmoca eehaniya Marta ahowaakhelela uwannyawe. 39 Uyo nthiyanooyo ahaana mwaamunnawe, eehaniya Mariya, onkomale uhoolo wa Apwiiya aviriyanaka citthu caahimyaaya. 42 “Masi citthu vakaani paahi cinaatosa, awula itthu imoca paahi. Masi Mariya thanlale itthu yomaana, ni uyo khanhala waakhiya itthu ithanlalyaawe.”

d Efesu 5:23 Kontha ntheli khanle nhooleli aamwaarawe, toko Kristu ciryaawe nhooleli o wanlokoni, ni moopoli o ila irutthwiila.

e Nwehe ikwaaturu ineera “Ukatini nrokorihu nolamuliyaawe ukhuneela muru?”

f Arooma 7:2 Wootakihera, nlamulo ninhimya wiira nthiyana ri wamoca naawannyawe, ayo anaryeene akumi; masi awannyawe yakhwaaka vale, nlamulo ninantaphula.

g Wiira ncuwele-tho tipani rina ukhulupale woohala ulakela nlokoni amuci ninlamuliyaaya urwaa, nwehe iparaagarafu 17 mpaka 19 nhina mwaha woosimiya uneera “Munhisime khula ntthu wanlokoni na Yehova,” nrevistani Ukhalenla yo Agosto, 2020.

h Markus 10:45 Kontha hataa Mwaana a Apinaatamu howa, kahi wiira avareliye nteko, masi wiira aavarele nteko akhwaawe ni avahe ukumyaawe wiira awoopole atthu enci.

i Mwapheela usomeeha ula mwahoola, nwehe ilivuru “Mantenha-se no Amor de Deus,” ipaagina 209-212.

j Mwapheela ucuweleeha nteko unvaraaya Mphwinko wo Mahumu Unhoolela, nwehe irevista Ukhalenla 15 yo Julho 2013, ipaagina 20 mpaka 25 (yeekunya).