MWAHA WOOSOMIYA 44
Nlipihace niweherero ninyu
“Weeva ukhanle niweherero naka.”—ISAA. 27:14.
NCIPO 144 Pensa nas Bênçãos de Jeová
NINHALA WIITTHUCANI?a
1. Niwehereroni Yehova ninnivahaawe?
YEHOVA honivaha niweherero nomaana nookhalana ukumi woohimala wahoolo. Ahaavo anhala uvahiya ukumi woohimala wiirimu woohiweherera-tho ukhwa. (1 Akor. 15:50, 53) Masi atthu akhwaawe anweherera ukhala watuninyani nuukumi womaana ni yatteeliyaka nrima mpaka. (Apoka. 21:3, 4) Niweherero nihu nihaana ifayita, hataa ukhalaka wiira ninweherera urwaa ukhala wiirimu awula watuninyani.
2. Niweherero nihu ninlipiheriya niisiyani, ni nlattuni nineereehu commo?
2 Mbiiblyani, weeriyaka “niweherero” cinaaciya citthu comaana cinweherereehu wiirannya. Ni hiiva pooti wankhuluveleehu wiira citthu cinweherereehu wiirannya wahoolo khweeliini cinaahala wiirannya, kontha Yehova phinikhuluvelihale. (Aroo. 15:13) Hi ninaacuwela citthu cikhuluvelihilyaawe ni ninaacuwela wiira khanhiya wiirannyeeha citthu cinoolumaawe. (Manu. 23:19) Hi ciicammo ninaakhuluvela wiira Yehova naapheela cinene upanka nnyo citthunnyo ni haana ikuru wiira akhitiri upanka citthu cotheene cuulumalyaawe wiira naahala upanka. Niweherero nihu khinakhala itthu yowoothiya awula khinakhala itthu inoopuweleehu mmuru wihu paahi. Niweherero nihu nikhanle nookhuluvelya, kontha ninlipiheriya nicitthu ceekhweeli.
3. Ninhala wiitthucani nhina ula mwahoola? (Nwehe Isaalimu 27:14.)
3 Apaapeehu o wiirimu anaanifenta ni ampheela wiira naakhuluvele. (Nsome Isaalimu 27:14.b) Nankhuluvelaka Yehova ni niweherero nihu nakhalaka noolipa, ninaakhitiri uvilela masankiho nilipaka nrima ni nitteeliyaka, ni khaninoova masakha anhala unikhumelela wahoolo. Nhina ula mwahoola, ninaahala wiitthuca manannani niweherero nihu ninnikhikiceraaya. Masi woopacera, nttwee noone manannani niweherero nihu ninlikanacaaya ninankura ni niikapaseeti. Noopelaka mwaha iyo itthwiiyo, ninaahala woona mananna ninlamuliyeehu ulipihaca niweherero nihu.
NIWEHERERO NIHU NINKHALA KHAMPA NANKURA
4. Manannani niweherero nihu ninlattanacaaya ninankura? (Nwehe Maberewu 6:19.)
4 Nhina iwarakha apostolu Paulu yaawantikhenlyaawe maberewu, uyo aholattaniha niweherero nihu ninankura. (Nsome Mabarewu 6:19.c) Paulu aaneettaka niikalawa ni ancuwela wiira anankura yaanaavareliya nteko wiira ikalawa ihiveverusiye niiphyoo. Nkwaha mmoca, Paulu aari mpaketini ni yahancera uwuka iphyoo yinci. Uyo ukatyuuyo, apostolu Paulu ahowoona atthu yeettiha ikalawa yaattikhelaka anankura mpahari wiira ikalawa ihiveverusiye yiipwesanihaka nimaluku. (Mite. 27:29, 39-41) Toko nankura, niweherero nihu ninaanilipiha, ninaanikavihera wiira nihihapuwe munnttalani wa Yehova ni nihikhale nihicuwelaka cowiira yanikhumelelaka masakha. Niweherero nihu nakhalaka noolipa, ninaanikavihera uvilela masakha oorika muukumini wihu, kontha ninaakhuluvela wiira woohipica, ayo masakhaayo anaahala umalamalihiya. Nihaana nihiliyalaka wiira Yesu ahonihimyeera wiira ninaahala ulupatthiya. (Joau 15:20) Wuupuwela iparakha comaana cinweherereehu wahoolo unaanikavihera uhihiya weettela iphiro yomaana, ninswalelaka ni ninvaresesaka Yehova.
5. Manannani niweherero canvahalyaaya Yesu ikuru wiira alipe ukati waahalaawe wiiviya?
5 Moone mananna niweherero cankavihenryaaya Yesu uhihiya ukhala ookhuluvelya, hataa acuwelaka wiira anhala wiiviya niinanna yoowerya. Nihuku no Pentekositi no mwaakha wo 33, apostolu Peturu ahohimya inatiri imphwanyannya nlivuruni yo Isaalimu inthoonyera mananna Yesu caakhanlyaawe oomaala ni woohoova uyo ukatyuuyo. Iyo inatiriiyo yeera co: “Mi kinaahala ukhala kiwehereraka, kontha khunhala ukihiya mmahiyeni ni khunhala uhiya irutthu ya nswalyaa ookhuluvelya yunttaka. . . . Unaahala ukitteeliha nrima cinene uhoolo waa.” (Mite. 2:25-28; Isaa. 16:8-11) Hataa Yesu acuwelaka wiira anhala wiiviya, uyo ahaana niweherero noolipa wiira Yehova anhala umunweleliha ni wiira waanaahala untteela nrima tootho ukati waahalaawe uturuwela wiirimu wiira akhale naathumwaawe.—Mabere. 12:2, 3.
6. Isiyani amunneehu yuulumalyaaya yaacaka niweherero naya?
6 Niweherero nihu ninawaakavihera mayamunneehu enci uvilela. Moone ntakihero naamunna Leonard Chinn yaakhala u Inglaterra. Ukati waalavaniyaaya ikhotto yoopacera yo ntuninyani, ayo yahotthukiya nlattu wookhotta urwaa ukhottoni. Phimaana, ayo amunnaayo yahotthukiya myeeri miili ni wahoolo yahorwaaniya nipuro naavarihaniya miteko cookhanyererihaniya. Ayo amunnaayo yaheera co: “Citthu caakiirannyeela caanaakithoonyera ratta-raatta wiira nahaana nikhalanaka niweherero wiira nikhitiri uvilela. Mbiiblyani, nihaavo ntakihero na Yesu, no maapostolu no maporofeeta ni cihaavo inatiri comaana cinci. Citthu cotheenennyo cinkhala niweherero nomaana noohoolo ninnivaha ikuru wiira nivilele. Niweherero naarinaaya amunna Leonard naakhala khampa nankura aalipiha.” Niweherero hiiva nirineehu pooti ciicammo unilipiha khampa nankura.
7. Manannani marikariko annikhumelela cintepaaya ulipihaca niweherero nihu? (Nwehe Arooma 5:3-5; Tiyaku 1:12.)
7 Yanikhumelelaka marikariko ni noonaka mananna Yehova cinnikaviheraawe, unawoonannya wiira uyo naaciveliya nihiiva, ni iyo itthwiiyo inaalipihaca cinene niweherero nihu. (Nsome Arooma 5:3-5; Tiyaku 1:12.d) Ala manannaala, niweherero nihu ninaatepa ukhala noolipa uvikana ukati nancenreehu wiitthuca ikhweeli co mbiiblyani. Sotwani nopheela unoona nilolovacaka mminepani nlattu wo masakha annikhumelela. Masi Yehova naahala unikavihera utthema masakha otheene anhala uniphwanya.
NIWEHERERO NIHU NINKHALA KHAMPA IKAPASEETI
8. Manannani niweherero nihu ninlattanacaaya niikapaseeti? (Nwehe 1 Atesalonika 5:8.)
8 Ibiiblya ciicammo inaalattaniha niweherero nihu niikapaseeti. (Nsome 1 Atesalonika 5:8.e) Ikapaseeti inaakhikicera nru wa natoropa wiira hipwesiye naawanannyaawe. Nhina mminepani, nihaana nikhikiceraka moopuwelweehu wiira Sotwani hinipanke pusya. Uyo naamananiha unicariha mmuru wihu citthu coohiloka wiira ahonone moopuwelweehu. Khampa ikapaseeti cinkhikiceraaya nru wa natoropa, niweherero nihu ninaakhikicera moopuwelweehu wiira nihihiye unvaresesa Yehova.
9. Isiyani inaakhumelela atthu yaahikhalaneke niweherero?
9 Niweherero nirineehu noorwaa ukhalana ukumi woohimala wahoolo, ninaanikavihera uthoonyihera ucuwelaca ni ukhalana ankhili omaana. Masi, naahilipihaceke niweherero nihu ni nahapusiyaka nimoopuwelelo o ntuninyani, khaninhala uwehera ukumi woohimala khampa itthuvo yeekhweeli inhaleehu waakhela woohipica. Moone itthu yaakhumelenle makristau yaakhala isittatti yo Korintu. Ayo yahohiya waamini inatiri yofayita ipankilyaawe Nluku yoowunweleliha atthu ookhwa. (1 Akor. 15:12) Apostolu Paulu ahantikha wiira ayo makristawaayo khayaakupali wiira atthu ookhwa anaahala wunwelelihiya ni yaakhala yuupuwelaka makhalelwaaya o yooyo ukatyuuyo paahi, woohiniweherero. (1 Akor. 15:32) Mahukwaala, atthu enci ahinkupali inatiri ca Nluku ankhala yatothaka paahi upanka citthu cinaacivela, woohuupuwela nihuku nomeelo. Masi hi kahi phinkhaleehu commo. Hi ninaakhuluvela citthu Nluku cikhuluvelihilyaawe wiirannyeeha wahoolo. Niweherero nihu ninkhala khampa ikapaseeti inkhikicera moopuwelweehu ni innikavihera uhiicuupuwela hiiva paahi, kontha wuupuwela commo pooti uhonona upatthaniihu ni Yehova.—1 Akor. 15:33, 34.
10. Manannani niweherero nirineehu ninnikhikiceraaya wiira nikhotte moopuwelo oohinamaana?
10 Niweherero nihu pooti unikavihera uhuupuwela wiira khaninhala ukhitiri untteeliha nrima Yehova. Wootakihera, ahaavo atthu anoopuwela co: ‘Mi akinafayita; akinhala ukhitiri wiiwelela malamulo a Nluku ni ukhala nkhayi naale anhala uvahiya ukumi woohimala.’ Masi nnaamuupuwela tipani aamwiirenle Jó itthu toko iyo? Aari mpatthannyaawe oohinamaana eehaniya Elifasi. Uyo enre co: “Pinaatamu ooweherera ukhwa nohala ukhitiri cani ukhala ntthu owaarya?” Uyo ciicammo aheera: “Mwiiwe! Nluku khankhuluvela malayikhaawe, ni hataa irimu uyo khanoona ukhala nipuro nooreera.” (Jó 15:14, 15) Iyo yaari itthu yowoothiya! Ayo akhanle makhalelo anonkhumakhuma Sotwani. Uyo naacuwela wiira nyuuva moopuwelaka iyo inanneeyo niweherero ninyu khaninhala ukhala noolipa. Phimaana, nkhotte nnyo citthu cowoothiyannyo ni nkhuluvele inatiri ca Yehova. Nkupali wiira Yehova naapheela uwoonani nkhalanaka ukumi woohimala ni naahala wuukaviherani wiira nkhtiri ukhalana uyo ukumyuuyo.—1 Tim. 2:3, 4.
NHIHIYE ULIPIHACA NIWEHERERO NINYU
11. Nlattuni ninlamuliyeehu uvilela ukati unonweherereehu Nluku wiirannyeeha citthu cikhuluvelihilyaawe?
11 Ukati nkhwaawe, pooti unirika ulipihaca niweherero nihu. Iyo itthwiiyo ineerannya kontha hiiva pooti woocya unweherera Nluku wiirannyeeha citthu cikhuluvelihilyaawe. Masi nihaana nuupuwelaka wiira Yehova haavo ukhuma nenne nokhalayi ni mananna cinweheraawe ukati unvira, anaavirikana nimananna cinwehereehu hiiva apinaatamu (2 Pet. 3:8, 9) Uyo khweeliini naahala wiirannyeeha citthu cikhuluvelihilyaawe. Masi atthunaka khanhala wiirannyeeha khampa hiiva caaweherereehu. Isiyani inhala unikavihera ulipihaca niweherero nihu ni uvilela ukati unonweherereehu wiirannyeeha citthu cikhuluvelihilyaawe?—Tiya. 5:7, 8.
12. Toko cinthoonyeraaya Maberewu 11:1, 6, manannani niweherero nihu nihinhiyanaaya niwaamini urineehu?
12 Ibiiblya inaathoonyera wiira niweherero nihu khaninhiyana ni waamini wihu wiira Yehova haavo ni wiira uyo nawaatthuvela ale anontotha niikuru caya cotheene. (Nsome Maberewu 11:1, 6.f) Nakupaliki wiira Yehova khweeliini haavo, ninaahala utepa ukhuluvela wiira naahala wiirannyeeha citthu cikhuluvelihilyaawe. Phimaana, hi ninhala ulipihaca niweherero nihu nakhalanaka upatthani ni Yehova, ule khuluvelihile wiirannyeeha citthu cinweherereehu. Vano, nttwee noone citthu cinlamuliyeehu upanka wiira nilipihace upatthaniihu ni Yehova ni niweherero nihu.
Ulompa ni wuupuwela insomeehu unaalipihaca niweherero nihu (Nwehe iparaagarafu 13-15)g
13. Isiyani ninlamuliyeehu upanka wiira nimpatthanane Nluku?
13 Munlompe Yehova ni nsome Ibiiblya. Hiiva khweeliini khaninkhitiri umoona Yehova. Masi pooti umpatthanana. Hiiva pooti umuulumana nanlompaka ni nankhuluvelaka wiira naaniiwa. (Jer. 29:11, 12) Ni hiiva pooti umwiiwa Nluku nasomaka Ibiiblya ni navirihaka ukati nuupuwelaka itthu insomeehu. Nasomaka mananna Yehova caawacenryaawe aswalyaawe ookhuluvelya okhalayi, niweherero nihu ninaatepa ukhala noolipa. Citthu cotheene ciri mbiiblyani “cantikhiye wiira ciniitthucihe; wiira nlattu woovilela wihu ni nlattu wo mamaaliho ari nhina cowantikhiya, nikhalane niweherero.”—Aroo. 15:4.
14. Nlattuni unreeraaya wuupuwela inatiri Yehova ciirannyeehalyaawe?
14 Muupuwele mananna Yehova ceerannyeehalyaawe inatiri cawe cokhalayi. Muupuwele itthu Nluku yampankenlyaawe Aparahamu ni Sara. Ayo yahooluvala ni khayaahala ukhitiri waayara asaana. Waahookhalaru commo, Yehova ahaakhuluveliha wiira ayo yanhala unnyara mwaana. (Upha. 18:10) Masi Nluku ahokhuluveliha-tho itthu ikhwaawe. Ibiiblya ineera: “Uyo [Aparahaamu] anhala ukhala nnyari o maloko menci.” (Aroo. 4:18) Waanookhalaru wiira maweherwaawe pinaatamu iyo itthwiiyo khayaahala wiirannya, Aparahamu ankhuluvela wiira Yehova anhala wiirannyeeha inatiri yaapankilyaawe. Ukhuluvela wa Aparahamu khawaari wo mahala. Uyo wahoolo ahotthuveliya. (Aroo. 4:19-21) Ihantisi toko iyo cinaaniitthuciha wiira Yehova khula ukati naapanka citthu cinkhuluvelihaawe, hataa ukhalaka wiira maweherwaaya apinaatamu cikhanle citthu cihineerannya.
15. Nlattuni ninlamuliyeehu wuupuwela citthu Yehova cinipankenlyaawe?
15 Muupuwele citthu Yehova cuupankenlyaaweni. Muupuwele inatiri co mbiiblyani coonaleenyu ciirannyaaka muukumini winyu. Wootakihera, Yesu ahokhuluveliha wiira Athumwaane anaahala wuuvahani citthu cinhala wuuthwaani muukumini winyu. (Mat. 6:32, 33) Yesu ciicammo ahokhuluveliha wiira Yehova naahala wuuvahani nnepaawe wowaarya nyuuva mwanlepelaka. (Luka 11:13) Yehova nawiirannyeeha nnyo inatirinnyo. Nyuuva atthunaka nnaakhitiri wuupuwela inatiri cikhwaawe Yehova cineerannyeehaawe muukumini winyu. Uyo naakhuluveliha wuulevelelani, wuumaalihani ni wuulihani mminepani. (Mat. 6:14; 24:45; 2 Akor. 1:3) Wuupuwela citthu cotheene Nluku cuupankenlyaaweni, unaahala ulipihaca niweherero ninyu wiira uyo ciicammo naahala upanka citthu coohoolo cikhuluvelihilyaawe.
NTTELIYE NLATTU WO NIWEHERERO NIRINEENYU
16. Nlattuni nineereehu wiira niweherero nihu nikhanle itthuvo yomaana inivahilyaawe Nluku?
16 Niweherero nirineehu noorwaa ukhalana ukumi woohimala wahoolo ikhanle itthuvo yomaana inivahilyaawe Nluku. Ninoona upica uphiya ukati unkupaliihu wiira inaahala wiirannya iyo itthu yomaaneeyo. Niwehero nihu ninkhala khampa nankura kontha ninaanilipiha wiira nivilele marikariko, ulupatthiya ni hataa ukhwa. Niweherero nihu ciicammo ninkhala khampa ikapaseeti, kontha ninaakhikicera moopuwelelweehu wiira nikhotte citthu cootakhala ni nivaresese citthu comaana. Niweherero nirineehu noolipiheriya mbiiblyani ninaaniiriha umpatthanana Nluku ni ninaanithoonyihera mananna uyo cinnifentaawe cinene. Nalipihacaka niweherero nihu, ninaahala waakhela iparakha cinci muukumini wihu.
17. Kontha isiyani nihaana isariya yootteeliya nlattu wo niweherero nirineehu?
17 Apostolu Paulu aheera cole nhina iwarakha yaawantikhenlyaawe arooma: “Ntteeliye nlattu wo niweherero nirineenyu.” (Aroo. 12:12) Apostolu Paulu ahaana isariya yootteeliya, kontha uyo aanaakhuluvela wiira aahihiyeke unvaresesa Yehova, aanaahala uvahiya ukumi woohimala wiirimu. Hiiva ciicammo nihaana isariya yootteeliya nlattu wo niweherero nirineehu, kontha ninaakupali wiira Yehova naahala wiirannyeeha inatiri cawe. Khampa cinryaawe nasaalimu, “ootteeliya khanle nlopwana . . . nonweherera Yehova, Nlukwaawe, . . . hinhiya ukhala ookhuluvelya ukati wotheene.”—Isaa. 146:5, 6.
NCIPO 139 Imagina-te no Paraíso
a Yehova honivaha niweherero nomaana noohoolo. Nno niwehereronno ninaanitteeliha nrima cinene ni ninaanikavihera uvilela masakha annikhumelela. Nno ninaaniphwanyiha ikuru wiira nikhitiri uhihiya umwiiwelela Nluku, hataa inikhumelelaka isiyani. Ciicammo, nno niwehereronno ninaanikhikicera wiira nihithepiye nicitthu cowoothiya caahala unihapusa. Khampa cinhaleehu wiitthuca nhina ula mwahoola, nnyo phi citthu cinniiriha ulipihaca niweherero nihu.
b Isaalimu 27:14 Umwaarerihe Yehova; ulipe nrima ni wiilipihace wanrimani waa. Iyee, umwaarerihe Yehova.
c Mabarewu 6:19 Nihaana ula nwehereroola toko nankura nolipiha irooho, ookhuluvelya ni oolipa, ni naakela mpaka nhina, wiithela ikurtina.
d Arooma 5:3 Kahi iyo paasi, masi nitteeliye nrima ciicammo nakhalaka ni mahuviho, kontha mahuviho anaaniiriha uvilela; 4 vano uvilela nwo unaaniiriha ukupaliya ni Nluku, ukupaliya ni Nluku unaaniphwaniya niweherero, 5 ni niweherero khaninhala uninyoonyiha; kontha nifento na Nluku nihomwaruseliya wanrimani wihu nlattu wo nnepa wowaarya, nivahiyeehu. Tiyaku 1:12 Ootteeliya thi ule hinhiya uvilela ukati wo masakha, kontha avilelaka masakha uyo naahala waakhela ukumi Yehova ukhuluvelihalyaawe waavaha ale ahinhiya unfenta.
e 1 Atesalonika 5:8 Masi hiivano, nikhanle onihuku nenno, nihiitthaale ni niware nikhikicerelo waamini ni nifento, ni khampa ikapaseeti, nikhalane uweherera woopoliya.
f Maberewu 11:1 Waamini unkhala ukhuluveleeha wiira inaawa imwehereriya, unkhala woonannya ratta wo citthu cirivo masi cihinoonnya. 6 Ciicammo, woohaamini khawankhitiryaa unciveliha Nluku, kontha ule nomwaattamela Nluku haana akupaliki wiira Nluku haavo ni nawaatthuva ale anontotha niikuru caya cotheene.
g ILATARATO: Ikapaseeti inaakhikicera nru wa natoropa ni nankura naalipiha ikalawa wiira ihiveverusiye niiphyo. Inanna imocaaru, niweherero nihu ninaakhikicera moopuwelelweehu ni ninaanilipiha yanikhumelelaka masakha. Arokorihu anaalompa yankhuluvelaka Yehova. Munneehu nawuupuwela mananna Yehvoa ceerannyeehalyaawe inatiri cankhuluvelihalyaawe Aparahaamu. Munna nkiina nawuupuwela mananna cicaalihiyaawe ni Yehova.