Ukhalana upatthani woolipa ni mayamunna ikhanle itthu yomaana!

1-2. Citthuni Yehova noonaawe ukhala cofayita ni isiyani innikurumicaawe upanka?

MOOPACA weemela ni wuupuwela wiira itthu yofayita Yehova impheelaawe akhanle mananna ninaawacereehu akhunanihu? Yesu heetthuciha wiira nihaana waafenta akhunanihu khampa cineefenteehu. (Mat. 22:37-39) Iyo ciicammo inaahela nhina woonihera unamaana ale ahinonswalela Yehova. Napankaka commo, ninantakiha Nlukwiihu “nawaakumihera ncuwa atthu ooreera nrina ni atthu oonanara nrima ni nawaawaanela ipula atthu aneettela isariya ni atthu ahineettela isariya.”—Mat. 5:45.

² Yehova nawaafenta apinaatamu otheene, masi venci-venci ale ampanka citthu cinoncivela. (Joau 14:21) Uyo noopheela wiira hiiva ciicammo nipanke iyo. Phimaana, uyo naanikurumica woonihera “nifento nuulupale” ni “waawacera saana” mayamunneehu ni mayanuunwiihu. (1 Pet. 4:8; Aroo. 12:10) Ayo moolumwaayo, anaathoonyera ciicammo nifento ninlamuliyeehu ukhalana ni mananna ninlamuliyeehu waawacera amuciihu ni asipatthaniihu.

3. Isiyani inlamuliyeehu wuupuwela nhina nifento?

³ Nifento ninkhala khampa mwiri umpheela uwaceriya saana wiira wuunuwe. Apostolu Paulu ahaavaha ikano makristau, eeraka co: “Nhihiyerere ufentana.” (Mabere. 13:1) Yehova noopheela wiira nifento nirineehu ni mayamunna nihihiyerere wuunuwa. Nhina ula mwahoola, ninaahala woona kontha isiyani ninlamuliyeehu ulipihaca upatthaniihu ni mayamunneehu ni manannani ninhaleehu uhihiyerera upanka commo.

KONTHA ISIYANI NINLAMULIYEEHU WAAFENTA MAYAMUNNEEHU?

4. Isiyani inlamuliyeehu upanka wiira nihihiyerere uvaha ifayita waataana wo mayamunneehu? (Isaalimu 133:1) (Nwehe ciicammo ilatarato.)

⁴ Nsome Isaalimu 133:1.a Hi ninaakupaleela niitthu ihimilyaawe uyo nasaalimuuyo wiira ikhanle itthu yooreera ukhala nkhayi naale anonswalela Yehova. Masi ihaavo itthu yowoopiha. Mmuupuwele ntthu novira khula mahuku nipuro niryaaya mwirini muulupale ni wooreera, nuuwakatyaaya, uyo naahiya uvaha ifayita ureera waya. Inanna imocaaru, hiiva ninaakhala nkhayi ni mayamunneehu khula isumana, phimaana, nihaana uhihiyerera waavaha ifayita ni waataana nkhayi naayova. Isiyani inlamuliyeehu upanka wiira nihihiye waataana ni mayamunneehu? Nifento nihu nimayamunna ninaatepa wuunuwa nakumihaka ukati wiira nuupuwele mananna arinaaya ifayita wanlokoni ni hiiva ciicammo nawoonaka ukhalana ifayita.

5. Isiyani inhala wiirannya wakhalaka wiira atthu anawoona nifento nirineehu ni mayamunneehu?

⁵ Ale ampaceriha woona mikutthaano cihu, anaakhala ootikhinihiya nlattu wonifento nihu nimayamunneehu. Ni ikwaha cikhwaawe, ayo anaakhitiri woona wiira khweeliini hi nikhanle makristau eekhweeli. Yesu ahohimya co: “Nlattu wo iyo, atthu otheene anaahala ucuwela wiira nyuuva nkhanle eetthucyaaka, mwafentanaka.” (Joau 13:35) Moone itthu yaawiirannyenle anuunu Chaithra, ansoma icikola yuulupale ni yaasoma Ibiibiliya ni Masaahiti a Yehova. Ayo yahotthuna nlattulo noorwaa woona ikonkereesu. Ayo yahowiirela anuunu anaasomiha Ibiibiliya co: “Asithumwanaka khaanapaca ukikapatta. Masi ikonkereesu cinyu, kihokapattiya ikwaha 52 nihuku nimoca paahi! Mi kihoona nifento na Yehova, nomayamunna ni kinaapheela upanka mphantte waayo amucyaayo.” Anuunu Chaithra khaahiyerenre wiikurumica ni apattisiye mwaakha wo 2024. Iyo inawoonihera wiira ale ampheela yoonaka miteko cihu comaana, uhela nhina nifento nihu nimayamunna, ikwaha cinci anaakhala ookurumiciya unswalela Yehova.—Mat. 5:16.

6. Manannani upatthaniihu ni mayamunneehu unhalaaya unikhikicera?

⁶ Ukhalana upatthani woolipa nimayamunneehu ni mayanuunwiihu pooti ukhala nikhikicero nuulupale. Paulu ahaavaha ikano makristau, eeraka co: “Nhihiyerere ulipihana khula nihuku wiira ntthu hoone uwerya wanrimani wawe nlattu wotampi.” (Mabere. 3:13) Ikwaha cikhwaawe, hiiva pooti uniriipa nrima ni upacera uhiya weettela iphiro ca Yehova. Masi munna mmoca pooti ucuwelela iyo ni Yehova pooti unvarela nteko uyo munnooyo wiira anikavihere. (Isaa. 73:2, 17, 23) Khweeliini, iyo inanna yoolipihiyeeyo ni yookaviheriyeeyo ikhanle yomaana.

7. Manannani nifento ninnikaviheraaya waataana? (Akolosu 3:13, 14)

⁷ Hi ninaapanka mphantte waapoovu aneekurumica wooniherana nifento ni iyo inaaniphwanyiha iparakha. (1 Jo. 4:11) Wootakihera, nifento ninaanikavihera ‘uhihiyerera uvilelana’ ni iyo inaahela nhina waataana urineehu. (Nsome Akolosu 3:13, 14b; Efesu 4:2-6) Waataana ninkhalaneehu nakhalaka umikutthaanoni, unaanivirikaniha naatthu akhwaawe. Khweeliini, khiivo-tho ikhurupu ikhwaawe inaataana ntuniyani motheene univikana hiiva.

NHISIMANE

8. Manannani Yehova nonikaviheraawe waataana?

⁸ Waataana nirineehu nimayamunneehu ntuniyani motheene, ikhanle itthu Yehova ipankilyaawe. Khweeliini, hi nikhanle atthu oopahuwa. (1 Akor. 12:25) Ibiibiliya ineera wiira ufentana urineehu “nineetthucihiya ni Nluku.” (1 Atesal. 4:9) Uhiya commo, nnuulumoni nawe, Yehova naahimya isiyani inlamuliyeehu upanka wiira nihihiye waataana naatthu akhwaawe. Masi wiira “niitthucihiye ni Nluku”, ninlamuliya usoma sana-saana ni weettela itthu insomeehu. (Mabere. 4:12; Tiya. 1:25) Ni Masaahiti a Yehova anawiikurumica upanka commo.

9. Isiyani inhela nhina waahisima akhunanihu? (Arooma 12:9-13)

⁹ Manannani Ibiibiliya inniitthucihaaya ufentana naakhunanihu? Moone itthu ihimilyaawe apostolu Paulu nhina Arooma 12:9-13.c (Nsome.) Itthu yomaana uulumilyaawe apostolu Paulu ukhalaka wiira ‘nihaana napaceraka waafenta akhunanihu.’ Iyo inaahela nhina “upacera woonihera mayamunna nifento no wanrimani wihu.” Pooti umpankeehu iyo nimananna oovirikanaca. Toko, nakhalaka atthu oowaakhela aletto, oolevelela ni anamavaha. (Efesu 4:32) Nyuuva khannolamuliya unweherera munneenyu upacera uwooniherani nifento. Uhiya commo, nnoonela cani upacera ulipihaca unfenta winyu uyo munnooyo? Naayo manannaayo, nyuuva nnaahala ukhitiri woona wiira itthu Yesu yaahimilyaawe ikhanle ikhweeli. Ukati wenryaawe co: “Uvaha unaatteeliha nrima uvirikana waakhela.”—Mite. 20:35.

10. Manannani ninhaleehu “waahisima akhunanihu” woohinyoonyaciya? (Nwehe ciicammo ilatarato.)

¹⁰ Umaliha wawe uhimya wiira nhaana mpaceraka unhisima nkhunaninyu, Paulu aaheera-tho co: “Nvare nteko woohinyoonyaciya ni woohoolwa.” Ntthu nvara nteko woohinyoonyaciya nawiikurumica. Uyo naakusera ikuru miteko cawe cotheene ni nawiikurumica uvara miteko cinvahaceriyaawe uvara. Miruku 3:27, 28 inaanikurumica yeeraka co: “Nhihiyerere umpankela citthu comaana ule nnolakeleenyu umpankela, mwakhitiriki munkavihere.” Vano, noonelelaka wiira haavo nopheela ukaviheriya, ninawiivaherera woohipica ni khanineera wiira ninaahala unkavihera nihuku nikhwaawe awula khaninoopuwela wiira naahala unkavihera ni ntthu nkhwaawe.—1 Jo. 3:17, 18.

11. Inannani-tho ikhwaawe yowaahisima mayamunneehu?

¹¹ Inanna ikhwaawe yowaahisima mayamunneehu ukhanle uhipica waalevelela yanikoseraka. Efesu 4:26 ineera: “Nihikeleni ncuwa nnaviruwelanne.” Kontha isiyani ikhanlyaaya itthu yomaana weettela iyo ikanweeyo? Khampa cinthoonyeraaya iveerusu 27, iyo pooti umphwanyiha ikhato Sotwani. Ni hi ninaacuwela wiira mbiibiliyani Yehova naanikurumica ikwaha cinci ulevelelana. Akolosu 3:13 mpaka naanikurumica ‘ulevelelana niiraati.’ Uhuupuwela citthu cinnivonyeraaya akhunanihu ikhanle inanna yomaana yoolipihaca wiiwanana wihu. Napankaka commo, ninaahala ukavihera uhihiyerera wiiwanana wo mminepani, wiiwanana unlipiha nnema. (Efesu 4:3) Itthu yuulupale phiila: ulevelelana unaanikavihera ukhalana nnema nkhayi naapoovu a Yehova.

12. Manannani Yehova nonikaviheraawe waalevelela akhunanihu?

¹² Khweeliini, hiiva pooti unirikela unlevelela ntthu nikosenre. Masi nikaviheriyaka ni nnepa wowaarya wa Nluku, hiiva pooti ukhitiri unlevelela. Wiira wihu nihaana nooniheranaka nifento nuulupale naakhunanihu ni uvara nteko woohinyoonyaciya, Ibiibiliya inaanikurumica ukhala atthu ookhomaala nhina mminepani. (Aroo. 12:11.) Iyo maanaaya wiira nnepa wowaarya wa Nluku pooti unikavihera wooniherana nifento ni uwacerana ni mayamunneehu ni waalevelela ninrimeehu wotheene. Vano, nihaana unlepela Yehova unikavihera wiira nikhitiri upanka iyo.—Luka 11:13.

“NKHALE ATTHU OWAATAANA”

13. Isiyani atthunaka inhala ukawaniha nloko?

¹³ Mumphwinkoni wa Yehova, ninawaaphwanya atthu oovirikana. (1 Tim. 2:3, 4) Khula ntthu rina makhalelo oovirikana. Iyo inawoonihera kontha isiyani hiiva ninlakeleehu nimananna oovirikana nhina citthu cimpheeleehu, khampa mawarelo, citthu coopheela uthukathukana ni mananna oowaceriya ireetta usipitaali. Naahiwehacereka saana nwo uvirikana nwo, pooti uniiriha ukawaniha nloko. (Aroo. 14:4; 1 Akor. 1:10) Masi Yehova noniitthuciha wiira atthu ookhuluvelya khanoopuwela wiira citthu cinlakelaaya phiri comaana uvikana atthu akhwaawe.—Afili. 2:3.

14. Isiyani inlamuliyeehu uhihiyerera wiikurumica upanka ni kontha isiyani?

¹⁴ Hiiva ciicammo pooti wanoncerereehu waataana wanloko nuupuwelaka mananna owaalipiha mayamunneehu. (1 Atesal. 5:11) Ala mahuku ookhiceraala, atthu enci yaahiile woona mikutthaano, urwaa wuulalyeerani ni yaakumihiye wanlokoni ahoturuwela ni hiiva ninaawaakhelela ninifento! (2 Akor. 2:8) Moone itthu yuulumilyaaya anuunu amoca yaahiile woona mikutthaano ni urwaa wuulalyeerani aturuwenle wanlokoni, ayo aneera co: “Atthu otheene yaahokisalaamiha ni yankithyaana.” (Mite. 3:19) Manannani ayo anuunwaayo, yeeconnyaaya nlattu wonifento nooniheriyaaya? Ayo aneera: “Waakhala khampa Yehova aneera ukiturusela munttalani wawe wootteeliha nrima.” Neekurumicaka uhihiyerera waalipiha akhunanihu, hiiva ninaakupali wiira ninaavareliya nteko ni Kristu wiira naatteelihe nrima ale “anvara nteko ni ankhala niiwasiwaasi.”—Mat. 11:28, 29.

15. Isiyani-tho inhala wuncerera waataana ni mayamunneehu? (Nwehe ciicammo ilatarato.)

¹⁵ Ile inoolumeehu ciicammo inaakavihera waataana nimayamunneehu. Jó 12:11 neera: “Nnyaru khaninlawiha moolumo aneewaaya, toko nlimi ninlawihaaya iyoolya?” Ntthu nocuwela waapyaaca saana, nopacera ulawiha hinaaya ukawaca wiira oone mananna cicivilyaaya. Inanna imocaaru, hiiva nihinaaya wuuluma itthu, ninlamuliya wuupuwela sana-saana. (Isaa. 141:3) Ninlamuliya ukupaleela wiira ile inuulumeehu inaahala waacivela, waalipiha ni waaphwanyiha “ifayita ale anhala wiiwa.”—Efesu 4:29.

16. Kontha isiyani ntheli omaana ni nyari haana awehaceraka saana itthu inhalaawe wuuluma?

¹⁶ Ntheli omaana ni ayari, ahaana uwehacera saana itthu impheelaaya uhimya. Ayo ahaana wuuluma moolumo anhala waalipiha amucyaaya. (Akol. 3:19, 21; Titu 2:4) Mahumu ciicammo ahaana ulipiha ikhontwaa ca Yehova. (Isai. 32:1, 2; Akalas. 6:1) Hi nimpheela uhihiyerera wuupuwela itthu inhimyaaya Miruku 15:23: “Nuulumo nomaana nowuulumiya ukati woophwanelelana ninaareera venci!”

“MOONIHERANE NIFENTO NEEKHWEELI”

17. Manannani ninhaleehu woonihera mayamunneehu nifento no wanrimani wihu?

¹⁷ Apostolu Joau naanikurumica “ufentana kahi nimoolumo, masi nicitthu cimpankeehu ni wokhweeli.” (1 Jo. 3:18) Nimpheela waafenta mayamunneehu ni mayanuunwiihu ninrimeehu wotheene. Manannani ninhaleehu woonihera nno nifentonno? Navirihaka ukati nkhayi nimayamunneehu ni mayanuunwiihu, ninaahala utepa ulipihaca waafenta wihu. Phimaana, nkumihe ukati wiira nkhale nimayamunna umikutthaanoni ni wuulalyeerani, ciicammo nkumihe ukati wiira mwaathotole. Mwapankaka commo, nnahala woonihera wiira “nnawiitthucihiya ni Nluku ufentana.” (1 Atesal. 4:9) Uhiya commo, khaninhala uhiyerera woona “mananna cinreeraaya, ni cincivaaya atthu yakhalaka wamoca naasunnaya yiiwananaka!”—Isaa. 133:1.