MWAHA WOOSOMIYA 26
NCIPO 123 Nimwiiweleleke Yehova ni Mutthenkeso Awe
Nthoonyere wiiyeviha ni nkupali citthu cihincuweleenyu
“Khaninkhitiri uncuweleeha Nkhulupale Nakuru Cotheene.”—JÓ 37:23.
ITTHU INHALEEHU WIITTHUCA
Nhina ula mwahoola, ninaahala wiitthuca mananna o waanana masakha annikhumelela naweheehaka citthu cincuweleehu ni nankhuluvelaka Yehova, hataa nihicuwelaka citthu cotheene cinhala wiirannyaa.
1. Manannani Yehova numpilyaawe ni kontha isiyani?
YEHOVA numpile ni makhalelo o wuupuwela, o wiitthuca citthu cophiyaaru ni ucuwela mananna o weettela citthu cineetthuceehu. Kontha isiyani numpilyaawe commo? Kontha nopheela wiira apinaatamu ‘akhalane ucuwelaca wa Nluku’ ni answalele ni mananna omaana.—Miru. 2:1-5; Aroo. 12:1.
2. a) Itthuni inlamuliyeehu ucuwela? (Jó 37:23, 24) (Nwehe ciicammo ilatarato.) b) Kontha isiyani ikhanlyaaya itthu yomaana?
2 Khweeliini, Yehova numpile nimananna ankhitiriihu wiitthuca, masi, hataa ukhalaka commo, cihaavo citthu cinci hiiva cihincuweleehu. (Nsome Jó 37:23, 24.a) Muupuwele itthu yaamwiirannyenle Jó. Yehova aahonkohakoha Jó ikwaha cinci para umoonihera wiira cihaavo citthu cinci cahaacuwelaawe. Uyo mwahooyo, waahonkavihera Jó ukhala ntthu o wiiyeviha ni urukunusa makhalelwaawe. (Jó 42:3-6) Inanna imocaaru, ikhanlee itthu yomaana ukhala atthu o wiiyeviha ni ukupali wiira khanincuwela citthu cotheene. Napankaka commo, pooti wankhuluveleehu wiira Yehova khanhala uhiyerera unihimeerya citthu hiiva khweeliini cimpheeleehu ucuwela ukati woolakela itthu yoohala upanka ni mananna omaana.—Miru. 2:6.
Ukupali wiira khanincuwela citthu cotheene ikhanle itthu yomaana, khampa ciicammo Jó caapankilyaawe (Nwehe iparaagarafu 2)
3. Isiyani inhaleehu woona nhina ula mwahoola?
3 Nhina ula mwahoola, ninaahala woona citthu cikhwaawe hiiva cihincuweleehu ni masakha anaananeehu nlattu woohicuwela nnyo citthunnyo. Ni ninaahala woona ciicammo, kontha isiyani ikhanlyaaya itthu yomaana ucuwela citthu cikhwaawe. Usoma nnyo myahannyo unaahala ulipihaca ukhuluvela wihu wiira Yehova, ‘ule rina ucuwelaca woohipahuwa’, naanihimerya citthu hiiva khweeliini cinlamuliyeehu ucuwela.—Jó 37:16.
KHANINCUWELA UKATINI YEHOVA UNHALAAWE UMALAMALIHA ULA ULUMWENKUULA
4. Khampa cinthoonyeraaya Matewus 24:36, isiyani ihincuweleehu?
4 Nsome Matewus 24:36. Hi khanincuwela ukati unhalaaya umalamalihiya ula ulumwenkuula. Ni hataa Yesu waaryaawe va watuniyani vaa, ciicammo khaacuwela “nihuku ni iwoora.”b Nuuwakatyaaya, Yesu ahaahimeerya eetthucyaawe wiira Yehova, nocuwela ukati, naahala woonihera citthu cinhala wiirannyaa “waattamelaka Umwennyaawe.” (Mite. 1:6, 7) Yehova naacuwela ukati unhalaawe umalamaliha ula ulumwenkuula, masi hiiva khanincuwela sana-saana ukati unhalaaya wiirannyaa iyo.
5. Ukhala wiira khanincuwela nihuku ninhalaaya umalamalihiya ula ulumwenkuula, manannani atthunaka ninhaleehu wiicoona?
5 Khampa Yesu caahimilyaawe, hi khanincuwela ukatini unhaleehu uviriha nawehereraka uphiya ukati unhalaaya umalamalihiya ula ulumwenkuula. Nlattu wo iyo, atthunaka hiiva pooti woona upica uphiya uyo ukatyuuyo awula ulolovaca, venci-venci wakhalaka wiira ninaaviriha ukati mwinci nawehereraka nihuku Yehova ninhalaawe umalamaliha ulumwenku. Ciicammo pooti uniriipa nrima wakhalaka wiira amuciihu awula atthu akhwaawe anaanithyaa kontha nanlelo ninaaweherera uphiya nihuku na Yehova. (2 Pet. 3:3, 4) Atthunaka khawaahala unirikela uvilela masakha awula uveehiya naatthu akhwaawe unari wiira nancuwela nihuku naahalaaya umalamalihiya ulumwenku.
6. Kontha isiyani ikhanlyaaya itthu yomaana uhicuwela nihuku ninhalaaya umalamalihiya ulumwenku?
6 Khweeliini, nlattu woohinihimerya nihuku ninhalaawe umalamaliha, Yehova honivaha ukati wowoonihera wiira ninonswalela nlattu wonfenta ni wonkhuluvela. Hiiva khaninonswalela Yehova niweheehaka paasi nihuku nimoca khampa wiira waamini wihu uhaana mahuku unhalaaya umala. Uhiya uweheeha paahi “nihuku Yehova” ninhalaawe umalamaliha ulumwenku, itthu inlamuliyeehu upanka ukhanlee wuupuwela citthu comaana cinhala wiirannyaa naphiyaka nno nihukunno. Naayo manannaayo, ninaahala umwaattamela cinene Yehova, wuncerera ukhuluvela wihu ni upanka yotheene nkhitiriihu wiira nintteelihe nrima.—2 Pet. 3:11, 12.
7. Citthuni nincuweleehu?
7 Ikhanle itthu yofayita uweheeha paahi citthu cincuweleehu—wiira wuukhiceroni mahuku upacenree mwaakha wo 1914. Uhiya paahi unihimeerya mwaakha waahalaawe umalamaliha ula ulumwenkuula, Yehova honivaha inatiri co mbiibiliyani cinoonihera mananna ituniya caahalaaya ukhala ukhuma mwaakha wo 1914. Vano, hi ninaakupali cinene wiira “nihuku nuulupale na Yehova nihaattamela.” (Sof. 1:14) Ni ciicammo ninaacuwela ntekoni Yehova umpheelaawe wiira nivare, ukhanle ulalyeera “ihapari comaana co Umwene wa Nluku.” (Mat. 24:14) Nnyo ihaparinnyo, cinaalalyeeriya ilapo coophiyaka 240 ni micoko caya, ni iluuka coopwahaka 1.000. Phimaana, hi khaninlamuliya upheela ucuwela “nihuku ni iwoora” wiira niikurumice uvara uyo nteko wofayitooyo.
KHANINCUWELA MANANNA YEHOVA NOHALAAWE UPANKA CITTHU CAWE
8. Nuulumo “nteko wa Nluku eekhweeli” maanaaya isiyani? (Eklesyaste 11:5)
8 Hi khanincuwela “nteko wa Nluku eekhweeli.” (Nsome Eklesyaste 11:5.c) Nno nuulumonno ninaaca mananna Yehova cinvaraawe ntekwaawe wiira yiirannyee itthu impheelaawe. Hi khanincuwela citthu cotheene cimmwiiriha Yehova wiirannyeeha citthu cimpheelaawe awula mananna cinhalaawe upanka nlattu waaswalyaawe. (Isaa. 37:5) Ibiibiliya inaalattaniha uhicuwela “nteko wa Nluku eekhweeli” khampa nihincuweleehu mananna mwaana cinoonuwaawe mmirimani waanumwaane. Hataa anamasomasoma khancuwela mananna iyo itthwiiyo ineerannyaaya. Inanna imocaaru, hi khanincuwela sana-saana mananna Yehova cinoopuwelaawe.
9. Isiyani inhala wiirannyaa nlattu woohicuwela citthu Yehova cinhalaawe upanka?
9 Nlattu woohicuwela mananna Yehova cinhalaawe waakavihera aswalyaawe, pooti uniloloviha. Atthunaka hiiva ninaahala woova upanka yotheene inkhitiriihu wiira ninvarele nteko cinene Yehova, khampa uhiwehaweha upheela ukhalana citthu cinci muukumini wihu awula wiivaherera ukavihera mapuro ampheeliya cinene anamalalyeera. Hiiva atthunaka pooti upacera wuupuwela wiira Yehova khannicaaliha wakhalaka wiira khaninkhitiri wiirannyeeha mipika niiphimenleehu, ni wakhalaka wiira khunneettela saana nteko woolalyeera awula ninawaanana masakha ninteko unvareehu mumphwinkoni.
10. Makhaleloni ofayita anhaleehu woonihera nlattu woohicuwela mananna Yehova cinhalaawe upanka citthu cawe?
10 Ucuwela mananna Yehova cinhalaawe uniwacera, khweeliini unaanikavihera woonihera makhalelo omaana, toko wiiyeviha ni uhiicuunuwiha. Ninaakhitiri woona wiira Yehova phincuwela itthu yomaana. (Isai. 55:8, 9) Ciicammo, ninawuncerera unkhuluvela wihu Yehova ni wiitthuca ukhala saana nankhuluvelaka vale. Waneettelaka saana ntekweehu woolalyeera awula nteko unvareehu mumphwinkoni, uttitthima wotheene ninanvaha ule unomphwanela, Yehova. (Isaa. 127:1; 1 Ikor. 3:7) Ni wakhalaka wiira citthunnyo khacinneettela saana khampa caapheeleehu, ninlamuliya wuupuwela wiira Yehova phinwacera cotheene. (Isai. 26:12) Hi ninaapanka ile inkhitiriihu ni ninaakhuluvela wiira Yehova naahala upanka mphanttyaawe. Ninaakupali wiira Yehova naahala univaha malakihero, hataa hipankaka miiriirya khampa khalayi.—Mite. 16:6-10.
11. Citthuni cofayita cincuweleehu ca Yehova?
11 Hi ninaacuwela wiira Yehova khanlee nanifento, nasariya ni oocuwelaca. Itthu ikhwaawe hiiva incuweleehu, ukhalaka wiira Yehova naavaha ifayita itthu hiiva inompankeleehu ni ciicammo inaapankeleehu mayamunneehu ni mayanuunwiihu. Ni ninaakupali wiira Yehova nawaacaaliha ale anonkhuluvela.—Mabere. 11:6.
KHANINCUWELA ITTHU INHALA WIIRANNYAA WAHOOLO
12. Isiyani ineetthuceehu nhina Tiyaku 4:13, 14?
12 Nsome Tiyaku 4:13, 14.d Itthu inkupaliihu ukhanlee wiira hiiva khanincuwela mananna ukumiihu cinhalaaya ukhala wahoolo. Ituniya inkhaleehu, ninkhala “ukati woohinamaana ni uhimpica wiirannyaa citthu cahaaweherereehu.” (Ekles. 9:11) Nlattu wo iyo itthwiiyo, hi khanincuwela wakhala wiira itthu inlakeleehu upanka inaahala uneettela saana ni hataa khanincuwela wakhala wiira ninaahala ukhala akumi wiira niirannyeehe itthu ilakenleehu upanka.
13. Marikarikoni yaahaleehu ukhalana nlattu woohicuwela citthu cinhala wiirannya uhoolo
13 Waanana waanyihacera mananna ukumiihu cinhalaaya ukhala, pooti unirikela cinene. Kontha isiyani? Atthunaka hiiva ninaakhala niiwasiwaasi nuupuwelaka itthu inhala uniirannyeela uhoolo ni inhala umalamaliha utteeliya wihu. Makhalelweehu pooti urukunuwa woohipica ni yiirannyaaka iyo, pooti uniphwanyiha iretta ni ucukulaca. Ni wakhalaka wiira citthu cimpheeleehu khacinneetta saana, hiiva pooti ulolovaca ni uriipiya nrima.—Miru. 13:12.
14. Isiyani khweeliini inhala uniphwanyiha utteeliya? (Nwehe ciicammo ilatarato.)
14 Ukati unaananeehu masakha, ninawoonihera wiira hataa yiirannyaaka isiyani, ninanswalela Yehova nlattu wo nifento nihu, uhiya nlattu wookhala saana muukumini wihu. Ibiibiliya inawoonihera wiira Yehova khannikhikicera masakha otheene annikhumelela ni khannihimerya mananna ukumiihu cinhalaaya ukhala uhoolo. Yehova naacuwela wiira utteeliya wihu khunakhala ucuwela citthu cotheene cinhala wiirannyaa uhoolo. Khweeliini, ninaatteeliya nlattu Yehova woonivaha malakihero ni umwiiwelela. (Jer. 10:23) Phimaana, natothaka ukaviheriya ni Yehova wiira nilakele itthu yoohala upanka, khaninhala ukhala niiwasiwaasi cinene nuupuwelaka itthu inhala wiirannyaa uhoolo. Unkhala khampa nineera co: “Yehova atthunaka vale, ninaahala ukhala akumi ni ninaahala upanka iyo itthwiiyo.”—Tiya. 4:15.
Natothaka malakihero a Yehova ni neewelelaka, Yehova naanikhikicera (Nwehe iparaagarafu 14-15)f
15. Isiyani incuweleehu wiira inaahala wiirannya uhoolo?
15 Khweeliini, hi khanincuwela isiyani inhala wiirannyaa uhoolo, masi Yehova honikhuluveliha univaha ukumi woohimala. Atthu akhwaawe anrwaa ukhala wiirimu ni akhwaawyaayo anrwaa ukhala va watuniyani vaa. Ni ninaacuwela wiira Yehova khanootha ni khiivo itthu inhala unhiiha wiirannyeeha inatiri cotheene cikhuluvelihilyaawe. (Titu 1:2) Yehova paahi phinhala ‘uhimya nihuku ninhalaawe umalamaliha ulumwenku, ikhumelo yokhalayi, uyo phinhimya citthu cinhala wiirannyaa.’ Citthu cotheene Yehova caahimilyaawe wiira canhala wiirannya wahoolo, khweeliini cinawiirannyaa. Ni cotheene cihimilyaawe wiira cinaahala ukhumelela uhoolo ciicammo cinaahala wiirannyaa. (Isai. 46:10) Ni ninaakupali wiira khiivo itthu inhala unhiiha Yehova unifenta. (Aroo. 8:35-39) Hataa yiirannyaaka isiyani muukumini wihu, Yehova naahala univaha ucuwelaca, unimaaliha ni univaha ikuru cimpheeleehu wiira nivilele. Ni ninaakupali wiira Yehova naahala unikavihera ni unicaaliha.—Jer. 17:7, 8.
KHANINCUWELA SANA-SAANA MANANNA YEHOVA CINNICUWELAAWE
16. Toko cinthoonyeraaya Isaalimu 139:1-6, isiyani Yehova incuwelaawe hiiva nihincuweleehu saana?
16 Nsome Isaalimu 139:1-6.e Yehova naanicuwela sana-saana hiiva, makhalelweehu ni moopuwelelweehu. Uyo naaniweheeha khula ukati! Uhiya uviriyana paahi itthu inoolumeehu, uyo naakhitiri ucuwela itthu hiiva impheeleehu uhimya. Yehova ciicammo nawoona citthu cotheene cimpankeehu ni naacuwela citthu cinniiriha wuupuwela naala manannaala awula ni mananna makhwaawe. Mwene Davidi hoonihera wiira Yehova ri owiitthenkaceene wiira anikavihere khula itthu inhala unikhumelela. Manannani nyuuva nneecooneenyu nlattu woocuwela wiira Nkhulupale Pwiiya Yehova, Pattusile irimu ni itthaya, nanweheeha khula ntthu? Ikhanlee itthu yootteeliha nrima, keera? Unkhala khampa mwene Davidi wenryaawe co: “Nwo ucuwelacanwo venci cinene, mpaka mi akinkhitiri ucuweleeha saana.”—Isaa. 139:6.
17. Kontha isiyani atthunaka unhalaaya unirika ukupaali wiira Yehova naanicuwela sana-saana?
17 Nlattu wo khapileehu awula citthu caakupaliihu nihinaaya wiitthuca ikhweeli, pooti unirikela ukupali wiira Yehova khanlee nyari onifento ni nanwacera khula ntthu. Awula atthunaka ninoopuwela wiira, nlattu wo itampi civanreehu khalayi, Yehova khanhala upheela wiira nikhale apatthannyaawe ni uyo khanciveliya nihiiva. Hataa mwene Davidi ikwaha cikhwaawe aneecoona commo. (Isaa. 38:18, 21) Uhiya commo, atthunaka ninaamoona ntthu neekurumica weettela itthu inoncivela Yehova muukumini wawe eekohaka co: ‘Wakhala wiira khweeliini Nluku naakicuwela, kontha isiyani nopheelaawe wiira kihiye weettela makhalelo ankicivela ni kinoonaaka ukhala omaana?’
18. Manannani ucuwela wiira Yehova naanicuwela sana-saana uvikana cineecuweleehu unnikaviheraaya? (Nwehe ciicammo ilatarato.)
18 Ikhanlee itthu yofayita ucuwela wiira Yehova naanicuwela sana-saana uvikana naasineneehu, ni wiira uyo naacuwela citthu comaana cirineehu nihinkhitiriihu woona. Hataa nankoseraka, Yehova naacuwela mananna aneekurumiceehu wiira nikhale atthu omaana ni uyo naanifenta. (Aroo. 7:15) Ucuwela wiira Yehova nawoona wiikurumica wihu, iyo inaanivaha ikuru cimpheeleehu wiira ninswalele wookhuluvelyaa ni ukhala ootteeliya.
Yanikhumelelaka masakha nahaaweherereehu, Yehova naahala unikavihera uvilela nalipihacaka waamini wihu inatiri cinhala wiirannya uhoolo (Nwehe iparaagarafu 18-19)g
19. Citthuni ca Yehova hiiva cincuweleehu saana?
19 Ninaacuwela wiira Yehova khanlee nifento. Hi ninaakupali iyo itthwiiyo. (1 Jo. 4:8) Ukhala wiira Yehova naanifenta ni nopheela wiira nikhale saana, hi ninaacuwela wiira cotheene cinnilepelaawe wiira nipanke nopheela unikavihera. Ciicammo ninaacuwela wiira Yehova nopheela wiira hiiva niphwanye ukumi woohimala. Phimaana, wiira iyo itthwiiyo ikhitirye, uyo honveleeliha mwanawe wiira anoopole. Nlattu wo iyo itthuvweeyo, hi ninaakupali wiira, hataa nakhalaka atthu oopahuwa, pooti wanontteeliheehu nrima Yehova. (Aroo. 7:24, 25) Ni ninaacuwela wiira “Nluku muulupale uvikana nrimeehu ni naacuwela citthu cotheene.” (1 Jo. 3:19, 20) Yehova naanicuwela sana-saana ni naakupali wiira hi ninaakhitiri upanka ile innilepelaawe.
20. Isiyani inhala unikavihera wiira nihitepe ukhala niiwasiwaasi?
20 Yehova khanhiya unihimeerya itthu yotheene impheeleehu ucuwela. Nakhalaka atthu oohiicuunuwiha ni nakupaliki wiira khanincuwela citthu cotheene, khaninkhala niiwasiwaasi cinene niitthu nihincuweleehu. Uhiya commo, nihaana uweheeha citthu hiiva cincuweleehu. Napankaka commo, ninawoonihera wiira nikhanlee atthu owiiyeviha ni ninankhuluvela cinene Yehova, ‘Ule rina ucuwelaca woohipahuwa.’ (Jó 36:4) Khweeliini, hi khanincuwela citthu cikhwaawennyo, masi ninaacuwela wiira Yehova khanhala uhiyerera uniitthuciha mpaka. Ni ikhanlee itthu yomaana upanka commo kontha khaninhala uhiyerera wiitthuca citthu cophiyaaru ca Nlukwiihu.—Ekles. 3:11.
NCIPO 104 Munepa Wootteela ti Yoovaha ya Muluku
a Jó 37:23 Hi khaninkhitiri uncuweleeha saana ule khanle Nakuru-Cotheene; uyo khanle nakuru cinene ni khanhiya ukhala nasariya ni ukhala oonamaana. 24 Phimaana, atthu otheene anlamuliya unttitthimiha. Kontha uyo khaanoncivela atthu aneecoona ucuwelaca.
b Yesu phinhala uhoolela ikhotto inhala umalamaliha ulumwenku wa Sotwani. Vano, pooti waneereehu wiira, nna coo, uyo naacuwela nihuku ninhalaaya ukhala ikhotto ya Harmacetom ni ukati unhalaawe ‘utthema.’—Apoka. 6:2, 19:11-16.
c Eklesyaste 11:5 Khampa nyuuva nhincuweleenyu mananna mwaana cinoonuwaawe mmirimani waanumwaane, ciicammo nyuuva khamuncuwela nteko wa Nluku eekhweeli, ule nopanka citthu cotheene.
d Tiyaku 4:13 Vano nkiviriyane, nyu nneera va: “Ilelo awula meelo ninaahala urwaa ile isittattiile, nwo ninaarwaa ukhala mwaakha mmoca namwiiraka nakoso ni ninaarwaa uphwanya nsurukhu,” 14 waneeraaya nhicuwelaka cinhalaaya ukhala ukumiinyu wo meelo. Kontha nrii toko itthapwe inkhumelela ukati vakaani ni khimpica urimyaa.
e Isaalimu 139:1 Yehova, weeva unaakiweheeha ni unaakicuwela. 2 Unaacuwela ukati unonkomaaka ni ukati unonwaaka. Unari uttayi, unaacuwela moopuwelelwaaka. 3 Unaakoona ukati uneettaaka ni ukati unrupaaka; unaacuwela sana-saana iphiro caka cotheene. 4 Kihinaaya ukumiha nuulumo wamalakuni waka, Weeva Yehova unaacuwela ratta-raatta. 5 Weeva uhokirukurerya miphantte caka cotheene wiira ukikavihere; Ni ntata naa nihokivarelela. 6 Nwo ucuwelacanwo mwinci cinene, Mpaka mi akinkhitiri ukhalana.
f ILATARATO YO: Nyari mmoca ni mwanaawe atthenkacaka nrupa wootthawana yiirannyaaka itthu yowoopiha.
g ILATARATO: Amunna amoca anaanana itafaawuti yuupuwelaka utteeliya unhalaaya ukhalana upeephoni.