Wakhala wiira nyuuva nhaana asaana, mwaakavihere utthenkaca ikomentaariyu cinhalaaya uvaha nttharihaka myaakha caya. Ukati nkhwaawe, cinaahala wuulumiya myaha cuulupale toko masakha ankhumelela muuthelanani awula myaha cuulupale cikhwaawe nhina citthu comaana ni coohinamaana. Hataa ukhalaka commo, pooti ukhala iparaagarafu imoca awula piili asaaniinyu cinlamuliyaaya ukomentari. Ciicammo, munkavihere mwaninyu ucuwela wiira ikwaha cikiina uyo pooti uvusa moono, masi uhithanliya wiira akomentari. Mwapankaka commo, uyo khanhala urusiya wakhalaka wiira hovusa moono masi thanliye ntthu nkiina wiira akomentari. (Tim. 6:18) Otheene cihu pooti utthenkaca ikomentaariyu cowaalipiha akhwiihu ni cinonttitthimiha Yehova. (Miru. 25:11) Ukati nkhwaawe, hiiva pooti uvaha ikomentaariyu nittonkacaka itthu iniirannyenle, masi ratta! Khaninlamuliya utepa wuuluma cinene citthu cihu hiiva ukati wookomentari. (Miru. 27:2; 2 Akor. 10:18) Uhiya commo, ikomentaariyu cihu cihaana cimoopelaka mwaha Yehova ni apoovwaawe ntuninyani motheene. —Apoka. 4:11. w23.04 ipaag. 24-25 iparaag. 17-18

Nifento nikhanle nofayita cinene wiira nikhale niweheehaka ni nihiitthaale. (Mat. 22:37-39) Unfenta wihu Nluku unaanikavihera uvilela wuulalyeerani hataa iyo itthwiiyo iniwaanelaka marikarikoni. (2 Tim. 1:7, 8) Hiiva ciicammo, ninaawoonihera nifento ale ahinonswalela Yehova. Phimaana, khaninhiyerera ulalyeera hataa ninvarelaka nteko telefooni ni iwarakha. Hi nihaana niweherero nowiira wanihukuni ayo atthwaayo anaahala urukunusa moopuwelelwaaya ni upacera upanka citthu comaana. (Ezek. 18:27, 28) Unfenta nkhunanihu unhela nhina waafenta mayamunneehu. Pooti wampankeehu iyo “nilipihanaka ni nikurumicanaka.” (1 Atesal. 5:11) Woolikanaca ni anatoropa yaana ikhotto nkhayi, hiiva ninaalipihana. Khanimpheela waariipiha nrima mayamunneehu imweeni awula waalivyaanihera itthu inipankilyaaya yootakhala. (1 Atesal. 5:13, 15) Hiiva ciicammo, ninawoonihera nifento nihu naahisimaka mayamunna avahaceriye uhoolela wanlokoni. —1 Atesal. 5:12. w23.06 ipaag. 10 iparaag. 6; ipaag. 11 iparaag. 10-11

Inanna imoca yoolipihaca waamini wihu, ukhanle wuupuwelela woopoliya wihu. Woopoliya wihu ni Nluku unoonihera wiira uyo naahala wiirannyeeha citthu cotheene cikhuluvelihilyaawe. Wuupuwela nlattuni Yehova nvahalyaawe mwanawe wiira aakhwe ni anoopole, ni wuupuwela citthu cotheene Yehova caalevilyaawe nlattu wo iyo itthwiiyo, unaahala ulipihaca waamini wihu wiira inatiri ipankalyaawe yoonivaha ukumi woohimala ntuninnyani yonaanaano, inaahala wiirannya. Nlattuni waneereehu commo? Wiira Yehova anoopole, uyo ahonveleeliha mwanawe nonfentaawe cinene wiira ayariye khampa pinaatamu oohipahuwa va watuninnyani va. Ni uwakati Yesu waaryaawe va watuninnyani va, yaahonkhumelela masakha oorika. Wahoolo, uyo ahokhwa ni mananna oowerya, khweeliini ukhwa wa Yesu wahonwerya cinene Yehova. Nlukwiihu oofenta khaahala unhiya mwanawe uhuvihiya ni wiiviya wiira hiiva nikhalane ukumi wooreera wo myaakha vakaani paahi. (Joau 3:16; 1 Pet. 1:18, 19) Ukhala wiira Yehova wahonwerya cinene wiiviya wawe Yesu, iyo inoonihera wiira uyo naahala upanka yotheene inkhitiryaawe wiira hiivano nakhalane ukumi woohimala ntuninnyani yonaanaano. w23.04 ipaag. 27 iparaag. 8-9