Ireferensia co Mwaalivuru o Mikutthaano Makhalelo ni Miteko Ceekristau
© 2025 Watch Tower Bible and Tract Society of Pennsylvania
5-11 YO MAIO
MIHAKHU CO NNUULUMONI NA NLUKU MIRUKU 12
Wiikurumica uvara nteko unaahala wuucaalihani
Sentinela 06/2016 ipaag. 30 iparaag. 6
Ikhalelo imoca yootepa ukhalana ifayita uvikana iwooru ineehaniya diamante
Aswali akhwaawe a Yehova pooti waarikela uphwanya iyoolya yowaatosera. Masi uhiya ukhala oohikhuluvelya wiira aphwanye itthu yoolya, ayo anawiikurumica cinene uvara nteko wiira aphwanye iyoolya. Naayo manannaayo, ayo anawoonihera wiira anaavaha ifayita unamavaha ni makhalelo omaana makhwaawe a Nluku uvikana mihakhu.—Miru. 12:24; Efesu 4:28.
Sentinela 1/02/2015 ipaag. 5 iparaag. 4-6
Manannani cinhalaaya wuucivelani nteko unvareenyu?
Uvara nteko unaaniphwanyiha utteeliya noonaka iparakha cimphwanyaaya akhunanihu. Manannani? Yesu enre co: “Unaatteeliha nrima uvaha, upwaha waakhela.” (Mite. 20:35) Uhiya waaphwanyiha iparakha paahi ananteko ni anthumathuma, ciicammo anaaphwanyera iparakha atthu akhwaawe. Ayo atthwaayo, waahela nhina amuciihu ni ale akhanle oohuva.
Amuciihu. Ntheli neekurumica uvara nteko wiira akhitiri ulihera itthokwaawe, nawaakavihera amucyaawe nimananna meeli. Yoopacera, uyo nawaavaha citthu cimpheelaaya, toko iyoolya, ikuwo ni nipuro nookhala. Naayo manannaayo, uyo naakhitiri uwacera nrintti unvahaceriyaawe ni Nluku “waaverya iyoolya amucyaawe ni citthu cikhwaawe.” (1 Tim. 5:8) Yonayeeli, mwaneene itthoko naavaha ntakihero nomaana mananna ikhanlyaaya itthu yofayita uvara nteko.
Ale akhanle oohuva. Apostolu Paulu ahaakurumica makristau ‘wiikurumica uvara nteko wiira akhalane iyoolya ni waakavihera ale oohuva.’ (Efesu 4:28) Khweeliini, neekurumicaka cinene uvara nteko wiira niilihere ni waalihera amuciihu, ninaakhitiri waakhavihera ale ampheela ukaviheriya. (Miru. 3:27) Uvara nteko unaanikhitiriha waakavihera atthu akhwaawe ni unitteeliha nrima noonaka iparakha cimphwanyeehu.
Ikano cowiipithya co mbiibiliyani
Os Jovens Perguntam mwaha 95 iparaag. 10-11
Manannani kinhalaaka waanana masukhuli?
● Mwiikurumice uwehera ratta masukhuliinyu. Mwiitthuce ucuwelela masukhuli moolupale ni mankaani. Ibiibiliya ineera: “Nlolo nawoonihera woohipica urusiya wawe, masi nlopwana oowalaala naahiya wuupuwela uruwaniya.” (Miru. 12:16) Kahi itafaawuti cotheene cinlamuliya wuusankihacani.
12-18 YO MAIO
MIHAKHU CO NNUULUMONI NA NLUKU MIRUKU 13
Nhihiyerere mwathepiyaka “ninthuko waatthu ampanka citthu coohiloka”
Perspicaz vol. 2 ipaag. 189 iparaag. 3-4
Nthuko
Inanna cikhwaawe coolattanihera. Khula itthu ntthu inkhuluvelaawe wiira amwaaleele nttala unviraawe inlattanihiya ninthuko. Ni ayo moolumaceeryaayo, miruku naanvirikaniha ntthu nopanka citthu comaana ni ntthu nopanka citthu coohinamaana, eeraka co: “Nthuko waatthu ampanka citthu comaana unawaarya cinene, masi nthuko waatthu ampanka citthu coohinamaana unaahala uttipihiya.” (Miru. 13:9) Nthuko waatthu ampanka citthu comaana khunhiyerera waarya, masi hataa ukhalaka wiira nthuko waatthu ampanka citthu coohinamaana khumpheela uttiphya awula unaapharela cinene, Nluku naahala wiiriha nthukwaaya uttiphya ni nuuwiiriha ukhala nipuro nooripela unhalaaya ukakathuwa.—Miru. 20:20.
Uttipihiya nthuko wantthu ciicammo maanaaya wiira ntthuuyo kharina-tho niweherero noohoolo. Iveerusu ikhwaawe ya miruku, ineera co: “Atthu ampanka citthu cootakhala khaarina niweherero noohoolo; nthuko waatthu ampanka citthu coohinamaana unaahala uttipihiya.”—Miru. 24:20.
Sentinela 15/07/2012 ipaag. 12 iparaag. 3
Munswalele Nluku ootaphuwa
3 Khampa Sotwani aakhitinryaawe waathepya apinaatamu eeli oopacera ni uhela nhina malayikha menci ukhotta ukhulupale wa Yehova, uyo ciicammo pooti unithepya. Khampa caathepilyaawe apinaatamu oopacera, mahukwaala, uyo naavarela nteko yaayo manannaayo wiira aathepye apinaatamu. Uyo naamananiha uniiriha wuupuwela wiira malamulo a Yehova akhanle oorika utthara ni anaanihiha uwehaweha citthu cinnicivela. (1 Jo. 5:3) Hiiva ciicammo pooti ukhalana ayo moopuwelelo oohilokaayo naweheehaka vale. Arokorihu amoca arina myaakha 24, aneera: “Mi kaahopanka urupihana woohiloka kontha kaanoova ukhalana moopuwelelo oovirikana naatthu yahanswalela Yehova. Atthunaka nyuuva mwaahopaca ukhanyererihiya naasipatthaniinyu upanka itthu yoohinamaana.
Sentinela 15/07/2004 ipaag. 31 iparaag. 6
“Atthu aankhili anawuupuwela nuucuwelaca”
Ntthu aankhili ni nuupuwela avarelaka nteko ucuwelaca weekhweeli, naahala ucaalihiya. Salomau hantikha co: “Nasariya naalya ni naarupala, masi ntakhali inanvola itala.” (Miru. 13:25) Yehova naacuwela itthu yomaana nimpheeleehu muukumini wihu, khampa waamucini, upatthaniihu naatthu akhwaawe, wuulalyeerani awula navahiyaka malakihero.Neettelaka nuucuwelaca ikano cimphwanyeehu nnuulumoni wawe, hiiva ninaakhalana ukumi womaana.
Ikano cowiipithya co mbiiblyani
Sentinela 1/04/2008 ipaag. 14 iparaag. 3-5
Wuunuwiha asaana ntuniyani waatthu ampanka citthu cinaacivela
Miruku 13:24 ineera: “Ule hinonlaka mwanawe khanonfenta, masi ule nonfenta khanhiya unlaka.” Unttarusa mwaana ikhanle inanna yonlaka. Nlattu wowaafenta asaanaaya, ayari anawiikurumica waalaka asaanaaya wiira ahipanke citthu caahala waakumiherera masakha yuunuwaka. Khweeliini, uhiya utthara ila ikanweela ikhanle inanna yoohinfenta mwaana, masi utthara iyo ikanweeyo ukhala unfenta.
19-25 YO MAIO
MIHAKHU CO NNUULUMONI NA NLUKU MIRUKU 14
Muupuwele saana itthu yoohala upanka yaakhumelelaka ihasara
Ukhalenla 02/2023 ipaag. 22-23 iparaag. 10-12
Nhisime ukumi Nluku oovahilyaaweni
10 Khweeliini, hiiva khanirina itthu yoopheela upanka wiira cihikhumelele citthu cootakhala. Wootakihera, khiivo inkhitiriihu upanka wiira watuninyani cihikhumelele ihasara, ireetta awula inttewo. Masi wakhalaka wiira cihokhumelela ihasara khampa nnyo, hiiva pooti wampakeehu itthu wiira niikhikicere, toko uwiiwelela ahooleli ookuvernu yeeraka wiira nihaana nikhumaka nipuro nikhanle nowoopiha awula yanirumaka upanka citthu cikhwaawe uyo ukatyuuyo. (Aroo. 13:1, 5-7) Ukati nkhwaawe, unaakhitirya waanyihacera nihuku ninhalaaya ukhumelela ihasara. Weerannyaaka commo, ninlamuliya utthara malamulo akhulupale o ikuvernu annivahaaya, kontha akhanle malakihero annikhikicera. Wootakihera, atthunaka ikhanle itthu yomaana hiiva ukhalana citthu coohaakuva wuntta, khampa maaci o mmitiitani munrupani wihu ni citthu cikhwaawe cooliya cinhala waakuva unikavihera yakhumelelaka ihasara.
11 Vano yamwareelaka iretta ncoko unkhaleehu, isiyani ninlamuliyeehu upanka? Nihaana niiwelelaka malakihero ookuvernu, toko unyawa, uhiwaattamanana akhunanihu, uwara maskara ni umweettela kwarenteena. Napankaka nnyo citthunyo, ninaathoonyera wiira ninaahisima ukumi.
12 Yanikhumelelaka itthu yahaaweherereehu, pooti umwaruseliya citthu cowoothiya iriyari yaasipatthaniinyu, aattamananiinyu ni mpaka mmahaparini nteeveeni awula nraatiyuni. Uhiya ‘ukupali khula itthu ineeweenyu,’ phataari wiiwelela paahi citthu cinooneenyu wiira cinhimiya naatthu ookhuluvelya. (Nsome Miruku 14:15.) Mayamunna o Mphwinko wo Mahumu Unhoolela ni mahumu anhoolela Ipeteli ntuninyani motheene anawiikurumica utotha citthu cookhuluvelya ahinaaya ulakela upanka itthu nhina mananna oopanka mikutthaano ni mananna oovara nteko woolalyeera. (Mabere. 13:17) Nattharaka ayo malakiherwaayo, ninaahala wiikhikicera ni ninaahala waakhikicera akhunanihu. Ciicammo, ninaahala waavaha atthu usaahiti womaana.—1 Pet. 2:12.
Ukhalenla 07/2024 ipaag. 5 iparaag. 11
Nkhale oolipa nrima khampa Satoki
11 Vano wakhala wiira mayamunneehu o wanlokoni inawaakhumelela itthu yowoopiha ni ampheela ukaviheriya, manannani ninhaleehu utthara ntakihero na Satoki ni woonihera ulipa nrima? (1) Ntthare malakihero. Ukati womasakha, nihaana utthara malakihero ninvahiyeehu wiira nhihiyerere ukhala owaataana. Ciicammo unaareera wiiwelela malakihero ankhuma Upeteli. (Mabere. 13:17) Mahumu ahaana uhihiya wuupusera malakihero ankhuma Upeteli, ankavihera ucuwela mananna owiitthenkaca cihinaaya ukhumelela ihasara. (1 Akor. 14:33, 40) (2) Nkhale oolipa nrima, masi mwiikhikicere. (Miru. 22:3) Muupuwele nhinaaya upanka khula itthu ni ukati woopanka, mwiikurumice upanka nimananna ookhikicerya. (3) Munkhuluvele Yehova. Nhiliyale wiira Yehova nawuuwacerani, ni nawaawacera mayamunneenyu. Yehova pooti wuukaviherani nyuuva ni waakavihera mayamunna ni mananna ookhikicerya.
Ikano cowiipithya co mbiiblyani
Mphwanye Utteeliya Uhimmala! mphantte 35 ipontu 2
Ninhala ukhitiri cani ulakela upanka citthu comaana?
Ibiibiliya ineera:“Ule rina ankhili nopacera wuupuwela ratta hinaaya upanka itthu.”(Miruku 14:15) Iyo maanaaya wiira nihinaaya ulakela upanka itthu, nihaana neemelaka ni wuupuwela citthu cinhela nhina iyo itthu impheeleehu ulakela upankeeyo. Mwiikohe co: ‘Ntthareleloni no mbiiblyani ninvaranaca niila itthwiila? Ila itthu impheelaaka ulakela upankeela inaahala ukihiya ninrima wootaphuwa? Itthu impheelaaka ulakela upanka inhala wiira waakavihera awula waapanka pusya akhunanaka?’ Ni itthu ikhwaawe yootepa ukhalana ifayita inlamuliyeenyu wuupuwela phi ila: ‘Ila itthu impheelaaka upankeela inaahala untteeliha nrima Yehova?’—Deuteronomiyu 32:29.
Yehova haana isariya yoonihimyeera isiyani ikhanle itthu yomaana ni yoohinamaana. Nacuwelaka sana-saana malamulwaawe ni mattharelelwaawe, ni hataa nalakelaka weettela, hiiva ninaatthenkaca moopuwelelweehu. Moopuwelelo phi ile innikavihera ucuwela itthu yooreera ni yootakhala. (Arooma 2:14, 15) Natthenkacaka sana-saana moopuwelelweehu, anaahala unikavihera ulakela upanka citthu comaana.
26 YO MAIO–1 YO JUNHO
MIHAKHU CO NNUULUMONI NA NLUKU MIRUKU 15
Mwaakavihere akhunaninyu ukhala ootteeliya
Sentinela 15/11/2010 ipaag. 31 iparaag. 16
Moonihere ukhala ntthu eemaani!
16 Jó aari ntthu aawaakhela aletto. (Jó 31:31, 32) Hataa nihikhalanaka mihakhu, hiiva pooti ‘wankhaleehu atthu oowaakhela aletto.’ (Aroo. 12:13) Pooti waanamelaneehu akhunanihu ile irineehu, nuupuwelaka wiira “phataari ulya mathapa mapura aatthu anfentana, uhiya ukhuura inama mapura aatthu anthanyana.” (Miru. 15:17) Ulya iyoolya naatthu eemaani ni anfentana pooti ukhala vakaani ikhanle itthu yootteeliha nrima ni ninaalipa nhina mminepani.
Sentinela 04/2018 ipaag. 23-24 iparaag. 16-18
“Nhihiyerere waalipiha mayamunna khula nihuku”
16 Wakhala wiira nyuuva nnoopuwela wiira khannokhitiri wuuluma ni mananna onlipiha ntthu, mmananihe unsalaamiha ntthuuyo mwanthyaanaka. Wakhala wiira ntthuuyo khanthyaa, nyuuva nnaahala ucuwelela itthu immwiira. Ni mwanviriyanaka saana, ntthuuyo naahala woona ukhala oolipihiya.—Tiya. 1:19.
17 Amunna amoca aneehaniya Henrique yaarina myaakha 20, yaahokhala ooriipiya nrima ukati amucyaawe waahiilyaaya ukhala Masaahiti a Yehova, venci-venci athumwanaya yaari humu. Vano, mootoli mmoca oosirikwiitu aahowoopana mwaha ni aahaaviriyana saana mananna yeecoonaaya. Naayo manannaayo, munna Henrique yaahokhala oolipihiya. Uyo ukatyuuyo, ayo yaahonanela wiira inanna imoca yowaakavihera amucyaaya uturuwela ukhala Masaahiti a Yehova waari uhihiyerera uvilela. Ni ciicammo itthu yaakavihenre waari usoma Isaalimu 46; Sofoniya 3:17; ni Markus 10:29, 30.
18 Ntakihero naanuunu Márcia ni naamunna Henrique ninawoonihera wiira pooti wanaalipiheehu mayamunna ampheela ulipihiya. Mwene Salomau hantikha co: “Waakhula saana unaatteeliha nrima; ni nuulumo nomaana nowuulumiya ukati woophwanelana ninaareera venci.” (Miru. 15:23, 30.) Itthu inlamuliyeehu upanka ukhanle wiipa nkhayi icipo coolipiha, waasomela myaha co nrevistani Ukhalenla ni “uhihiyerera wiitthucihana ni ulipihana nanttottopelaka Yehova ni nimwiipelaka icipo wanitteel aka nrima. Nhihiyerere umwiipela Yehova ninrimeenyu wotheene.”—Akolos. 3:16; Mite. 16:25.
Ikano cowiipithya co mbiibiliyani
Perguntas Bíblicas Respondidas mwaha 39 iparaag. 3
Makristau pooti wantothaaya ukaviheriya nimeetiku?
2. Kiireke kihaana utotha ikano wameetiku? Utotha ikano “nipuro nincivale atthu enci anvaha miruku” pooti wuukaviherani, venci-venci wakhalaka wiira ireetta irineenyu ikhanle yowoopiha.—Miru. 15:22.
2-8 YO JUNHO
MIHAKHU CO NNUULUMONI NA NLUKU MIRUKU 16
Makoho mararu annikavihera ulakela upanka citthu comaana
Sentinela 15/01/2014 ipaag. 19-20 iparaag. 11-12
Nlakele upanka citthu comaana nnari mmirawo
11 Ninkhalana utteeliya cinene nanswalelaka Yehova. (Miru 16:20) Baruque, ankaviheraka Jeremiya, unawiira aaholiyala iyo itthwiiyo, kontha wahophiya ukati waahilyaawe unswalela Nluku wantteelaka nrima. Yehova ahomwiirela co: “Untotha citthu cimpheela paahi. Uhitothe-tho, kontha phimiiva kinwaana citthu cotheene cimpheela . . . ni kinaahala wuutthuvela muukumini waa citthu cotheene cimpheela.”(Jer. 45:3,5) Moonelweenyu, isiyani yaahala umwiiriha Baruque ukhala ootteeliya? Niireke utotha ukhalana citthu cinci awula woopwa ukati waahalaaya ukwanyulaciya Yerusalemu khampa nswali ookhuluvelya a Yehova?–Tiya. 1:12
Sentinela 15/09/2013 ipaag. 17 iparaag. 1-3
Weeva uhopanka marukunuso
Cihaavo citthu cootepa ukhalana ifayita muukumini wihu uvikana mananna ninlakeleehu itthu yoowara ni yoolya. Wootakihera, hiiva ninuunuwa niitthucihiyaka naasipaapeehu wiira cihaavo citthu comaana ni coohinamaana.
Ibiibiliya inaahimya wiira hataa atthu ahincuwela malamulo a Nluku anaatthara hataa ahicuwelaka.(Aroo 2:14) Vano wakhalaka wiira Ibiibiliya khinhimya ratta-raatta itthu yootthara? Niireke nihaana nittharaka citthu atthu ontuninyani cinttharaaya? Cihaavo citthu piili cofayita cinwiiriha makristau uhuupuwela iyo inanneeyo. Yoopacera, Ibiibiliya inaanuupusera yeeraka: “Ihaavo iphiro pinaatamu noonihaawe khampa yomaana, masi inwaana ukhwa.”(Miru 16:25) Yonayeeli, Ibiibiliya inawoonihera wiira citthu atthu o ila ituninyeela cineettelaaya cinhooleliya ni Sotwani, “Nluku o ila ituninyeela”. ( 2 Akor 4:4; Joau 5:19)
Ikano cowiipithya co mbiibiliyani
Perspicaz vol. 1 ipaag. 708
Ulakiya
Itthu ineerannya nlattu wo wiiwelela ni itthu ineerannya nlattu woohiiwelela. Alolo awula atthu arina makhalelo oohiloka, anawoonihera wiira cinawaarusa ikano ca Yehova, akhottaka utthara. (Isaa 50:16, 17; Miru 1:7) Itthu inwiirannyeela ayo alolwaayo nlattu woohiiwelela, inawaalaka awula inaawiitthuciha wiira itthu impankaaya ikhanle yoohinamaana, kontha anaattarusiya. Khampa cinhimyaaya Miruku 16:22: “Ulakiya wa alolo unkhala uttarusiya nuulolwaaya.” Ayo anawiiwiihera mwaasineenyaaya uhuva, uhihisimiya, iretta ni mpaka ukhwa woohicuwannyaaca.
9-15 YO JUNHO
MIHAKHU CO NNUULUMONI NA NLUKU MIRUKU 17
Nkhalane nnema watthokoni winyu
Despertai! 9/2014 ipaag. 11 iparaag. 2
Manannani oohisunka nrukwa
Mwiiweheehe saana. Ibiibiliya ineera wiira atthu akhwaawe akhanle “ooviruwaca ni unawaacivela nkhitto.” (Miru. 29:22) Niireke nyuuva ciicammo nhaana ayo makhalelwaayo? Mwiikohe co: ‘Kiireke kinaasunka nrukwa? Kikhanle ntthu oohipica uviruwa? Unaakicivela upanka nkhitto hataa cikhalaka citthu cooyevaca?’ Ibiibiliya ineera co: “Ule nopharelela wuuluma mwaha mmoca, nawaakawaniha apatthani omaana.” (Miru. 17:9; Ekles. 7:9) Iyo pooti ukhumelela watthokoni. Vano, wakhala wiira nyuuva unawuucivelani usunka nrukwa, mwiikohe co: ‘Kiireke miiva kalamuliya utepa waavilela awannyaka?’—Ikano yo mbiibiliyani: 1 Peturu 4:8.
Sentinela 1/05/2008 ipaag. 6-11 iparaag. 1
Mummalihe nanrokottole
1. Nkumihe ukati wiira mummalihe nanrokottole. “Uhaavo ukati woovara citthu cotheene, . . . ukati woomala ni ukati wowuuluma.” (Ekles. 3:1, 7) Khampa cincuweleehu, unyakulihana khampa cihimiyaaya pooti unkumiherera nanrokottole ni umwiiriha ntthu ukhala moopuwelelo oohiloka. Yaakhumelelaka iyo, unaareera wiiweheeha saana ni waahimeerya mwaarinyu awula awannyinyu wiiru phataari umaala wohuulumaca itthu. Nyuuva nnaahala ukhitiri unyeva ukumiherera citthu caahala uwaana uhiwanana watthokoni mwavaresesaka ikano yo mbiibiliyani ineera: “Upacapaca inttewo unlikanaca nuutthukulela maaci; unaareera ukhume uhinaaya wancera unyakulihana.”—Miru. 17:14.
Masi ciicammo uhaavo ukati wowuuluma.” Khampa miri cinoonuwacaaya cahinnyaka, nanrokottole pooti wuunuwaca mwanhiyaka muupuwelaka wiira haana umalamala. Wakhala wiira nhohiyerera mwahooyo, moonihere amwaarinyu awula awannyinyu ihisima mwathanlaka ukati woohala uturuwela woopela-tho mwaha. Upanka commo, unaahala wuukaviherani weettela ikano yo mbiibiliyani, ineera: “Nhihiye naakelaka ncuwa nnaviruwile.” (Efesu 4:26) Khweeliini, nhaana uhihiyerera.
Ikano cowiipithya co mbiibiliyani
Ukhalenla 06/2023 ipaag. 20-21 iparaag. 3
Nhihiyerere ukumihera ifayita umoova winyu Yehova
Itthu yofayita inniiriha ukhikicera nrimeehu, ukhalaka wiira Yehova nawoona nrimeehu. Maanaaya wiira woovirikana naatthu akiina anoona paahi irutthwiihu, Yehova naakhitiri woona nrimeehu. (Nsome Miruku 17:3.) Nacarihaka mmuru wihu ikano ca Yehova, uyo naahala unifenta ni univaha ukumi woohimala. (Joau 4:14) Naayo manannaayo, citthu cowoothiya ca Sotwani, khacinhala uniiriha upanka citthu coohiloka kontha khaninhala uhiyera ikhato mmuru wihu. (1 Jo. 5:18, 19) Ukati untepeehu umwaattamela Yehova ninaatepa unfenta ni unhisima, hi ninawaafenta apaapeehu Yehova mpaka unaanirusa cinene wuupuwela upanka itthu inaarusa. Nattehattehiyaka wiira nipanke itthu yootakhala, neemenle ni nuupuwele: ‘manannani mi kaahalaaka unriipiha nrima ntthu koonihenre nifento ikwaha cinci?’—1 Jo. 4:9, 10.
16-22 YO JUNHO
MIHAKHU CO NNUULUMONI NA NLUKU MIRUKU 18
Muulume nimananna anhala unlipiha ntthu nowerennya
Ukhalenla 10/2022 ipaag. 22 iparaag. 17
Ucuwelaca weekhweeli unaakhuwela
17 Mupuwele nhinaaya wuuluma itthu. Naahiivaraceke, hiiva pooti waawereeha nrima akhunanihu nlattu wo moolumweehu. Ibiiblya ineera: “Moolumo oohuupuweliya ratta ankhala toko uhoma wosoowa. Masi moolumo aatthu oocuwelaca anaavoniha.” (Miru. 12:18) Hi ninaakhala ninnema naakhunanihu naahiwuulumeke pusya nlattu wo citthu cinvonyaaya. (Miru. 20:19) Wiira moolumweehu aavonihe akhunanihu uhiya waarakaliha, nihaana nicarihaka wanrimani wihu ucuwelaca wo nnuulumoni na Nluku. (Luka 6:45) Nakumihaka ukati wiira nuupuwele cinene itthu inhimyaaya Ibiiblya, moolumweehu anaahala ‘waaphwanyiha ucuwelaca’ ni waatteeliha nrima akhunanihu.—Miru. 18:4.
Outros Assuntos mwaha 19 ikwaaturu
Munviriyane ratta. Inanna imoca yonkavihera mpatthaniinyu nowerennya ukhanle unviriyana khula ukati unuulumaawe. Nhoonihe wiira nhaana umwaakhula citthu cotheene cinhalaawe wuuluma. Unviriyana paahi unaatosa. Munviriyane nhinhukhumu. Nhimananihe unhimerya itthu immwiira venci-venci wakhalaka wiira khanvitha-vitha iretta inonweryaa.—Miru. 11:2
Mmuulumane citthu cinhala unlipiha. Watthunaka nyuuva pooti uhoona yowuuluma. Muulume moolumo anhala uncuweliha wiira nyuuva nnaacuwela itthu immwiira. Wuuluma iyo inanneeyo, watthunaka pooti unlipiha cinene uvikana umaala paahi. Wakhalaka wiira unawuurikelani wuupuwela moolumo oopheela unlipiha, pooti unoolumeenyu moolumo oohirika khampa: “Mi akinoona yoohala wowuuluma, masi kimpheela wuuhimeerya wiira miiva kinaapheela wuukavihera.”
Munkavihere ni citthu cinkhalaneenyu. Nhinaaya unkavihera, munkohe isiyani impheelaawe wiira munkavihere. Pooti ukhalaka wiira khampheela ukaviheriya kontha khampheela waavariha nteko atthu akhwaawe. Wakhalaka wiira phineeraawe, nyuuva pooti unkavihera niinanna ikhwaawe, khampa urwaa unthumela itthu awula unkavihera ukweca wapuwani wawe.—Akalas. 6:2
Nhihiyerere. Nkupali wiira mpatthaniinyu naawerennya cinene. Phimaana, watthunaka naahala ulakela uhirweehela uhoolo citthu mwaalakelacileenyu upanka nkhayi. Yiirannyaaka iyo, nhihiyerere unkavihera.—Miru. 18:24
Sentinela 1/2023 ipaag. 14 iparaag. 3 ipaag.15 iparaag. 1
Wuupuwela: manannani oonkavihera ntthu ukhalana moopuwelelo omaana
“Mwamaalihe ale ari ooriipiya nrima.” —1 ATESALONIKA 5:14.
Watthunaka mpatthaniinyu ri niiwasiwaasi awula neecoona uhikhalana ifayita. Hataa nhoonaka yoohimya, nyuuva pooti unlipiha ni ummaaliha mpatthaniinyu mmooniheraka wiira nnanwacera.
“Mpatthani omaana naafenta ukati wootheene.”—MIRUKU 17:17
Munkavihere. Masi uhiya wiihelanaca wiira nnaacuwela inanna yonkavihera, munkohe isiyani impheelaawe wiira munkavihere. Wakhala wiira mpatthaniinyu nawoova uhimyaa itthu impheelaawe, pooti unlattula upankaca itthu nkhayi, khampa weettakaca nkhayi. Awula pooti unkavihera urwaa unthumela itthu, unkaviha ukweca awula itthu ikhwaawe.—Akalas. 6:2
“Nvilele.”—1 ATESALONIKA 5:14.
Kahi wiira ikwaha cotheene mpatthaniinyu naahala uwoopanani mwaha. Nkupali wiira uyo naahala wuuhimeeryani itthu immwiira atthunaka. Nlattu wo reetta inonwerya , mpatthaniinyu atthunaka nawuulumelani awula nawuupankani itthu yoohinamaana. Uyo pooti ulakela umaliha itthu mwaalehaneenyu upanka ni nyuuva awula wuuviruwelani. Nkhale ntthu oovilela ni munviriyane saana ukati wonkavihera.—Miru. 18:24.
Ikano cowiipithya co mbiiblyani
Perspicaz vol. 2 ipaag. 1057
Mwaavi
Mwaavi yaari ilema yaapankiya khalayi wiira ulakeliye umalihiya mwaha. Wiira upankiye mwaavi yaacisiya maluku ooyevaca awula ithaapwa co miri ni co maluku phiivoreliyaka nkuwoni hipaceriyaka ucukuciya. Vano, yaamoreeyo phaacisiya. Mwaavi waakhala khampa ulaphiya walompiyaka.”—Jos 15:1; Isaa 16:5; 125:3; Isai 57:6; Jer 13:25.
Ilema. Miruku 16:33 neera: “Mwaavi wampankiya, masi Yehova phaalakela itthu yoohala upanka.” Asarayeli, yanvarela nteko mwaavi wiira ammalihe nanrokottole. “Maavi wammaliha itthu ni mpaka waanaamwalaniha atthu oolipa.” (Miru 18:18) Khawaavareliya nteko wiira uthwelelihiye awula upankiye ijooku paahi ni khawaavareliya nteko wiira apankiye suuku ni wiira ntempulu cikhale citthu cinci ni anankuttho apuhe. Woovirikana, anatoropa oorooma yaahovarela nteko wiira aphwanyeere mihakhu khampa caahimiyaaya nhina Isaalimu 22:18, wiira yanhala upanka mwaavi yavarelaka nteko ikuwo ya Yesu.—Mat 27:35.
23-29 YO JUNHO
MIHAKHU CO NNUULUMONI NA NLUKU MIRUKU 19
Nkhale apatthani okhweeli ni mayamunneenyu ni mayanuunwiinyu
Ukhalenla 11/2023 ipaag. 12-13 iparaag. 16-17
Ninhala ulipihaca cani waafenta wihu mayamunneehu?
16 Nihaana uweheeha makhalelo omaana mayamunna arinaaya, uhiya uweheeha paahi citthu cinvonyaaya. Atthunaka nyuuva nnaarwaa ufestani yankaani itthenkacilyaaya mayamunna. Nyuuva nnaathukathuka nimayamunna ni wiimaleloni nnaakumiha ifootu niikhurupu yotheene. Masi nnaalakela-tho ulatha ifootu piili wiira imoceeyo yaahilokeke, atthunaka piilinnyo cinaahala ukhuma ratta. Vano nrina ifootu tthaaru. Ukati wowoona nnyo ifootunnyo, nyuuva nnawoona wiira ifootu imoceeyo, haavo munna hikhumile ratta nfootunimmo. Mwaahala upankani iyo ifootwiiyo? Nyuuva nnaafutta, kontha nnaacuwela wiira cihaavo piili cikhumile saana, uyo munnooyo khumenlyaawe narenre ni athyaaka sana-saana.
17 Vano, nlattanihe nnyo ifootunnyo ni citthu ciirannyeele cinoopuweleenyu. Cihaavo citthu comaana ciwiirannyenleni nimayamunneenyu nyuuva cinoopuweleenyu. Masi atthunaka nnawuupuwela ikwaha imoca munneeyu awula nuunwiinyu oolumilyaawe itthu yowuuriipihani nrima. Nyuuva nnaapheela ukhanyerera wuupuwela iyo itthwiiyo? Nlattuni uhinfuttheenyu mmuru winyu iyo itthwiiyo toko caahaleenyu ufuttha ifootu yoohiloka? (Miru. 19:11; Efesu 4:32) Nyuuva mweekurumicaka wuupuwela paahi citthu comaana cuwiirannyenleni nkhayi nuuyo munnooyo, khannohala uwacera itthu yowuuriipihani nrima yoolumilyaawe. Citthu comaana cinoopuweleenyu phi citthu cinhaleenyu upheela usunka mmuru winyu.
Ukhalenla 07/2023 ipaag. 9-10 iparaag. 10-11
Nhihiye woonihera nifento
10 Hiiva ciicammo ninawaavyaavya mananna owaakavihera mayamunneehu. (Mabere. 13:16) Moone ntakihero naanuunwiihu Anna, aromoliye mwaha uvinre. Uvira wawe sikolooni, ayo ni awannyaya yaahorwaa uthotola inupa yaakhala amuci Masaahiti a Yehova ni yahoona wiira waculu waya inupeeyo yahokwanyulaciya. Nlattu wo iyo itthwiiyo ayo khayaarina ikuwo coowara comaana. Anuunu Anna aheera: “Hi nahokusa ikuwo wiira nakatthe ni naaturusile ninenkomanri ni ninapinttacile. Moonelweehu, kanaapankile itthu yuulupale, masi nlattu wo iyo itthwiiyo hiiva nihaana upatthani woolipa mpaka nna.” Nifento arinaaya anuunu Anna ni awannyaya, nihaakurumica waakavihera mayamunnaaya.—1 Jo. 3:17,18.
11 Nakhalaka atthu ooreera nrima ni naafentaka akhwiihu, ayo pooti woonenela wiira hiiva nimmananiha untakiha Yehova. Ikwaha cikiina hiiva pooti wahincuweleehu mananna ayo cinvahaaya ifayita wiikurumica wihu. Anuunwiihu Khanh yuulumiye wiipaceroni, anawuupuwela ayova mananna yaawaceriyaaya ni mayamunnaaya. Ayo aheera: “Mi kinawaasukhuru mayanuunu yaakikusaka wuulalyaani. Ayo yankiweela uwaani wiira kaalyaane ni yankiturusela uwaani. Ilelo mi phinoonaaka wiira ayo yanvara nteko cinene. Ni ayo yapankaka yooniheraka nifento.” Khweeliini khunakhala wiira atthu otheene anaavareleehu citthu anaahala usukhuru. Anuunu Khanh anaawuuluma mayanuunu yaakavihenre yiiraka: “Mi wankicivela kinaapankenle ciicammo citthu cotheene akipankenlyaaya, masi akincuwela unkhalaaya. Masi Yehova naacuwela, phimaana mi kinanlepela wiira aakavihere itthu mi kihinkhitiryaaka upanka.” Anuunu Khanh anhimya ikhweeli. Yehova naaweheeha citthu cotheene cimpankeehu noonihera nifento hataa cikhalaka citthu cooyevaca. Uyo naavaha ifayita wiikurumica unoonihereehu ni niwehera khampa ninankopiha ni naahala uniliva.—Nsome Miruku 19:17
Ukhalenla 11/2021 ipaag. 9 iparaag. 6-7
Nhihiyerere wooniherana nifento nookhuluvelya
6 Atthu enci aneera wiira nanteko o wampereesa nolokela myaakha cinci khanle nanteko ookhuluvelya. Masi pooti ukhalaka wiira myaakha cotheene civinre, uyo ntthuuyo khatokile waacuwela ahooleli o wampereesa. Ni atthunaka ukati wotheene uvinre, uyo khakupanli malamulo o iyo impereeseeyo. Uyo nantekooyo khinoncivela iyo impereeseeyo, masi uyo mpheela uvara nteko paahi wiira apokhere nsurukhu. Uyo khanhiya uvara nteko iyo impereeseeyo mpaka wanhalaawe uphwanya iraforma awula uphwanya nteko nkhwaawe woncivela.
7 Khampa coonaleehu muntakiheroni nomparaagarafuni 6, nifento nookhuluvelya nihaana nilipiheriyaka niitthu hiiva irineehu wanrimani. Nhantisini co mbiiblyani, isiyani yaakurumica aswali a Nluku waathoonyihera akhwaaya nifento nookhuluvelya? Ale anaathoonyihera akhwaaya nifento nookhuluvelya, ampanka iyo kahi nlattu woorumiya, masi nlattu woopheela. Mmuupuwele Davidi. Uyo aanaacuwela wiira mwene Sawuli, athumwaane Jonataa, yaapheela umwiiva. Waahookhalaru commo, nrima wa Davidi wahonkurumica unthoonyihera nifento nookhuluvelya Jonataa, mpatthannyaawe ancivela cinene. Ni uvira waya myaakha cinci Jonataa nakhwile, Davidi khaahiile umoonihera nifento nookhuluvelya Mefiposeti, mwaana a Jonataa.—1 Sam. 20:9, 14, 15; 2 Sam. 4:4; 8:15; 9:1, 6, 7.
Ikano cowiipithya co mbiibiliyani
Perspicaz vol. 1 ipaag. 549
Ikano
Yehova khanle mwaneene ucuwelaca weekhweeli. Phimaana, uyo khanweherera uvahiya ikano niitthu nkhwaawe. (Isai 40:13; Aroo 11:34) Mwanawe ankhitiri wuupuwela khampa navahaaha ikavo omaana, aatthara malakihero ni ikano caakhelaawe naathumwaane ni aarina nnepa wa Nluku. (Isai 9:6; 11:2; Joau 5:19, 30) Iyo inaahimya wiira wakhalaka wiira ikanweeyo ni naaweettela saana, ahaana ulakela yattharaka ikano ca Yehova. Khula ikano inonvanyiha Yehova khirina ifayita. Khinakhala ikano.—Miru 19:21; 21:30.
30 YO JUNHO–6 YO JULHO
MIHAKHU CO NNUULUMONI NA NLUKU MIRUKU 20
Isiiri coopheela ucuwelana nhinaaya uthelanaca
Ukhalenla 05/2024 ipaag. 26-27 iparaag. 3-4
Munttitthimihe Yehova ukati unviriheenyu ncuwelanaka nhinathelana
3 Khweeliini, ukati nnocuwelaneenyu nhinaaya uthelana ukhanle ukati wootteeliha nrima. Masi ucuwelana nhinathelana ikhanle itthu yuulupale cinene. Nihuku ninhaleenyu uthelanaca, nyuuva nnaalapha uhoolo wa Yehova wiira nnaahala ufentana ni uhisimana ukati wotheene unhaleenyu ukhala nuukumi. Ni khweeliini, nhinaaya ulapha awula ukhuluveliha iyo itthwiiyo, nhaana mpacaka wuupuwela ratta. (Nsome Miruku 20:25.) Phimaana, ale ampheela uthelana ahaana yapacaka ucuwelana wiira alakele itthu yomaana. Ukati nkiina, ayo pooti ulakela uthelana. Masi ikwaha cikiina, ayo pooti ulakela uhithelana. Ni yalakelaka uhithelana khunakhala wiira ukati uvirihilyaaya yoopaka mwaha ni yacuwelanaka khuwaakhumenle saana. Hataa yalakelaka uhithelana, ukati ukhanlyaaya yacuwelanaka uhaakhumela saana, kontha ayo ahokhitiri ulakela itthu yomaana.
4 Unaareera ucuwela nlattuni atthu eeli unlamuliyaaya ucuwelana ahinathelana. Kontha isiyani? Kontha ntthu khanhala upacera umoopana mwaha ntthu ooniheraka uciveliya nuuyo hipheelaka unthela awula utheliya nuuyo. Kahi paahi atthu oohithela, masi otheene cihu nihaana nicuwelaka nlattuni nthiyana ni nlopwana anlamuliyaaya uviriha ukati yacuwelanaka ahinaaya uthelanaca. Wootakihera, akiina anoopuwela wiira atthu eeli yanceraka woopa mwaha wiira acuwelane, ahaana yathelanacaka ni khanlamuliya uhiyana wiira amwaavye ntthu nkiina. Masi iyo inanna yo wuupuweleeyo pooti waawaanela masakha makristau ahinaaya uthela. Manannani? Nrokorihu mmoca neehaniya Melissa nokhala u Estados Unidos heera: “Ale ancuwelana wiira athelane anaakhanyererihiya cinene uthelana, mpaka ahaavo anoova uhiyana, hataa yoonaka wiira ntthuuyo kahi phi nthiyana awula nlopwana yampheelaaya. Ni ahaavo unaarika wancera umoopana mwaha ntthu wiira ancuwele ni wahoolo anthele. Kontha ayo anawoova ukhanyererihiya unthela ntthuuyo, hataa yoonaka wiira kahi phi ntthu ampheelaaya.”
Ukhalenla 05/2024 ipaag. 22 iparaag. 8
Nnohala umphwanya cani ntthu oohala unthela awula wuuthelani?
8 Masi nnohala unweheeha cani ntthu uyova woohicuwelela? Nyuuva pooti unweheeha umikutthaanoni awula uyo ntthuuyo akhalaka nipuro nithukumanneenyu ni mayamunna awula mayanuunu wiira nthukathuke. Uyo unkhala ukati unlamuliyeenyu unweha ntthuuyo meettelwaawe, wakhala wiira haana upatthani woolipa ni Yehova ni makhalelwaawe. Mwiikohe co: ‘Asimpwanaawe phaapani? Myahani cinoopaawe akhalaka naasimpwanaawe?’ (Luka 6:45) ‘Mipika cawe ni mipika caka miiva cinaavirikana?’ Pooti uwuulumana mahumu o wanlokoni nawe uyo ntthuuyo awula pooti umuulumana nkristau nkiina ookhomaala noncuwela saana ntthuuyo. (Miru. 20:18) Ciicammo, pooti waalepela atthu akhwaawe anoncuwela wiira yuuhimeryeni meettelwaawe ntthuuyo. (Ruti 2:11) Ukati wonweheeha ntthuuyo, nhiliyale wiira khawaahala ureera untthara-tthara mapuro otheene anviraawe wiira moone citthu cotheene cimpankaawe. Mmoonihere ihisima ntthuuyo ni nhiliyale wiira khula ntthu haana isiiri cawe.
Ukhalenla 05/2024 ipaag. 28 iparaag. 7-8
Munttitthimihe Yehova ukati unviriheenyu ncuwelanaka nhinathelana
7 Isiyani inhala wuukaviherani uncuweleeha ntthuuyo? Inanna imoca yoncuweleeha ukhanle unkoha ntthuuyo ni unviriyana saana ukati unoolumacaawe. (Miru. 20:5; Tiya. 1:19) Phimaana, pooti nyuuva wanlakeleenyu upanka citthu nkhayi wiira nkhalane ukati woopheela woopaca mwaha, pooti ulya nkhayi awula uvira mwettakacaka nkhayi ni ulalyeera nkhayi. Nyuuva ciicammo pooti woonelelaka citthu cikhwaawe mwavirihaka ukati mwinci nwopanaka mwaha asipatthannyaawe ni asimucyaawe ntthuuyo. Mmananihe utthenkaca nteko unhala uwiirihani ooyeeli ukhala nipuro nimoca wiira moone mananna cinkhalaawe, citthu cimpankaawe akhalaka nipuro nicanre atthu ovirikana. Moone itthu Andrew, nookhala u Holanda, yamananihilyaawe upanka ukati wancuwelaawe Alicia: “Hiiva naahothanla uvara miteko nkhayi wiira nicuwelane saana. Ukati mwinci naapanka citthu cankaani toko waapyaaca nkhayi ni uvara miteko cikiina co wapuwani nkhayi. Ukati waapankeehu nnyo citthunnyo, nankhitiri woona makhalelo omaana khula ntthu yaarinaawe ni citthu cikiina cinvonyihaawe.”
8 Nyuuva ciicammo nnaahala ukhitiri ucuwelana saana mwasomaka Ibiibiliya nkhayi. Mwathelanaka, nhaana nrwaaka waavyavya nihuku wiira mpanke uswali waamuci. Nluku haana ukhala nipuro noopacera watthokoni winyu. (Ekles. 4:12) Phimaana, yaahala ukhala itthu yomaana upacera usoma nenna co ukati nnocuwelaneenyu. Ninaacuwela wiira ucuwelana khunakhala umuci. Kontha munnooyo khanaaya ukhala nhooleli otthoko, ukhala wiira khannaaya uthelana. Uhookhalaru commo, mwasomakavale nkhayi woohihiyerera, nnaahala ucuwela mananna ciryaaya upatthannyaawe khula ntthu ni Yehova. Max ni Laysa, ankhala u Estados Unidos ahoonelela ifayita ikhwaawe. Munna Max heera: “Ikhumelo ukati naapacereehu ucuwelana, hiiva nansomaka ilivuru cihu cooluma myaha toko ukati atthu eeli uncuwelaana ahinaaya uthelana, uthelanaca ni umuci. Usoma nnyo ilivurunnyo uhonikavihera woopela mwaha citthu canirikarika wuuluma.”
Ikano cowiipithya co mbiibiliyani
Ukhalenla 10/2022 ipaag. 22 iparaag. 17
Ucuwelaca weekhweeli unaakhuwela
Muupuwele nhinaaya wuuluma itthu. Naahiivaraceke, hiiva pooti waawereeha nrima akhunanihu nlattu wo moolumweehu. Ibiibiliya ineera: “Moolumo oohuupuweliya ratta ankhala toko uhoma wosoowa. Masi moolumo aatthu oocuwelaca anaavoniha.” (Miru. 12:18) Hi ninaakhala ninnema naakhunanihu naahiwuulumeke pusya nlattu wo citthu cinvonyaaya. (Miru. 20:19) Wiira moolumweehu yaavonihe akhunanihu uhiya waarakaliha, nihaana nicarihaka wanrimani wihu ucuwelaca wo nnuulumoni na Nluku.(Luka 6:45) Nakumihaka ukati wiira nuupuwele cinene itthu inhimyaaya Ibiibiliya, moolumweehu anaahala ‘waaphwanyiha ucuwelaca’ ni waatteeliha nrima akhunanihu.—Miru. 18:4.