Ireferensia co Mwaalivuru o Mikutthaano Makhalelo ni Miteko Ceekristau

© 2025 Watch Tower Bible and Tract Society of Pennsylvania

7-13 YO JULHO

MIHAKHU CO NNUULUMONI NA NLUKU MIRUKU 21

Ikano comaana cimphwanyiha utteeliya watthokoni

Sentinela 15/10/2003 ipaag. 4 iparaag. 5

Ninhala ulakela cani citthu coohala upanka nimananna omaana?

Ulakela upanka itthu wowaakuvyaaca pooti woonihera ukhala ntthu oohankhili. Miruku 21:5 neera: “Citthu cinlakelaawe upanka ntthu hinnyoonyaciya cinankhumela saana, masi atthu otheene anaakuvela upanka itthu woohipaca wuupuwela ammalela ukhala amasikhini.” Wootakihera, amirawo ancivelana anlamuliya uviriha ukati wiira alakele wakhala wiira anaahala uthelana awula mena. Yaahipanke commo, pooti uwiirannyeela itthu imocaaru yaahimilyaawe namakumiherera idrama o iseekulu 18 eehaniya William Congreve. Uyo eenre: “Ntthu naakuva uthela woohuupuwela, naattharuwa cinene.”

Ukhalenla 07/2020 ipaag. 3 iparaag. 3-5

Nyuuva nneewehera cani?

³ Yehova humpa itthoko wiira nlopwana ni nthiyana akhale ootteeliya. Masi nlattu woopahuwa, anamathelana atthunaka pooti unyakulihana. Phimaana Paulu wantikhilyaawe wiira anamathelana yanhala waakhumelela marikariko. (1 Akor. 7:28) Atthu akiina anawoona wiira khula ukati anaanyakulihana naawanuwaya awula naamwaaraya. Phimaana anawancera wuupuwela wiira phataari ahithelanacale. Ayo atthwaayo yattharaka moopuwelelo ontuninyani, woohipica anaahala wuupuwela wiira anlamuliya umwalanaca. Ni anaahala wanca wuupuwela wiira itthu yuulupale cinene ukhanle ayova utotha utteeliya veekha caya paahi.

⁴ Nihaana nikhottaka wuupuwela wiira uthelanaca wihu khulokale. Hiiva ninaacuwela wiira itthu imoca Ibiiblya inhimyaaya wiira phinontthunihera ntthu umwalanaca, ukhanle uraruwa. (Mat. 5:32) Phimaana, yakhumelelaka marikariko apostolu Paulu ahimyalyaawe, khaninlamuliya wiicoona ni wuupuwela co: ‘Uno uthelanacoono khunkitteeliha-tho nrima. Miiva akinfentiya toko cinkiphwanelaaya. Atthunaka miiva waahala ukitteela nrima kinanthenle awula nakithenle ni ntthu nkhwaawe.’ Nhoona itthu inthoonyeraaya ayo moopuwelelwaayo? Nuulumo nimoca nihinhaleela nhina ayo moopuwelelwaayo nikhanle miiva. Ucuwelaca wo ntuninyani uneera wiira nyuuva nhaana nttharaka nrimeenyu ni utotha utteeliya winyu. Masi ucuwelaca wa Nluku uneera wiira nyuuva nhaana ntothaka kahi ‘citthu cinoocivelani paahi, masi ciicammo nhaana ntothaka citthu cinaacivela akhunaninyu.’ (Afili. 2:4) Yehova nopheela wiira nlipihace uthelanaca winyu ni nhimwalane. (Mat. 19:6) Unaareera venci uhoolelihera umuupuwela Yehova, uhiya wiicuupuwela nyuuva.

⁵ Nlopwana ni nthiyana oothelanaca ahaana yawaceranaka ni nifento ni uhisimana. (Nsome Efesu 5:33.) Ibiiblya ineetthuciha wiira uvaha unaareera uvirikana ni waakhela. (Mite. 20:35) Ikhaleloni inhala waakavihera anamathelana ufentana ni uhisimana? Wiiyeviha. Nlopwana ni nthiyana oothelanaca yeeyevihaka khantotha citthu cinaacivela paasi, masi anaatotha ‘itthu inomphwanyiha ifayita nkhwaaya.’—1 Akor. 10:24.

Sentinela 15/09/2006 ipaag. 28 iparaag. 13

“Yuutteelihe nrima amwaaraa eemirawaa”

¹³ Wakhala wiira ikacamentwiinyu khineetta saana nlattu wo mananna anwaceraneenyu, mwiikurumice ureherera. Wootakihera, nlattu woohikhitiri wuuluma nuunamaana, atthunaka phiniiriha uhiiwanana watthokoni. (Miru. 12:18) Ikano imoca yo mbiibiliyani ineera: “Phataari ukhala muuthakoni, uhiya waakhalana athiyana oonyoonyiha.” (Miru. 21:19) Wakhala wiira nyuuva nkhanlee athiyana ootheliya ni itthokweenyu khineetta saana, mwiikohe coo: ‘Kiireke makhalelwaaka anaawiiriha awannyaka waarikela ukhala ni mii?’ Ibiibiliya inawaakurumica alopwana, yeeraka: “Nkhanyerere waafenta asaarinyu ni nhitepe waaviruwela.” (Akol. 3:19) Wakhala wiira nyuuva nkhanlee ntheli, mwiikohe coo: “Kiireke miiva kikhanlee ntthu ooviruwaca ni kinwiiriha amwaaraka upheela umwaavya ntthu oowiwananyaa? Uhimya ikhweeli, uluva khunommalamaliha nanrokottole watthokoni. Phimaana, yiirannyaaka iyo, unaareera woopela mwaha ananrokottole ankhumelela watthokoni mwalipaka nrima.

Ikano cowiipithya co mbiibiliyani

Ukhalenla 10/2021 ipaag. 12 iparaag. 16

Yehova Nlukwiihu “umwinciva ikiriri

¹⁶ Otheene cihu nimpheela untakiha Yehova ni uthoonyera ikiriri. Kontha isiyani? Kontha ninaacuwela wiira Yehova khanviriyana mavekelo aatthu ahinthoonyera ikiriri. (Nsome Miruku 21:13.) Hi khanimpheela wiira Yehova akhotte uviriyana mavekelweehu; phimaana, ninawiikurumica wiira nihikhale atthu ootakhala nrima. Namoonaka munneehu ahuvaka, hi khaninkhotta unwacera, masi ninawiikurumica khula ukati “unwacera mmasikhini.” Ciicammo ninaweettela ikano iri nhina Tiyaku 2:13: “Ntthu hinwoonela ikiriri akhunanawe naahala uhukhumwiya wohooneliya ikiriri.” Neeyevihaka nuupuwelaka wiira hiiva ciicammo ninaapheela wooneliya ikiriri, khaninhala ukhotta waathoonyera akhunanihu ikiriri. Ukati mmoca unlamuliyeehu uthoonyera ikiriri, ukhanle attharuwaka ni aturuwelaka wanlokoni ntthu aavanre matampi.

14-20 JULHO

MIHAKHU CO NNUULUMONI NA NLUKU MIRUKU 22

Malakihero omaana mananna oowuunuwiha asaana

Ukhalenla 10/2020 ipaag. 27 iparaag. 7

Asaaniinyu anaahala unswalela Nluku yoonuwaka?

⁷ Wakhala wiira nyuuva nhothela awula nhotheliya ni waanoocivelani ukhalana asaana, mwiikohe co: ‘Hiiva nikhanle atthu owiiyeviha ni ninanfenta Yehova? Niireke Yehova anhala univahacera unwacera mwaana ofayita cinene?’ (Isaa. 127:3, 4) Wakhala wiira nyuuva nhaana asaana, mwiikohe co: ‘Kinaawiitthuciha asaanaaka wiira wiikurumica uvara nteko inkhala itthu yomaana?’ (Ekles. 3:12, 13) ‘Kinneekurumica waakhikicera asaanaaka wiira cihaapanke pusya citthu coohinamaana ni cowoopiha co ntuninyani ya Sotwani?’ (Miru. 22:3) Nyuuva khannohala ukhitiri waakhikicera asaaniinyu wiira ahaakhumelele nanka masakha. Masi nyuuva pooti waafenta ni waatthenkaca vakani-vakaani, nwiitthucihaka utotha ikano co mbiibiliyani wiira arwee yacuwele waanana marikariko anhala waakhumelela muukumini waya. (Nsome Miruku 2:1-6.) Wootakihera, wakhala wiira haavo ntthu hiyale unswalela Yehova wapuwani winyu, mwaathoonyere asaaniinyu mbiiblyani wiira unvaresesa Yehova ikhanle itthu yofayita. (Isaa. 31:23) Awula wakhala wiira haavo ntthu khwile wapuwani winyu, mwaathoonyere asaaniinyu manannani nuulumo na Nluku cinnikaviheraaya uvilela ni ukhalana nnema wanrimani wihu.—2 Akor. 1:3, 4; 2 Tim. 3:16.

Ukhalenla 12/2019 ipaag. 26 iparaag. 17-19

Manyari—Nwiitthucihe asaaniinyu wiira anfente Yehova

¹⁷ Mwancere uwiitthuciha asaana ahinaaya wuunuwa. Manyari yanceraka waasomiha asaana ahinaaya wuunuwa, unaareera cinene. (Miru. 22:6) Mmuupuwele Timotiyu. Ukati woonuwalyaawe, uyo aheetta mapuro menci nkhayi ni apostolu Paulu. Anumwaane Timotiyu, Eunise, ni apiipyaawe, Loide, yahomwiitthuciha ‘ikhumelo inamwannyaawe.’—2 Tim. 1:5; 3:15.

¹⁸ Anamathelana akhwaawe o Costa do Marfim, Jean-Claude ni Peace, ahokhitiri uwiitthuciha unfenta ni unswalela Yehova asaanaaya siita. Isiyani yaakavihenre wiira akhitiri upanka iyo? Ayo yahotthara ntakihero na Eunise ni Loide. Ayo aheera: “Hiiva nahaaleehera Nuulumo na Nluku asaaniihu ikhumelelo inamwannyaaya. Nancenre uwiitthuciha ukhuma ukati waayanreehu.”—Deut. 6:6, 7.

¹⁹ ‘Waaleehera’ asaana maanaaya isiyani? Nuulumo noluuka iheperewu nitaphuleliye ‘waaleehera,’ maanaaya wiira “uturuwela wiitthuciha ikwaha cinci.” Wiira apanke iyo, ayari ahaana uhihiya uviriha ukati anari naasaanaaya. Ukati nkiina, uturuwela uwiitthuciha asaana itthu imocaaru unaanyoonya. Masi ayari anlamuliya wiikurumica uwehera wiira uyo ukhanle ukati woohala waakavihera asaanaaya wiiweeha ni weettela Nuulumo na Nluku.

Sentinela 1/04/2006 ipaag. 9 iparaag. 4

Ayari—Nkhale ntakihero nomaana naasaaneenyu

Khampa nincuweleehu, anamwane ankhala anamwane, akhwaawe arina nrima woohiiwelela ni akiina uhitthuna yoovariya. (Uphattuwaca 8:21) Isiyani ayari inlamuliyaaya upanka? Ibiibiliya ineera: “Ulolo unaavaranaca ni nrima wa mwaana, ikopo yoottarusa inaamwiiriha wuupuwela naankhili.” (Miruku 22:15) Ayari akhwaawe anooniha wiira iyo ikhanlee inanna yoohinamaana yoowiitthuciha asaana. Khweeliini, hataa Ibiibiliya inawoonihera wiira ikhirini ikhanlee itthu yootakhala. Unookhalaru wiira ikwaha cikhwaawe ayari anlamuliya umwaatta mwanaya nlattu woopanka itthu yoohinamaana, nuulumo “Ikopo” unaaca ciicammo unttarusa wiira akhale saana muukumini wawe nenna co ni mpaka.—Maberewu 12:7-11.

Ikano cowiipithya co mbiibiliyani

Ukhalenla 08/2021 ipaag. 22 iparaag. 11

Wuutteeliheni nrima nteko unonvareleenyu Yehova wanlokoni

¹¹ Hiiva ciicammo neevahereraka uvara khula nteko unvahaceriyeehu mumphwinkoni wa Yehova ninaahala utepa utteeliya nrima. ‘Mwiivaherere niikuru cinyu cotheene’ uvara nteko woolalyaa moolumo a Nluku ni uvara miteko cikhwaawe co wanlokoni. (Mite. 18:5; Mabere. 10:24, 25) Mwiitthenkace wiira nkomentari ratta umikutthaanoni. Mwiitthenkace saana mwavahiyaka upanka mphantte wankutthaanoni wo weeriyari isumana. Ni mahumu yoolepelakani upanka itthu wanlokoni, nhicerewe ni nthoonyere ukhala ntthu ookhuluvelya. Mwalepeliyaka upanka itthu wanlokoni nhuupuwele wiira uyo ukhanle nteko woohifayita ni khannolamuliya urihakaca ukatiinyu. Mwiikurumice cinene wiitthuca uvara saana nteko uvahaceriyeenyu. (Miru. 22:29) Mweekurumicaka nnaahala utepa waakuva ikhomaala mminepani ni wuutteelani nrima. (Akalas. 6:4) Ciicammo, khunhala wuurikani wuutteelani nrima mwawoonaka akhwiinyu wanlokoni yavahaceriyaka miteko cuulupale nyuuva cimpheeleenyu.—Aroo. 12:15; Akalas. 5:26.

21-27 YO JULHO

MIHAKHU CO NNUULUMONI NA NLUKU MIRUKU 23

Ikano comaana cinhala ukavihera mananna oowurya nipha

Mphwanye Utteeliya Uhimmala! mpantta 43 ipontu 2

Ibiiblya inooluma isiyani nhina uwurya mapha?

Yehova neera wiira ikhanlee itthu yoonanara uwurya cinene ni uhapaliya. (Akalasiya 5:21) Ibiiblya ineera: “Nhikhaleni wamoca naale anwurya iviinyu venci.” (Miruku 23:20) Phimaana, napheelaka uwurya nihaana niivaracaka wiira nihiwurye pusya hataa ukhalaka wiira niri veekha. Uwurya cinene pooti umwiiriha ntthu uhuupuwela saana, uhiivaraca nhina wo citthu cinoolumaawe ni hataa cimpankaawe. Uhiya commo, uwurya cinene ciicammo pooti umpanka pusya ntthu mwiirutthuni wawe. Wakhalaka wiira khaninkhitiri wiivaraca nhina mananna cinwuryeehu mapha, nihaana nikupaleelaka uhiya uwurya wenennwo.

Perspicaz vol. 1 ipaag. 305

Uhapaliya

Itthu Ibiibiliya inkhottinhaaya. Uwurya nipha cinene mpaka uhapaliya ikhanlee itthu Ibiibiliya inkhottihaaya. Namantikha mmoca oocuwelaca neera: “Tipani nohuva? Tipani nokhala niiwasiwaasi? Tipani nonyakulihana? Tipani nosanka? Tipani rina makhwatta woohittheka itthu? Tipani ankhwiinle miitho?” Phaale anviriha ukati mwinci yawuryaka nipha, ale antotha nipuro niryaaya iviinyu. Khaanoona mananna ciryaaya niphanno neettheliyaka nkoopuni ni khaanoona ukati unviraaya wammilo. Masi anoona ninaahapanle khampa lumiye ninwa yoohapala. Nipha pooti umwiiriha ntthu uhikhitiri wuupuwela, wuulumaca ni mananna omaana, uwerennya ni mpaka ukhwa. Uhiya commo, pooti uhuva nlattu woorihakaca nsurukhu waarinaawe athumakacaka nipha, ukhala ntthu oohikhuluvelyaa ni mpaka uhikhalana ikuru wiira avare miteko.—Miru 23:29-33; Ose 4:11; Mat 15:18, 19; Miru 23:20, 21, 34, 35.

Ikano cowiipithya co mbiibiliyani

Sentinela 04/2017 ipaag. 32 iparaag. 16

Mwiikurumice upanka yotheene inkhitiriinyu wiira munswalele Yehova!

Yehova honivaha iparakha yookavihera ukhulupalyaawe. Tiyapu ahokhitiri umwiiriha Atamu ni Hawa unrukunuwela Yehova ni enre wiira phiitthu inhalaawe upanka naatthu otheene o watuniyani. Manannani ninhaleehu woonihera wiira khaninonhiya Yehova? Ninawoonihera neekurumicaka ukhala atthu owiiwelela ni ookhuluvelyaa. Yehova naakhala ootteeliya oonaka wiira ntthu naalakela ukavihera ukhulupalyaawe. (Miru. 23:15, 16) Naayo manannaayo, Yehova naahala umwaakhula Sotwani, ooniheraka wiira Tiyapu khanlee owootha. (Miru. 27:11) Vano, nakhalaka atthu owiiwelela ni nakaviheraka ukhulupalyaawe, ninanvaha Yehova ile impheelaawe.

28 YO JULHO–3 YO AGOSTO

MIHAKHU CO NNUULUMONI NA NLUKU MIRUKU 24

Mwiitthenkace wiira mwaanane masakha

Perspicaz vol. 2 ipaag. 643 iparaag. 2

Woomolanihaciya

Makristau ciicammo inawaacivela itthuvo inhalaaya waakhela ale anvilela. Uulumaka iyo itthuvweeyo, Yesu aheera: “Ahocaaliya ale anlupatthiya nlattu woweettela isariya, kontha Umwene wa Nluku ukhanlee waawaya.” (Mat 5:10) Ucuwela citthu cinhala wiirannya uhoolo ni ule khuluvelihile nnyo citthunnyo unawaalipiha. Cinawaavaha ikuru makristau wiira akhale ookhuluvelyaa hataa yaananaka ulupatthiya. Nlattu woonkupali Yesu, ayo anaahuvihiya khampa ipottha. (Mabere 2:14, 15) Moopuwelelo a Yesu ari ooreera weettela wakhalaka wiira ninaalakela uhihiya weettela ikano ca Nluku nalupatthiyaka. Afilipo 2:5-9 neera; “Nhihiye wiikurumica wuupuwela khampa Yesu Kristu coopuwelaawe; uyo ahaamini ukhwa, iyeeni, ukhwa wanipottoni.” (Afili 2:5-8) “Nlattu wookhuluvelihiya utteeliya, uyo ahovilela wiiviya wanipottoni, khaawacenre woonihaciya wawe ihaaya.”—Mabere 12:2; 2 Akor. 12:10; 2 Atesal 1:4; 1 Pet 2:21-23.

Sentinela 15/12/2009 ipaag. 18 iparaag. 12-13

Nkhale ootteeliya ukati unaananeenyu masakha

¹² Miruku 24:10 naahimya woohikhuwakhuwa, eeraka: “Nhoonihera uriipiya nrima nihuku no masakha? Ikuru cinyu cinaalolovaca.” Iveerusu ikhwaawe ineera: “Masi nrima woocukulaca unaamooceehaca ntthu.” (Miru. 15:13) Makristau makhwaawe anaakhalaka owoocyaaca mpaka uhiya usoma Ibiibiliya ni wuupuwela itthu insomaaya. Khunaacivela-tho ulompa ni pooti uhaacivela ukhala nkhayi ni mayamunnaaya. Khweeliini, ukhala ooriipiya nrima pooti unihonona.—Miru. 18:1, 14.

¹³ Woovirikanaca, wiiwehera saana pooti unikavihera woona citthu co muukumini wihu cinniphwanyiha utteeliya. Mwene Davidi hantikha coo: “Unaakicivela upanka itthu inoocivela, oo Nlukwaaka.” (Isaa. 40:8) Caahineetteleke saana citthu muukumini wihu, itthu ihinlamuliyeehu uhiya upanka ukhanlee unswalela Yehova. Khweeliini, nrette woomalamaliha uriipiya nrima ukhanlee wiikurumica uvara miteko cimphwanyiha utteeliha. Yehova naanihimerya wiira pooti unkhaleehu ootteeliya wakhalaka wiira ninaakumiha ukati wiira nisome ni utotha ucuweleeha nuulumo nawe. (Isaa. 1:1, 2; Tiya. 1:25) Nuulumo na Nluku ni mikutthaano cinaanikavihera ukhala ootteeliya.—Miru. 12:25; 16:24.

Ukhalenla 12/2020 ipaag. 15

Makoho Aanamasoma

Ilivuru yo Miruku 24:16 ineera: “Hataa ukhalaka wiira nasariya naamora imaara 7, uyo naahala wunwa-tho.” Niireke iyo iveeruswiiyo immwaaca ntthu novara matampi ikwaha cinci, phileveleliyaka ni Nluku?

Khweeliini, iyo kahi phi itthu impheelaaya uhimya ila iveeruswiila. Iyo immwaaca ntthu anonkhumelela masakha menci, masi hinhiya uvilela.

Coo, Miruku 24:16 yeeraka “umora,” khinaaca uvara matampi. Masi immwaaca ntthu anonkhumelela masakha menci. Ila ituninya yoohinamaaneela, ntthu nasariya pooti uweryaaciya ni unkhumelela masakha makhwaawe. Mpaka uyo pooti ulupatthiya venci naakhulupale ookuvernu. Masi hataa cankhumelelaka citthu cotheennyo, uyo pooti ukupali wiira Nluku naahala unkavihera uvilela khula marikariko. Muupuwele ikwaha ciwonneenyu atthu anonswalela Nluku caakhumelaka saana citthu caya. Nlattuni iyo inkhumelelaaya? Iyo inkhumelela kontha “Yehova nawaamaaliha atthu otheene ammora ni naawunwusa atthu owiicooromelela otheene.”—Isaa. 41:1-3; 145:14-19.

Ikano cowiipithya co mbiibiliyani

Sentinela 15/10/2009 ipaag. 12

Makoho Aanamasoma

Ukati wo asarayeli, Nlopwana apheelaka uteka inupa awula uthela, uyo ahaana eekohaka coo: ‘Kiireke kinaahala ukhitiri waawacera amwaaraka awula asaanaaka?’ Hinaaya uthela, ahaana eetthucaka uwacera imatta cawe. Phimaana, mahukweehwaala, Ibiibiliya intaphulela iyo iveeruswiiyo nimananna oohirika wiiweeha. Iyo ineera: “Uhiteke inupa ni uhikhalane itthoko mpaka wamphiyeraaya uhephiya miri caalilyaa ni ukhuluvela wiira unaahala ukhitiri wiilihera.” Niireke itthu imocaaru inawiiranyaa mahukwaala?

Iyee. Nlopwana nopheela uthela haana eetthenkacaka ratta. Wakhala wiira khanweryaaciya, haana akhalanaka nteko. Khweeliini, wiikurumica wa nlopwana khunlamuliya ukhala woopheela ukhalana ikaruma paahi. Ibiibiliya inaahimya wiira nlopwana hinaaverya amucyaawe ni hinaalihera nhina mminepani phiri ntthu notepa ukhotta waamini, unvikana ntthu hirina waamini. (1 Tim. 5:8) Naayo manannaayo, nlopwana nopheela uthela, haana wiikoha coo: ‘Kiireke kinaahala ukhitiri uwaaverya iyoolya amucyaaka? Kinaahala ukhitiri waalihera nhina mminepani?’ Nuulumo na Nluku ninankurumica ntthu nopheela uthela utthara nnyo ikanonnyo.—Deut. 6:6-8; Efesu. 6:4.

Phimaana, mmirawo noopuwela uthela haana oopuwelaka sana-saana ikano imphwanyannya nhina Miruku 24:27. Ciicammo, athiyana ampheela utheliya unaareera wiikoha wakhala wiira anaahala ukhitiri wiiraneeha nrintti unhalaaya ukhalana watthokoni ni waawacera asaana. Atthunaka ahinaaya waayara asaana, anamathelana amirawo anawoopela mwaha nkhayi. (Luka 14:28) Utthara nnya ikanonnya unawaakavihera apoovu a Nluku ukhala ootteeliya watthokoni waya.

4-10 YO AGOSTO

MIHAKHU CO NNUULUMONI NA NLUKU MIRUKU 25

Ikano comaana co mbiibiliyani cinnikavihera wuuluma nimananna omaana

Sentinela 15/12/2015 ipaag. 19 iparaag. 6-7

Nhuulume moolumo oohiloka

⁶ Miruku 25:11 naalattaniha ifayita urinaaya uthanla ukati wooreera wuuluma, eeraka coo: “Khampa masaa owooru ari munttiisini noopankiya niiparaatha, phinkhalaaya nuulumo nowuulumiya ukati womaana.” Masaa owooru ankhala ooreera. Masi masaayo weesiya waya munttiisini noopankiya niiparaatha, unaatepa woonannyaa ureera waya. Inanna imocaaru, nathanlaka saana ukati wooreera wuuluma, moolumweehu anaahala ukhala omaana ni oolipiha. Ninhala upanka cani iyo?

⁷ Moolumweehu pooti waakavihera atthu anniviriyana. Masi, naahithanleke saana ukati wooreera wuuluma, pooti uhinkavihera ntthu hataa vakaani. (Nsome Miruku 15:23.) Moone itthu yiirannyeele u Japão, mweeri wo Março, mwaakha 2011. Yaahokhumelela ihasara yaakwanyulacile isittatti cinci. Nlattu wo iyo, atthu oopwahaka 15.000 yahokhwa ni Masaahiti a Yehova yaakhala uyo ncokooyo ciicammo yahohuva. Masi hataa ukhalaka commo, ayo mayamunnaayo yaheekurumica uyo ukatyuuyo wiira yaamaalihe ni yaalipihe atthu yaavarelaka nteko Ibiibiliya. Ni uhiya commo, ayo yaahaalipiha nimoolumacerwaaya, yaahimeryaka kontha isiyani nnyo citthunnyo caawiiraneelaaya atthu oohittheka itthu.

Sentinela 15/12/2015 ipaag. 21 iparaag. 15-16

Nhuulume moolumo oohiloka

¹⁵ Ikhanlee itthu yofayita wuuluma khampa ninoolumasereehu. Ukati Yesu wuulumilyaawe nari u sinakooka, isittatti yoo Nazaré, apoovu ‘yaahokhala ootteeliya ni moolumo a Yesu.’ (Luka 4:22) Moolumo omaana anaakavihera cinene ni ananvara nrima ntthu. Khweeliini, wuuluma nimananna omaana unaahala uwiiriha atthu uviriyana itthu inuulumeehu. (Miru. 25:15) Hiiva pooti wanontakiheehu Yesu nikhalaka atthu oonamaana ni waawacera atthu. Nlattu woowoona atthu enci yanviriyanaka saana, Yesu “ahopacera wiitthuciha citthu cinci.” (Mark. 6:34) Hataa ukhalaka wiira Yesu anruwaninya, uyo khaakhula.—1 Pet. 2:23.

Uthoonyera unamaana ukati wo wuuluma pooti ukhala itthu yoorika, utepa wakhalaka wiira ntthu nomuulumaneehu khanlee mmuciihu awula ntthu owanlokoni noncuweleehu saana. Hi pooti wiicona ukhala ootaphuwa para wuuluma woohoovelela. Niireke Yesu aanwuulumana pusya attharyaawe nlattu wookhala atthu yaacuwelaawe saana? Mena vakaani! ukati attharyaawe waanyakulihanaaya nhina tipani aari nkhulupale iriyaryaaya, Yesu ahaavaraca ni ahaalaka ni mananna omaana, ni ahovaha ntakihero no mwaana mwaankaani. (Mark. 9:33-37) Mahumu pooti untakiha Yesu, yavahaka ikano ”‏yathonyeraka unamaana.”‏

Sentinela 1/04/1995 ipaag. 17 iparaag. 8

Manannani ninhaleehu ukurumicana uthoonyiherana nifento ni upanka miteko comaana?

⁸ Khampa aswali a Yehova, otheene nihaana ukurumicana uwacerana. Yesu aanaawacera ale yanviriyana. Uyo waanoncivela cinene nteko woolalyeera. Oonela ukhala khampa iyoolyaawe. (Joau 4:34; Aroo. 11:13) Wuuluma nimananna ootteeliya pooti uwiiriha atthu akhwaawe ciicammo ukhala ootteeliya. Nnyemaka wuuluma moolumo anoonihera wiittottopa, mwaahimerye atthu akhwaawe o wanlokoni citthu coolipiha ciwiirannyenleni muukumini winyu. Mwaalattulaka atthu akhwaawe waavarana nteko, moone mananna oohala waakavihera waacivela uwoopana myaha ca Yehova atthu akhwaawe.—Miru. 25:25.

Ikano cowiipithya co mbiibiliyani

Perspicaz vol. 1 ipaag. 379

Wiiyeviha

Ntthu nawiiyeviha kontha haana waamini ni ihaavo itthu inkhuluvelaawe. Khanhiya woonihera ukhalana makhalelo omaana. Uhiiyeviha pooti umwiiriha ntthu uhikhala ookhikiceryaa, uviruwaca, uhikhalana waamini ni niweherero, ni mpaka ukhala niiwasiwaasi. Miruku 25:28 inawaalattaniha ale ahinoonihera wiiyeviha, yeeraka coo: “Ntthu hinkhitiri wiivaraca nokhala khampa isittatti ihirina imuuru yookhikicera.” Wiiyeviha unaamalamaliha moopuwelelo oohiloka ammwiiriha ntthu upanka citthu coohinamaana.

11-17 YO AGUSTO

MIHAKHU CO NNUULUMONI NA NLUKU MIRUKU 26

Nhinthweelane “ntthu nlolo”

Perspicaz vol. 1 ipaag. 485 iparaag. 6

Ipula

Ukati. Ukati wopula ni ilimwe waari ukati wofayita ilapo asarayeli yaakhuluvelihiyaaya. (Nwehe Isaa 32:4; Nci 2:11.) Ukhuma iriyari mweeri wa abril ni iriyari mweere wo outubro khinrupa ipula cinene, kontha unkhala ukati woohephiya icoolyaa. Miruku 26:1 inawoonihera wiira ipula yaarupa ukati woohephiya icoolya, khayaakhalana ifayita. (Nwehe 1 Sa 12:17-19.) Yakhalaka iyiita, ipula khinrupa mahuku otheene. Ukhala wiira unkhala ukati wooririya, ipula pooti umwiiriha ntthu wiicoona unririiya. (Estr 10:9, 13) Phimaana, nipwaro nookhikiceryaa ninkhala nipuro nomaana.—Isai 4:6; 25:4; 32:2; Jó 24:8.

Sentinela 1/10/1987 ipaag. 19 iparaag. 12

Ulakiya unaaphwanyiha nnema

¹² Atthu akhwaawe anaapheela ulakiya cinene. Khampa cinthoonyeraaya Miruku 26:3: “Ikavalo incaphiya ni muufulo wo mikhoyi, puuro noheleliya ikarumaawe wiira eettihiye ni atthu alolo anttarusiya niikopo.” Ikwaha cikhwaawe, Yehova anaahiya apoovu o sarayeli veekhaaya yaananaka masakha yeekumihereraaya mwaanenyaaya: “Ayo khayeewelela Nuulumo na Nluku; khayaatthara ikano ya mpattusi. Phimaana, yaaheekumiherera masakha mwaanenyaaya; ayo yaahokwakwathuwa ni khaavo aakavihenre. Vano yaahopacera unlompa Yehova wiira aakavihere uviriha masakha yaananaaya; uyo aahakavihera utthema masakha yaavirihaaya, khampa caapankesaawe.” (Isaa. 107:11-13) Vano, atthu oohiiwa uhimeriya anawiiphwanyiha masakha mwaanenyaaya: “Ntthu hintthuna wiiwa alakiyaka naahala utankanyinnya.”—Miru. 29:1.

Perspicaz vol. 1 ipaag. 580 iparaag. 2

Uttumpela

Uvarela nteko khampa nruku. Mwene Salomau enre coo: “Khampa ntthu nthikilaawe inyaa cawe ni eepankaka pusya mwaanenyaawe, iyo phiitthu inwiirannyeela ale anonhimerya isiiri caya nlolo.” Nlopwana nonvahacera uwacera mihakhu cawe ntthu oohuupuwela saana, unkhala khampa noorihakaca citthu cawe. Khweeliini, khawaahala umweettela saana nteko waahalaawe uvara.—Miru 26:6.

Ikano cowiipithya co mbiibiliyani

Ukhalenla 09/2023 ipaag. 19 iparaag. 18

Ukhala ntthu oomaala unoonihera ukhala ntthu oolipa

¹⁸ Khweeliini, khunakhala paahi nlattu wonhimerya ntthuuyo phinhalaawe ukupali itthu ninhimyeehu. Masi wuulumaca nimananna omaana ni nooniheraka ukhala ntthu oomaala pooti ukavihera. (Nsome Akolosu 4:6.) Wuuluma citthu cinaminiihu unaalikanaca nunvonyera nkhunanihu boola. Hiiva pooti unvonya saana awula niikuru. Nanvonyaka saana, khunhala unrikela nkhunanihu unvara ni uhihiyerera unttikha. Woolikanaca, nuulumaka nimananna oomaalya, atthwaayo anaahala upheela wiiwelela ni urwaanela uhoolo mwahooyo. Khweeliini, wakhalaka wiira ntthu nopheela uninyakulihanana awula nawuuluma pusya citthu cinaaminiihu, hiiva khaninkhanyererihiya urwaanela uhoolo mwahooyo ni umwaakhula uyo ntthuuyo. (Miru. 26:4) Masi atthu enci khanhala ukhala commo. Khweeliini, atthu enci anaahala wiiwelela.

18-24 YO AGOSTO

MIHAKHU CO NNUULUMONI NA NLUKU

MIRUKU 27

Manannani apatthani eekhweeli anniphwanyihaaya iparakha?

Ukhalenla 09/2019 ipaag. 5 iparaag. 12

Yehova uncivela cinene atthu owiiyeviha

¹² Ntthu owiiyeviha naasukhuru avahiyaka ikano. Wootakihera, wuupuwele wiira weeva uri Usalau yo Umwene. Uhowuulumana mayamunna enci, masi munna mmoca naawuucisa vate ni, oolumacaka vakaani, naawiirela co: “Ihookoromela iyoolya mmiinoni waa.” Weeva atthunaka waanaahala woona ihaaya. Masi niireke khawaahala unsukhuru uyo munnooyo nlattu wo wuuhimyera? Ni khweeliini waanaahala wuucivela unahimyeriye khalayiiru! Inanna imoca, munna mmoca alipaka nrima wiira anihimyere awula anivahe ikano impheeleehu, ninlamuliya wiiyeviha ni unsukhuru. Nihaana ninweheraka uyo munnooyo khampa mpatthaniihu, kahi nlupatthiihu.—Usome Miruku 27:5, 6; Akalas. 4:16.

Perspicas Vol. 2 ipaag. 1215 iparaag. 12

Aattamanani, nkhunaninyu

Iliivuru ya Miruku inaasovenriha unkupali, unkhuluvela ni upheela umwaavya nkhunanihuwiira anivahe ikano comaana ni ninawoonihera ucuwelaca nanwehawehaka ukati wo masakha. Iyo ineera: “Nhintthawe nkhunaninyu awula nkhunanaya athumwaninyu ni nhikele mpaani wa nyeenyeenyu ukati wo masakha. Kontha, phataari untthawelela mwaattamanani ri wakhiviru uhiya nyeenyeennyu ri uttayi.” (Miru. 27:10) Unawiira ila iveeruswiila impheela uhimya wiira mpatthani omaana naatthaweleliya ukati wo masakha, uhiya munna ri uttayi. Atthunaka nlattu mmuciihu awula munneehu wookhala uttayi pooti uhikhitiri unikavihera wowaakuvyaaca.

Ukhalenla 09/2023 ipaag. 10 iparaag. 7

Mmiravo—Ukumyaa umpheela wiira ukhale cani?

⁷ Citthu coohiloka caalakenlyaawe upanka Yehoyasi, ninawiitthucera wiira hiiva nihaana waathanla apatthani omaana annikurumica upanka citthu comaana. Nihaana nikhalanaka apatthani anonfenta Yehova ni ampheela untteeliha nrima. Ni asipatthaniihu pooti ukhala oolupale unipwaha myaakha cihu hiiva awula pooti ukhala amirawo cinene. Uhiliyale wiira Yehoyasi aari mmirawo cinene nanlikanihaka ni Yehoyata. Uwuupuwelaka asipatthannya, wiikohe co: ‘Ayo anaakikavihera ulipihaca umwaamini waka Yehova? Ayo anaakikurumica miiva weettela ikettelo ca Yehova Nluku? Ayo anawuuluma myaha ca Yehova ni ikhweeli co mbiiblyani? Ayo anaahisima ikettelo ca Yehova? Ayo anooluma citthu wiira paahi akicivelihe awula ahaana ulipa nrima wiira akivahe ikano kapheelaka?’ (Miru. 27:5, 6, 17) Ikhweeli phi ila: Wakhala wiira asipatthannya khaanonfenta Yehova, ayo khaanakhala apatthani anhala wuukavihera. Masi wakhala wiira asipatthannya ananfenta Yehova, waavaresese ayo apatthannyaayo—yaayo phiri apatthani anhala wuukavihera!—Miru. 13:20.

Ikano cowiipithyaa co mbiibiliyani

Sentinela 15/09/2006 ipaag. 19 iparaag. 12

Ipontu cooreera uweheeha ciri nlivuruni ya Miruku

27:21. Nattottopeliyaka, hiiva pooti woonihera ikhalelweehu. Nattottopeliyaka ninawoonihera wiiyeviha wakhalaka wiira ninaanttitthimiha Yehova ni uhihiya unswalela. Ntthu nawoonihera uhikhalana wiiyeviha wakhalaka wiira nawiicoona attottopeliyaka.

25-31 YO AGOSTO

MIHAKHU CO NNUULUMONI NA NLUKU MIRUKU 28

Uvirikana wantthu ootakhala nrima ni ooreera nrima

Sentinela 15/05/1993 ipaag. 26 iparaag. 2

Nhihiyerere untthara Yehova muukumini winyu motheene

“Anasariya ankhala khampa kharamu ooyariya phiyaaru neekhuluvela.” (Miruku 28:1) Ayo anawoonihera waamini waya yakhuluvelaka Nuulumo na Nluku ni anaarweehela uhoolo nteko wa Yehova hataa yaananaka masakha.

Perspicaz vol. 1 ipaag. 814 iparaag. 3

Ucuwelaca

Ale anhiya weettela ucuwelaca. Ule nohiya weettela ikhweeli ciicammo naahiya unwehera Nluku ukhala namakavihera ukati woolakela citthu. (Jó 34:27) Ntthu nopanka commo nawiihiyerera eettihiyaka ninrimaawe wiira apanke citthu cootakhala ni naahiya moopuwelelo omaana. (Isaa 36:1-4) Hataa eeraka wiira nanswalela Nluku, naahoolelihera upanka citthu cinaacivela apinaatamu, uhiya cinoncivela Nluku. (Isai 29:13, 14) Uyo nawoonihera makhalelwaawe oohinamaana ni owuulihaca muru ni “noona ukhala itthu yomaana” (Miru 10:23), ni naakhalana moopuwelelo anoonihera ulolo ni nawiikupaliha wiira Nluku khanoona citthu coohinamaana cimpankaawe. (Isaa 94:4-10; Isai 29:15, 16; Jer 10:21) Uyo nawiira mwaaneenyaawe coo: “Yehova Khaavo” (Isaa 14:1-3) ni khanonwehaweha. Nlattu woohitthara ikano ca Nluku, uyo khankhitiri uhukhumu citthu saana, kontha khanwehaweha inanna citthu cotheene ciiraneelyaaya.—Isaa 28:5.

Perspicaz vol. 1 ipaag. 1237 ipaag. 1

Imaani

Ukhala ntthu eemaani khunakhala ukhala na mihakhu awula wiikurumica upanka citthu comaana, masi ntthuuyo haana akhalanaka waamini woolipa ni unkhuluvela Yehova ni ikuru cawe. (Isaa 25:21) Nluku naakhuluveliha wiira naahala waakhikicera ale aneetta niimaani. (Miru 2:6-8; 10:29; Isaa 41:12) Wiikurumica wawe upheela wuunuwiha upatthannyaawe ni Yehova unaamwiiriha ukhala saana muukumini wawe, woohihiya weettela ikano ceekhweeli. (Isaa 26:1-3; Miru 11:5; 28:18) Hataa ukhalaka wiira Jó ahoona wiira ntthu ookhalana imaani pooti umphwanya masakha awula wiiviya nlattu wookhalana imaani, Yehova naakhuluveliha wiira uyo ntthuuyo naahala ukela ntuninyani yo naanaano ikhuluvelihilyaawe ni ukumyaawe unaahala ukhala wo nnema ni naahala waakhela citthu cinci comaana. (Jó 9:20-22; Isaa 37:18, 19, 37; 84:11; Miru 28:10) Khampa Jó, itthu immwiiriha ntthu ukhala ofayita ukhanlee ukhalana imaani, kahi wiincivana mihakhu. (Miru 19:1; 28:6) Ayari arina ila ikhalelweela, asaanaaya ankhala ootteeliya. (Miru 20:7) Ni anaakhalana ntakihero nomaana nootthara.

Ikano cowiipithya co mbiibiliyani

Ukhalenla 07/2024 ipaag. 19 iparaag. 19

Nkhale oohiitthaala mwattehiyaka

19 Vano, wakhala wiira ihaavo itthu nanlelo innirikela unyema upanka, isiyani inlamuliyeehu upanka wiira ihinikurumice uvara itampi? Pooti wantthareehu ikano ya Yesu: “Nkhale oohiitthaala.” Hataa noonaka wiira nikhanle oolipa nhina mminepani, nnyeme citthu cowoopiha. (1 Akor. 10:12) Muupuwele nyuuva itthu ipankileenyu wiira nkhitiri unyema uttehiya ni nhihiyerere upanka iyo. Miruku 28: 14 “Ootteeliya aale ahineetthaala mpaka”—2 Pet. 3:14.