Yusufu aayariye athumwaane anooluvanleene. Phimaana, ayo yaananfenta cinene waavikana asaanaaya akhwaawe. Niireke iyo yahaacivela asinyeenyaawe? Mena. Nlattu wo iyo itthwiiyo, asinyeenyaawe yahopacera unrama ni unthanya Yusufu. Nihuku nimoca, Yusufu aholoha itthu yootikhiniha cinene ni ahaahimeerya asinyeenyaawe. Masi ayo khayaacivenle ni yahoopuwela wiira Yusufu aapheela wiikhaliha mwene. Iyo itthwiiyo yahowiiriha utepa unthanya.

Nkwaha mmoca, asinyeenyaawe Yusufu yahorwa utakhwani uliha inama. Vano, Yaakopi ahonruma Yusufu wiira aawehe wakhala wiira yahaavo akumi. Ukati waamonnyaaya Yusufu awaaka, yahopacera wiirelana co: “Mmooneke namalohooyo hophiya. Nihimmwiivelani yoole?” Ukati waaphiilyaawe, yahonvara ni yaahonrihela munlikittini nowiisya. Masi yoole ukatyuule, yahovira asilopwana yaarwaaca ilapo yo Iciipitu. Vano Yutaa, nyeenyaawe Yusufu omuulupale, ahowiirelaca asunnawe co: “Khawaahala ureera umwiiva. Phataari nintumihe wiira apankiye ipottha. Vano, yahontumiha Yusufu. Yaaliviye misurukhu 20 coparaata.

Nuuwakatyaaya, yahocisa ihancu ya Yusufu ni yahottikitthela iphome yokhontwaa wiira ukhaleke khampa Yusufu eeviye niinama. Vano yahocisa ihancwiiyo ni yahaarwaanela athumwanaya ni yahowiirela co: “Paapa, ila keera ihancu ya Yusufu?” Athumwanaya yahoriipiya nrima cinene, kontha yoopuwela wiira Yusufu aheeviya niinama co ntakhwani ni khaavo aakhitiri waamaaliha.

Upiihiya wawe u Iciipitu, Yusufu ahotumihiya-tho khampa ipottha. Uyo aathumiye ni nlopwana eehaniya Potifaari aawacera mihakhu ca amwene. Masi Yehova khaahiile unkavihera Yusufu. Potifaari aahoona wiira Yusufu anvara nteko saana ni anreera unkhuluvela. Woohipica, Yusufu ahothanliya wiira awacereke mihakhu cotheene ca Potifaari.

Amwaara a Potifaari yahoona wiira Yusufu aari mwammirawo okuru ni ooreera cinene. Khula nihuku, yanonkhanyereriha wiira aarupane. Yusufu oonenle cani iyo itthwiiyo? Uyo aahowaakhula eeraka co: “Akintthuna. Iyo khinakhala itthu yomaana. Apatarawu anaakikhuluvela ni nyuuva nkhanle amwaaraya. Karupaka ni nyuuva, kinaahala untthekela Nluku.”

Nihuku nikhwaawe, amwaara a Potifaari yahopacera unkhanyereriha Yusufu wiira aarupane. Ayo yaahovara ikuwo ya Yusufu ni yahopacera umpurulela wankorini va. Wowaakuvyaaca, Yusufu aahahiyera ikuweeyo ni ahotthawa. Ukati Potifaari waaphiilyaawe uwaani, amwaarawe yahomootherya Yusufu wiira aapheela waarupana. Masi iyo yaari itthu yowoothiya. Vano, Potifaari ahorusiya cinene ni ahaaruma anantekwaawe wiira yantthukele Yusufu nkhattya. Masi, Yehova khaahiile unkavihera Yusufu.

Ukati Yusufu waaryaawe nkhattya, mwene o Iciipitu eehaniya Farawoo aholoha itthu yontikhiniha. Masi, khaavo aakhitiri unhimerya itthu yaalohilyaawe maanaaya isiyani. Nanteko mmoca a Farawoo ahonhimeerya wiira Yusufu anhala ukhitiri utaphulela itthu yaalohilyaawe. Phimaana, Farawoo ahonruma wiira amwiihane.

Uwaaniya wawe Yusufu, Farawoo ahonkoha co: “Unaakhitiri ukihimerya itthu ilohilyaaka maanaaya isiyani?” Yusufu ahaakhula eeraka co: “Maanaaya wiira ilapo yo Iciipitu cinaahala uvira myaakha 7 inarivo iyoolya yinci. Masi, caviraka nnyo myaakhannyo, cinaahala uvira-tho myaakha 7 woohikhala iyoolya ni inaahala uvola itala cinene. Phimaana, nyuuva amwene nhaana unthanla nlopwana oocuwelaca ni omiruku wiira asunke iyoolya yinci para wiira waphiyaka ukati woothwaa iyoolya, apoovu ahikhwe itala.” Vano, Farawoo ahomwiirela co: “Paahi kihoothanla weeva! Ukhuma ileelo, thi weeva unhala ukhala nkhulupale onayeeli ilapo yotheene yo Iciipitu. Yusufu aakhitinri cani utaphulela itthu Farawoo yaalohilyaawe? Yehova phankavihenre Yusufu.

Myaakha 7 coyoolya yinci, Yusufu ahotthenkaca ni ahosunka iyoolya yinci. Vano wahoolo, wahophiya ukati wotala. Yahothwaa iyoolya cinene, mpaka atthu olapo cikhwaawe yaanrwaa u Iciipitu wiira yathume iyoolya. Mpaka Yaakopi, naryeene u Kanaa, ahocuwela wiira u Iciipitu yahaavo iyoolya. Phimaana, ahaaruma asaanaawe wiira yathume.

Uphiya waya u Iciipitu, asinyeenyaawe Yusufu yahorwaa unkhoromela wiira amuulumane. Ayo khayancuwelenle wiira aari mwaamunnaya. Masi Yusufu ahaacuwelela ni ahoopuwela itthu yaalohilyaawe khalayi, nari mmirawo. Yusufu aapheela waatteha asinyeenyaawe wiira oone wakhala wiira nanlelo yaari ootakhala nrima. Uyo aheerela co: “Nyu mwaalatarawu. Nwaale woona ilapweehu wiira ncuwele mananna oonikelela.” Ayo yaheera: “Mena. Khaninakhala. Hi ninkhuma u Kanaa ni naari 12. Masi mwaamunnihu mmoca hokhwa ni nkiina oomalela uyariyooyo hanle uwaani ni apaapeehu.” Vano Yusufu ahaakhula co: “Wootha! Mwanwaanaka mwaamunninyu hanlyooyo, mi phinhalaaka wuukupalini.” Vano, ayo yahoturuwela u Kanaa.

Wahoolo, asinyeenyaawe Yusufu yahoturuwela u Iciipitu wiira yathume iyoolya. Ula nkwahoola, yahonkusa mwaamunnaya oomalela uyariya, eehaniya Benjamii. Yusufu ahowoona ni ahaatteha-tho. Uyo ahovitha ikoopu yoparaata nsaakhuni ya Benjamii ni ahowootheriha wiira ayo yaheennya ikoopu. Ananteko a Yusufu yaahaavyaavya ikopwiiyo ni yaahophwanyaca inari nsaakhuni ya Benjamii. Asinyeenyaawe Yusufu yahokhalaca anasankile. Ayo yahonlevela Yusufu wiira pooti waattarusaawe ayoca, masi anlevelele Benjamii.

Vano Yusufu ahoona wiira asinyeenyaawe yahorukunusa mirima caya. Vano, uyo khaakhitinri-tho uvilela ni ahopacera wunla ni aaheera: “Mi mwaamunninyu Yusufu. Apaapa nanlelo ahaavo?” Asinyeenyaawe Yusufu khayaakupali wiira uyova nanlelo aari akumi. Wiira Yusufu uwoonihere wiira ahaalevelela, aahowiirela co: “Nhoone ihaaya nlattu wo citthu cikipankileenyu. Nluku phikiwanne uno wiira koopole ukumiinyu. Vano pooti urwaaca ni mwaawaane apaapa.”

Asinyeenyaawe Yusufu uphiya waya u Kanaa, yahonhimerya Yaakopi iyo itthu yomaaneeyo ni amuci otheene yahothamela ilapo yo Iciipitu. Hataa ukhalaka wiira waahovira ukati mwinci, wahoolo Yusufu ahoturuwela ukhala naamucyaawe.