Makoho aanamasoma

Niireke Eklesyaste 5:8 inwuuluma paahi ahooleli apinaatamu awula ciicammo immuluma Yehova?

Ila iveerusu yootikhiniheela ineera: “Nipuro ninkhaleenyu, moonaka ahuvihiyaka amasikhini ni moonaka iheetteliyaka isariya ni ihipankiyaka itthu yomaana, nhikhale ootikhinihiya. Kontha ule rina ukhulupale naawehiya ni nkhulupale nkhwaawe ompwaha, ni ahaavo akhulupale akhwaawe owaapwaha ala.”—Ekles. 5:8.

Unkhala toko ila iveeruswiila inooluma paahi itthu inaakhumelela ahooleli ookuvernu. Masi khweeliini, ila iveeruswiila ciicammo inaaniitthuciha ikhweeli ya Yehova yoonimaaliha ni yoonitteeliha nrima.

Eklesyaste 5:8 immuuluma nhooleli naatulumu amasikhini ni hinaawacera niisariya. Uyo haana oopuwelaka wiira nawooniya ni nhooleli ookuvernu nkiina ompwaha. Khweeliini, pooti ukhala wiira ahaavo ahooleli ookuvernu enci arina ukhulupale wompwaha uyova. Wooriipiha nrima, nhina ikuvernu caapinaatamu, ahooleli otheene pooti ukhala oohikhuluvelya, ni apoovu phinhuva nlattu woohihooleliya saana.

Hataa ukhalaka toko wiira nihovelavelaca, ihaavo itthu innimaaliha. Nhiliyale wiira Yehova nanweha “ule rina ukhulupale” nhina ikuvernu caapinaatamu. Hiiva pooti unlepela Nluku wiira anikavihere ni unhimyera masukhuliihu otheene. (Isaa. 55:22; Afili. 4:6, 7) Hiiva ninaacuwela wiira “meetho a Yehova anaaweha ituninya yotheene, wiira aakavihere ale arina nrima wonvaresesa uyova paasi.”—2 Ikor. 16:9.

Phimaana, Eklesyaste 5:8 inooluma itthu inaakhumelela ahooleli apinaatamu; ithoonyeraka wiira khula ukati haavo ntthu rina ukhulupale wowaapwaha. Masi itthu yuulupale cinene inniitthucihaaya iyo iveeruswiiyo phi ila: Yehova phiri nkhulupale ooverihela; khweeliini uyo khanle Nkhulupale hinlikananiya. Nnava, Yehova nvahacenre Mwanawe, Yesu Kristu, wiira akhale Mwene muumweneni wawe. Ni Yehova Nakuru-Cotheene noweha citthu cotheene, khanle nasariya, ni Mwanawe Yesu ciicammo khanle nasariya.