Anakhotto okuru a Yehova

Mwene o Siiriya eehaniya Ben-Hadade ahomananiha ikwaha cinci waatuphela asarayeli. Masi porofeeta Elisewu khaahiya unhimeerya mwene o Isarayeli citthu Ben-hadade apheelaawe upanka. Phimaana, uyo porofeetooyo ahotthawela isittatti yo Dota wiira hiiviye. Vano mwene o wa Siiriya ahaaruma anakhottwaawe wiira arwee iyo isittattiiyo wiira yanvare Elisewu.

Anakhotto o wa Siiriya yahorwa isittatti yo u Dota masi yaaphiile uhiyu. Usawaya nrumiya a Elisewu aahoona isittattiiyo inarukureeriye ni anakhotto enci. Uyo ahoova cinene ni ahokhuwela eeraka: “Elisewu vano ninhala upankani?” Elisewu ahomwaakhula co: “Uhoove. Nihaana anakhotto enci waavikana ayo.” Woohipica, Yehova ahomwiiriha nrumiya a Elisewu woona itthu yootikhiniha. Uyo ahoona wiira myaako cotheene caacanre ikhavalu ni ikaaro co ikhotto yo mooro.

Ukati anakhotto o wa Siiriya yapheealaaya untthuka Elisewu, uyo aholompa eeraka: “Sontte Yehova, mweerihe ala atthwaala uhoona.” Vano anakhottwaayo yanweha masi khayoona ni yaahopacera uhicuwelela nipuro naaryaaya. Vano Elisewu ahowiirela co: “Nhorimelaca, nkittharace mi kinawuuveleelani nipuro niryaawe ntthu nnomwaavyeenyu. Anakhottwaayo yahontthara Elisewu mpaka usamariya, isittatti yaakhalaaya amwene o Isarayeli.

Ukati asiiriya yaacuwenlyaaya nipuro naaryaaya , waahovira ukati yaahalaaya upanka itthu yaarumiyaaya, vano mwene o Isarayeli ahonkoha Elisewu eeraka co: “Kiwiivakaceke?” Elisewu aahakhula wiira: “Mena. nhiwiivakace. Mwaavahe iyoolya ni mwaahiyeke arweeke.” Vano amwene o Isarayeli aahoruma utthenkaciya iyoolya yinci wiira avahiye anakhotto o wa siiriya. Nuuwakatyaaya, aahowiirela nrwaaceke uwaani.