Ihaavo Ibiibiliya itaphulenle iyo iveeruswiiyo co: “Ncuweliye wiira mwaatthu oohilipalipa [awula oohikhanyerera itthu].” Nyu nhaana mwiikohaka co: ‘Kiireke wiira atthu anaakoona ukhala ntthu oohilipalipa ni owaakuva uleva itthu? Awula kinooniya ukhala ntthu oolipalipa, ookhanyerera ni oopica uleva itthu? Awula kinawiiwelela miruku caakhwaaka ni kinaweettela?’ Inanna cinoonihereehu uhilipalipa wihu, phinthoonyera wakhala wiira ninantakiha Yehova ni Yesu awula mena.Makhalelweehu yarukunuwaka, nihaana nikhalaka atthu oohilipalipa. Ayo marukunuswaayo pooti uwaana itafaawuti cahaaweherereehu, toko uwerennya venci, unithwaa nsurukhu awula uhuva nlattu wo nanrokottole osiyaasa ncoko unkhaleehu. (Ekles. 9:11) Hataa ciicammo uhihiya nteko waavareehu pooti uniwaanela marikariko menci. Hi pooti ukhitiri wiilemaleliha makhalelo onaanaano napankaka nnya citthu cesennya: (1) ukupali itthu innikhumelela, (2) uweheeha citthu coohoolo, (3) uweheeha citthu comaana, ni (4) waapankela citthu comaana akhwiihu. w23.07 ipaag. 21-​22 iparaag. 7-8

Porofeeta Daniele aari mmirawo ukati waakusiyaawe naababilooniya wiira atthukeliye uttayi niilapo yoowannyawe, u Yerusalemu. Uyo aahookhalaru mmirawo, ahaatikhiniha ahooleli o Babilooniya. Ayo yahoona wiira Daniele aari “ntthu omaana, ooreera” ni wiira amucyaawe yaari atthu yaahisimiya. (1 Sam. 16:7) Phimaana, ababilooniya waapheelaaya umwiitthuciha makhalelo o Babilooniya wiira avare nteko uwannyaya amwene. (Dan. 1:3, 4, 6) Yehova aananfenta Daniele Yehova anfenta Daniele nlattu wo makhalelo yaathanlalyaawe ukhalana. Uyo atthunaka aarina myaakha 20 niitthwaaya ukati Yehova waamwiirenlyaawe wiira anlikanaca ni Nowee ciicammo ni Jó. Yehova aamoona ukhala nasariya khampa Nowee ni Jó, alopwana yanvarenle nteko uyova myaakha cinci. (Upha. 5:32; 6:9, 10; Jó 42:16, 17; Ezek. 14:14) Daniele ahokhala myaakha cinci answalelaka Yehova. Ni Yehova ahonfenta myaakha cotheenennyo. —Dan. 10:11, 19. w23.08 ipaag. 2 iparaag. 1-2

Nyuuva nnopheela uthuma inupa. Nyuuva mwanhala upheela . nyuuva mwanhala upheela woona citthu cotheene. Pooti wampankeehu itthu yoolikanaca ukati unsomeehu Ibiiblya. Wakhala wiira nyuuva mwacisaka Ibiiblya nnosoma moolumwaayo paahi, khannohala wiitthuca myaha cuulupale, masi nnohala wiitthuca paahi “citthu coopacera co nnuulumoni nowaarya na Nluku.” (Mabere. 5:​12) Khampa caahaleenyu urwaa wooneeha inupa impheeleenyu uthuma, nyuuva ciicammo nhaana usoma Ibiiblya sana-saana wiira nkhitiri wiiweeha. Mananna oosoma saana Ibiiblya ukhanle utotha ucuwelela ­manannani mphantte wo mbiiblyani unsomeenyu cinvaranacaaya nimiphantte cikiina. Nhiikurumice wiiweeha paahi ikhweeli co mbiiblyani nyuuva cinkupaliinyu, masi ciicammo mwiikurumice ucuwela kontha isiyani nnokupaliinyu nnyo ikhweeliinnyo.Wiira niiweehe Nuulumo na Nluku, nihaana wiitthuca ikhweeli cuulupale co mbiiblyani. Apostolu Paulu ahowiirela mayamunna wiira yahaana usoma Nuulumo na Nluku saana wiira akhitiri ‘ucuweleeheeha yaatapuwelo, irekamelo, yeemelelo, ni yiiserelwaaya’ ikhweeli ca Nluku. Naayo manannaayo paahi, phaahalaaya ukhitiri ulipihaca waamini waya. (Efesu 3:​14-​19) Ni iyo phi itthu hiiva ninlamuliyeehu upanka. w23.10 ipaag. 18 iparaag. 1-3