MWAHA WOOSOMIYA 51
NCIPO 132 Hiyo na Erutthu Emosaru
Manannani munhaleenyu utthenkaca ikacamentu yonttitthimiha Yehova?
“Masi citthu cotheene cipankiye niihisima ni cithotokanihiye ratta.”—1 AKOR. 14:40.
ITTHU INHALEEHU WIITTHUCA
Nhina ula mwahoola ninaahala woona mananna makristau anlamuliyaaya unttitthimiha Yehova nihuku ninthelanaaya.
1-2. Manannani Yehova noweheraawe ikacamentu?
NYUUVA nhopakanela awula nhopakaneliya? wakhala wiira nnaakhula iyee, iyo ikhanle itthu yootteeliha nrima. Atthunaka nyuuva nri mootthenkaca ikacamenttwiinyu. Yehova naavaha ifayita uthelanaca winyu. Uyo nopheela wiira nkhale ootteeliya ikhumelo nihuku nnothelaneenyu ni mpaka.—Miru. 5:18; Nci. 3:11.
2 Ikhanle itthu yofayita unttitthimiha Yehova nihuku nnothelaneenyu. Kontha isiyani nineereehu commo? Ni manannani munhaleenyu unttitthimiha Yehova nno nihukunno? Hataa ukhala wiira ula mwahoola unwuuluma atthu apakanelanne, masi ikano co ula mwahoola pooti unikavihera otheene cihu unttitthimiha Yehova nakhalaka wiira ninaalattuliya awula ninaalepeliya ukavihera utthenkaca ikacamentwiiyo.
KONTHA ISIYANI MUNLAMULIYEENYU UNTTITTHIMIHA YEHOVA NIHUKU NNOTHELANEENYU?
3. Isiyani ale ampheela uthelana anlamuliyaaya woopela mwaha ahinaaya uthelana ni kontha isiyani?
3 Atthu apakanelanne ni alakenle uthelana, ahaana yapankaka ikacamentu yattharihaka ikano ca Yehova. Kontha isiyani? Kontha Yehova phikumiherenre uthelanaca. Uyo phaawiirihile apinaatamu oopacera Atamu ni Hawa uthelanaca. (Upha. 1:28; 2:24) Phimaana, ale anlakela uthelana ahaana yahooliheraka weettela ikano ca Yehova ukati unthelanaaya.
4. Kontha isiyani ale apakanelanne ahaana yanttitthimihaka Yehova nihuku ninthelanaaya?
4 Cihaavo-tho citthu cikhwaawe cinlamuliya uwiirihani unttitthimiha Yehova nihuku nnothelaneenyu. Uyo khanle Paapeenyu ni mpatthaniinyu. (Mabere. 12:9) Nyuuva khamumpheela umalamaliha upatthani urineenyu ni Yehova. Wohitikhinaca, nyuuva khamumpheela wiira yeerannye itthu nno nihukunno awula nihuku nikhwaawe inhala unriipiha nrima Yehova. (Isaa 25:14) Muupuwelaka citthu Yehova cuupankenlyaaweni ni cinhalaawe wuupankelani wahoolo, khannokupali wiira unaamphwanela uttitthimihiya nihuku nnothelaneenyu?—Isaa. 116:12.
MUNHALA UNTTITTHIMIHA CANI YEHOVA?
5. Manannani Ibiibiliya inhalaaya waakavihera ale ampheela uthelana ulakela citthu comaana?
5 Mbiibiliyani khaavo malamulo anhimya mananna cinlamuliyaaya upankiya ikacamentu. Phimaana, ale anlakela uthelanaca pooti umpankaaya ikacamentu phanka cilamaleliyaaya ncoko unkhalaaya ni phanka cinaacivelaaya. Ciicammo aswali eekhweeli ahaana yeettelaka malamulo aahooleli ookuvernu. (Mat. 22:21) Ni ikacamentu intthenkaciya civareliyaka nteko ikano ca Yehova, cinaantteeliha nrima ni cinanttitthimiha. Vano, ikanoni cinlamuliyeenyu wuupuwela?
6. Kontha isiyani ale ampheela uthelana anlamuliyaaya weettela malamulo o ikuvernu?
6 Weettela malamulo ookuvernu. (Aroo. 13:1, 2) Ilapo cikhwaawe ahooleli ookuvernu ahaana malamulo anlamuliya weetteliya naale ampheela uthelana. Atthu ampheela uthelana ahaana waavya ucuwela ayo malamulwaayo nlaponi waya. Wakhalaka wiira unawaarika ucuwelela, pooti unlepelaaya ukaviheriya ni mahumu.a
7. Manannani cinlamuliyaaya upankiya ikacamentu yomaana?
7 Ntthenkace saana wiira nno nihukunno nakhale nomaana. (1 Akor. 10:31, 32) Mwiikurumice woonihera makhalelo omminepani, uhiya woonihera makhalelo o ila ituniyeela. (Akalas. 5:19-26) Phanka cinooniheraaya ikano co mbiibiliyani, ntheli phinlamuliya utthenkaca wiira nihuku ninhalaaya uthelanaca nikhale nootteeliha nrima ni nomaana. Isiyani inhala ukavihera wiira nno nihukunno nakhale nomaana? Anamathelana enci anaalakela wiira nno nihukunno nitaphuleliye mwaha unuuluma ikano co mbiibiliyani. Uyo mwahooyo wataphuleliyaka niihisima ni ninifento, unaahala waakavihera ale anviriyana woona wiira uthelanaca ikhanle iparakha ya Yehova. Phimaana, makristau enci ampheela uthelana anaalakela upankiya uyo mwahooyo Usalauni Yoomwene. Nyuuva mwapheelaka wiira wataphuleliye mwaha Usalauni Yoomwene, nhaana nwantikhelaka iwarakha khalayiiru mahumu.
8. Manannani ikacamentwiinyu inhalaaya unttitthimiha Yehova? (Aroo. 13:13)
8 Nsome Arooma 13:13. Nyuuva mwalakelaka upanka ifesta nihuku nnohaleenyu uthelana, manannani munhaleenyu unyema wiira iyo ifesteeyo ihikhale phanka yaatthu ahinonswalela Yehova? Nuulumo neeheperewu nineera ‘ifesta coohiloka’ anaaciya mapuro yaathukumanaaya atthu wiira awurye mapha ni yiine macipo mpaka uhiyu iriyari. Nyuuva mwalakelaka wiira nakhale nipha wafeestani va nhaana nwehaceraka wiira hikhale ntthu norwaa uhapaliya.b Mwalakelaka urumiha macipo, nhirumihe cinene, wiira atthu akhwaawe akhitiri woopa mwaha. Ni nwehacere iciponi cooreera urumiha ni citthu cinuulumaaya wiira hikhale nohala ukakathuwa nhina mminepani.
9. Isiyani ale ampheela uthelana anlamuliyaaya uwehacera nhina citthu coothukelela nno nihukunno?
9 Mapuro makhwaawe amucyaaya ni apatthannyaaya ale anthelana, cihaavo citthu cinhimyaaya. Uhiya commo, mapuro makhwaawe cinaapankiya ividiyu ni anaalathiya ifootu ale anthelana awula anaakhala-tho mananna makhwaawe oothuka-thuka. Nnyo citthunnyo cinawiiriha nno nihukunno ukhala nootteeliha nrima. Masi, nhaana uwehacera wakhala wiira citthu cotheene cinhala upankiya cinhala ukhala comaana. (Afili. 4:8) Nhinaaya ulakela upanka khula itthu mwiikohe co: Kiireke inaahala woonihera ihisima? Inaahala woonihera ihisima ukati woothelanaca? Ni nikoho nootepa ukhalana ifayita munlamuliyeenyu wiipanka phinna: Iyo itthwiiyo inaahala unttitthimiha Yehova? Hataa ukhalaka wiira khinakhala itthu yootakhala wuulumaca citthu cooteehaca nno nihukunno, nhaana nwehaceraka wiira hikhale norwaa wuuluma moolumo anhala uwiiriha atthu wuupuwela urupihana. (Efesu 5:3) Wakhala wiira amuciinyu anaahala upheela wuulumaca nno nipuronno, nwehacere wakhala wiira khanhala wuuluma citthu cihimpheeleenyu wiira cuulumiye.
10. Kontha isiyani ale ampheela uthelana anlamuliyaaya ukhala oohilipalipa? (1 Joau 2:15-17)
10 Nkhale owiiyeviha. (Nsome 1 Joau 2:15-17.c) Yehova naakhala ootteeliya awoonaka aswalyaawe yapheelaka unttitthimiha uhiya wiittitthimiha. Yapankaka commo, khanhala urihakaca nsurukhu apheelaka wiicoonihera wiira anamakhalana. Ifayitani urinaaya upanka ikacamentu yoohirikarikaca? Moone itthu yaamwiirannyeenle munna mmoca neehaniya Mike nokhala o Noruega. Uyo neera: “Ukati naathelanneehu khanaakopha-kophile, phimaana khanaarina masukhuli. Ikacamentwiihu yaari yoohirikarikaca. Masi waanokhalaru commo, yaari yomaana ni yootteeliha nrima.” Anuunu amoca aneehaniya Tabitha ankhala o India, aneera: “Khanaarina masukhuli uwakathi waathelanneehu, uthelanaca wihu waari woohirikarikaca ni khanaarina citthu cinci coopheela uthuma.”
Hataa nikhalaka nipuroni, ikacamentu yo makristau pooti ukhala yoonttitthimiha Yehova. (Nwehe iparaagarafu 10-11)
11. Manannani ale ampheela uthelana anhalaaya woonihera uhiicoona nhina wo ikuwo cinhalaaya uwara? (Nwehe ciicammo ilatarato.)
11 Nholakela itthu yoopheela uwara? Wohitikhinaca nyuuva nnaapheela uphwaneliya nno nihukunno. Hataa khalayi, atthu yaathelana yanaawara ikuwo comaana. (Isai. 61:10) Khweeliini, ikuwo cinhaleenyu uwara nihuku ninhaleenyu uthelana cinhala ukhala coovirikana ninnyo nnowareenyu khula mahuku. Masi unookhalaru commo, nhaana nwaraka ikuwo cohisima. (1 Tim. 2:9) Nhiware ikuwo cinhala uwiiriha atthu wuuweheehani awula wuusankani.—1 Pet. 3:3, 4.
12. Kontha isiyani ale ampheela uthelana ahaana anyemaka weettela khula ileema ihinvarihanaca niitthu inhimyaaya Ibiibiliya?
12 Nnyeme ileema cihinvaranaca niitthu inhimyaaya Ibiibiliya. (Apoka. 18:4) Atthu enci nhina ila ituniya ya Sotwaniila, uthelanaca waya unaahela nhina makhalelo onttiinini cowootha, ukhwiri awula upheela wooniya. Yehova nanisovenriha unyema ayo makhalelo ohiiryaayo. (2 Akor. 6:14-17) Wakhala wiira ihaavo ileema ineetteliya ncoko unkhaleenyu nihuku ninthelanaciya, nhinaaya ulakela nyuuva ciicammo urwaa weetteliya nihuku nnorweenyu uthelana, mwaavye ucuwela mananna cikhumakhumalyaaya ni wakhala wiira inaavaranaca niitthu inhimyaaya Ibibiliya.
13. Manannani anamathelana anhalaaya utakiha makhalelo a Yehova ukati woovahiya itthuvo?
13 Ncoko unkhaleenyu annovahiyaka itthuvo ale anthelana? Itthuvo yantthu ookhalana pooti uvirikana ni yantthu oohikhalana. Ibibiliya inawaasovenriha makristau ukhala oovaha, yapankaka commo anaakhala otteeliya. (Miru. 11:25; Mite. 20:35) Masi, khaninlamuliya waakhanyereriha atthu anaalattuleehu univaha itthuvo ciicammo khanimpheela woonihera wiira itthuvo cinivahilyaaya akhunanihu khacirina ifayita. Ninantakiha Yehova nasukhurweelaka citthu cootheene cinnivahaaya akhunanihu ninrimaaya wootheene.—2 Akor. 9:7.
UNYEMA NI UTTHEMA MARIKARIKO
14. Marikarikoni anamathelana akhwaawe yaanannyaaya?
14 Nyuuva pooti waanana marikariko ukati untthenkaceenyu ikacamentu yonttitthimiha Yehova. Watthunaka nyuuva pooti wuurikelani uttenkaca ikacamentu yohirikarika. Munna Charlie nokhala u Ilhas Salomão, neera: “Wahonirikela ulakela tipani aalamuliya uwa ukacamentuni wihu, nahaana asipatthaniihu enci ni otheene yaaweherera ulattuliya.” Anuunu Tabitha aromoliye, aneera: “Ifesta co ikacamentu cimpankiya ncoko unkhalaaka anaalattuliya atthu enci. Phimaana asipaapeehu waahaarikela ukupali ukati wenreehu wiira ninhala waalattula atthu 100 paahi.” Anuunu Sarah ankhala u India, aneera: “Atthu enci anweheeha mananna cinhalaaya uweheriya naatthu. Amucyaaka yahopankiha ikacamentu yuulupale cinene ni miiva ciicammo kanaapheela upankiha yuulupale uvika iyo. Isiyani inhala wuukaviherani utthema ala marikarikwaala ni makhwaawe?
15. Kontha isiyani ale ampheela uthelana anlamuliyaaya ulompa anhimeryaka Yehova citthu cootheene cinlakelaaya?
15 Munlompe Yehova munhimeryaka citthu cinlakeleenyu. Munhimerye Yehova citthu cootheene cinlakeleenyu. (Afili. 4:6, 7) Nyuuva pooti unonlompeenyu Yehova wiira ookavihereni ulakela upanka citthu comaana. Ni ukhala oolipa nrima wakhalaka wiira citthu cikhwaawe cinlakeleenyu upanka atthu akhwaawe khaalamalenle. (1 Pet. 5:7) Nyuuva pooti utepa unkhuluvela Yehova, moonaka mananna naakhulaawe mavekelweehu. Anuunu Tabitha yuulumiye aneera: “Mi naawannyaka naakhala niiwasiwaasi nuupuwelaka wiira nanhala unyakulihana awula nanhala waanyakulihanana amuci. Phimaana, khula ukati noopeleehu mwaha nihuku naahaleehu uthelana, naapacera ni nivekelo. Yehova ahonikavihera ni nno nihukunno naahokhala nonnema.”
16-17. Manannani woopaca mwaha ratta unhalaaya waakavihera ale ampheela uthelanaca ulakela citthu comaana?
16 Muulume niihisima. (Miru. 15:22) Nyuuva nhaana nlakelaka citthu cinci nhinaaya uthelana, toko nihuku nohala uthelana, citthu cinhala uvareliya nteko, atthu anhaleenyu waalattula ni citthu cikhwaawe. Nhinaaya ulakela itthu moopele mwaha ni moone wakhala wiira inaavaranaca ni malamulo o mbiibiliyani. Ciicammo moopele mwaha ikano civahiyeenyu ni mayaamunna ni mayaanuunu ookhomaala nhina mminepani. Ukati unoopaneenyu mwaha amuciinyu awula asipatthaniinyu citthu cinlakeleenyu upanka, nkhale oohilipalipa. Wakhala wiira asipapeenyu anawuulepelani upanka itthu nnooneenyu wiira khinhala uvirikaniha malamulo o mbiibiliyani, nwiiwelele. Ukati unthelaneenyu, ciicammo unkhala ukati womaana waasithumwaninyu. Wakhala wiira khamunhala weettela citthu cinoolepelaayani, niihisima mwaahimerye kontha isiyani nhinhaleenyu weettela. (Akol. 4:6) Mwaahimerye wohaakhuwa-khuwa amuciinyu wiira itthu yofayita cinene nno nihukunno ukhanle nootteeliha nrima ni nonttitthimiha Yehova.
17 Waahimerya miyaapaapeenyu ahineettela ikhweeli citthu cilakenleenyu upanka pooti ukhala itthu yoorika, nyuuva pooti waakavihera ucuwela kontha isiyani nnolakeleenyu commo. Anuunu amoca o India aneehaniya Santhosh, aneera: “Amuciihu yaapheela wiira neettele ileema co ittiini ineehaniya Hindu, ayo waahaarikela cinene ukupali citthu caalakenleehu upanka. Phimaana nahorukunusa mananna naahaleehu upanka iyo ikacamentwiiyo, masi woohivonyaniha malamulo o mbiibiliyani. Khampa, waakakhaniha iyoolya naalakenleehu niiyolya yaacivela amuciihu, ni ciicammo naholakela uhirwaa urumihaciya icipo ni wiiniya kontha amuciihu khalamalenle.”
18. Isiyani inhala waakavihera ale ampheela uthelana uweettela saana citthu cilakenlyaaya? (1 Akorintu 14:40) (Nwehe ciicammo ilatarato.)
18 Ntthenkace ratta. Mwatthenkaca citthunnyo khannohala ukhala niiwasiwaasi nihuku ninhaleenyu uthelana. (Nsome 1 Akorintu 14:40.) Munna Wayne nokhala u Taiwan neera: “Nihinaaya uphiya nihuku naahaleehu uthelana nahothukumana naatthu yiivaherenre unikavihera, nahoopela mwaha mananna caahaleehu utthenkaca citthunnyo nno nihukunno wiira citthu cotheene ciirannye ratta. Wiira nwoonihere ihisima atthu yaalattunleenyu mpanke citthunyo khampa cilakenleenyu.
Wiitthenkaca saana nihinaaya uphiya nihuku ninhaleenyu uthelana, unaahala wuukaviherani ukhumela saana ikacamentwiinyu (Nwehe iparaagarafu 18)
19. Isiyani inhala waakavihera ale anthelana ukhalana ikacamentu yomaana?
19 Muupuwelaka khalayiiru mananna oohala upanka ikacamentwiinyu, nnaahala unyema marikariko. (Miru. 22:3) Wakhalaka wiira ncoko unkhaleenyu atthwaayo aholamalela uwa ukacamentuni woohilattuliya, mmananihe waateeliha wiira hikele ule hilattuliye, vano wakhalaka wiira uyo ntthu hilattuliyooyo naakela, munlepele ukhuma ni munhimyeere nlattuni hinlamuliyaawe ukela ni manannani cinhalaaya upankiya ikacamentu. Nyuuva pooti umoonihera mwaha uneera: “Como é que são os casamentos das Testemunhas de Jeová?” mwaha uri nsayitini jw.org. Wiira nkhitiri wiirannyeeha citthu cootheene cilakenleenyu nyuuva pooti unonlepelenyu munna oolipa nhina mminepani wiira akhale nhooleli o ikacamentwiinyu. (Joau 2:8) Mwanhimyeeraka sana saana citthu cimpheeleenyu wiira ciirannye ukacamentuni winyu uyo pooti wuukaviherani ikacamentwiinyu weetta saana khampa cilakenleenyu.
20. Isiyani ihinlamuliyaaya uliyala ale ampheela uthelana?
20 Nyuuva pooti ukhala niiwasiwaasi ukati nnothenkacenyu ikacamentwiinyu, masi nhiliyale wiira ninhala ukhala nihuku nimoca paasi ninhala ukhala nihuku noopacera munhaleenyu ukhala naamwaarinyu awula naawannyinyu, mwiikurumice wiira ikacamentwiinyu yakhale yoohirikarika awula yomaana ni Yehova naahala wuukaviherani, nttharaka ikano ca Yehova nyuuva nnahala ukhalana ikacamentu yomaana ni yootteeliha nrima.—Isaa. 37:3, 4.
NCIPO 107 Yehova ti Ntakiheryo Nuulupalena ophenta
a NUULUMO NOOTAPHULELIYA: Ikhapila cinci ikacamentu unhela nhina ukhuluvelihana uhoolo wa Nluku wiira nnahala ukhalakhala nkhayi mpaka. Anamathelana akhwaawe anaalakela upankiha ifesta nno nihukunno, wiira ncuwele-tho mananna makristau cineettelaaya malamulo omuuthelanani nwehe mwaha uneera: “Casamentos honrosos à vista de Deus e do homem” uri nhina Sentinela 15 yo Outubro, 2006.
b Moone ividiyu iri nsayitini Jw.org ineera Miiva pooti waavaha mapha atthu yaalattunlyaaka?
c 1 Joau 2: 15 Nhifente ila ituniyeela ni citthu cirivo ila ituniyeela. Ntthu nofenta ila ituniyeela, nifento na Apaapa khaniri nuuyo; 16 kontha citthu cotheene cirivo ntuninyani—citthu coocivela mwiirutthuni, citthu coocivela mmiithoni ni usamiha mihakhu—khacinkhuma wa Apaapeehu, masi cinkhuma ntuninyani. 17 Uhiya va, atthu aneera aviraka, ni citthu cinaacivela, masi ule nopanka impheelaawe Yehova naakhala mpaka.