Ilyalemvilwe na Luka
10 Lyene pa cisila ca vintu vii, Umwene wasoolwile na yauze 70 nu kuyatuma yaili yaili pakuti yamukoleelele umu misumba yonsi ni ncende zino wali nu kupitamo. 2 Lyene wayanenyile ati: “I cumi uzombozi uukulu, lelo aomvi iyacepa. Acino lengini Umwineco wa uzombozi kuti atume aomvi mu mulimo wakwe uwa kuzombola. 3 Pitangini! Nkumutuma wa mfwele umu mimbulu. 4 Mutasenda icola ca mpiya nanti icola ca vyakulya nanti indyatu, nupya mutaalamuka ali wensi* umu museo. 5 Ing’anda yonsi ino mwingilamo, mwatandikilapo ukulanda imuti: ‘Umutende uye umu ng’anda yii.’ 6 Nupya ndi cakuti mwazanapo umuntu wa mutende, umutende ulaya pali aliwe. Lelo nga mutamuzanyile, umutende ulaswilila kuli mwemwe. 7 Fwandi mwaikala umu ng’anda kwene iiyo, mwalya nu kumwa vino yamupekanyizizya, pano umuomvi walinga ukupeelwa amalipilo. Mutakuka icikukekuke umu mang’anda.
8 “Nupya nga mwingila umu musumba uli onsi nupya yamupokelela, mwalya vino yamupekanyizizya 9 nupya mwapozya alwale yano mwazanamo nu kuyanena ukuti: ‘Uwene wakwe Leza iupalama.’ 10 Lelo ndi cakuti mwingila umu musumba umwi nupya yatamupokelile, mwaya umu miseo ikalamba iya musumba uwo nupya mwalanda mukuti: 11 ‘Twamukuntila nu lukungu kwene ululi uku ngazo zitu ulwa mu musumba winu. Lelo manyini ukuti Uwene wakwe Leza iupalama.’ 12 Nkumunena ukuti, pa Wanda wa Upinguzi cilipisya uku musumba uwo ukucila Sodoma.
13 “Kalanda kuli mwe yantu amu Kolazini! Kalanda kuli mwe yantu amu Betisaida! pano ndi cakuti vizungusyo ivyacitiilwe umu misumba inu ivicitilwa uku yantu ya mu Tuli na Sidoni, nga yalapiile mpiti nu kuzwala masaaka nu kwikala umwi twi. 14 Pa wanda wa upinguzi cilipisya kuli mwemwe ukucila Tuli na Sidoni. 15 Nupya namwe mwe yantu ya mu Kapenaumu, uzye mukwelenganya ukuti Leza alamucindamika ukucila ivintu vyonsi ivyasyala? Alamutwala uku Malindi!*
16 “Wensi uuvwa kuli mwemwe ala uvwa na kuli nene. Nupya wensi uwasuula mwemwe ala wasuula nani kwene. Nupya wensi uwansuula ala watasuula nu wantumile.”
17 Lyene asambi yakwe 70 yawezile nu luzango ala yakuti: “Mwene, ni viwa kwene vikutuvwila nga twalumbula izina lyako.” 18 Lino Yesu uvwile vivyo wayanenyile ati: “Indola mpiti kuno Satana akupona ukufuma umwi yulu wa nkuwa. 19 Lolini! Imupeela amaka akulyata inzoka na makalela,* nupya imupeela maka akucimvya alwani, nupya kusi icili consi icilamucisa. 20 Lelo mutazanga pa mulandu wakuti imipasi ikumuvwila, lelo zangini pa mulandu wakuti mazina inu iyalembwa umwi yulu.” 21 Pa nsita iiya umupasi wa muzilo walenzile Yesu ukutemwa sana, nupya walanzile ati: “Tata, we Mwene wi yulu ni insi, nkukulumbanya paswe, pano wafisa ivintu vii ku yantu ya mano na asambilile nu kuvisokolola ku yantu aicefya wa yana anono. Ee, Tata, pano cikwene acino walondanga ukuti cicitike. 22 Tata aliwe wampeela ivintu vyonsi, nupya kusi uwamanya Umwana suka Tata, nupya kusi uwamanya Tata suka Umwana, alino na wensi wino Umwana watemwa ukusokolwela vino Isi waya.”
23 Lyene lino asambi yakwe yali yonga, wayanenyile ati: “Ansansa aantu yano manso yao yakalola ivintu vino mukulola. 24 Pano nkumunena ukuti, ya kasesema aingi na ya mwene yalondesyanga ukulola ivintu vino mwemo mukulola lelo yataaviweni, nupya yalondesyanga ukuvwa ivintu vino mwemo mukuvwa lelo yataavyuvwile.”
25 Lyene umuntu umwi uwamanyile sana amasunde wakatwike pakuti aezye Yesu, wamuzizye ati: “Kasambilizya, i vintu ci vino ndinzile ukucita pakuti nkaye nu umi wa pe?” 26 Yesu nawe wamuzizye ati: “I vyani ivyalembwa umu masunde? Uzye ukabelengamo uli?” 27 Nawe waswike ati: “‘Uwatemwa Yeova Leza wako nu mwenzo wako onsi, nu umi* wako onsi na maka yako yonsi na mano yako yonsi’ alino nu kutemwa ‘umuzo wakwe vino waitemwa.’” 28 Yesu nawe wamunenyile ati: “Wasuka ningo; uwacita vivyo kwene nupya ulaya nu umi.”
29 Lelo pa mulandu wakuti umuntu wii walondanga ukuilungamika, uzizye Yesu ati: “Uzye umunji aweni?” 30 Yesu nawe wamwaswike ati: “Umuntu umwi wafumanga uku Yelusalemu ala akuya uku Yeliko, nupya ivipondo vyamuzanzile, ivimuzula, ivimuma, nu kumusya apiipi nu kufwa. 31 Lyene ukwaula ukwenekela, simapepo umwi wapitanga umu museo kwene uuwa, lelo lino wamuweni wapambite. 32 Nu mwina Levi kwene lino wafisile apa ncende iiya nu kumulola, nawe kwene wapambite. 33 Lelo lino umwina Samaliya umwi uwapitanga umu museo uuwa wafisilepo nu kumulola, wamuvwilile uluse. 34 Fwandi waile pali aliwe nu kumunyepela ivilonda, aitilapo na mafuta na waini. Lyene wamukwezizye na pali punda wakwe, amutwala uku ng’anda ya enyi nu kumusakamala. 35 Uwanda uwalondelilepo watozile ya dinali yaili nu kupeela umwineco wa ng’anda ya enyi, alino amunena ati: ‘Uwamusakamala, nupya impiya zyonsi zino ulaomvya ukucila pali zii, ndakulipila nga nawela.’ 36 Uzye pali yaa yatatu, a weni wino ukulola ukuti waicisile ukuya umuze wakwe wiya wino ivipondo vyazanzile?” 37 Nawe watiile: “Awiya uwamuvwilile uluse.” Lyene Yesu wamunenyile ati: “Pitanga, nupya nawe kwene uwacita vivyo kwene.”
38 Lyene lino yapitanga, Yesu wingile umu muzi umwi. Nupya umwanaci uwi zina lyakuti Malita wamupokelile umu ng’anda yakwe. 39 Nupya wakweti kaci muze wino yamanga yakuti Maliya, uwikazile umupiipi nu Mwene ala akukutika kuli vino walandanga. 40 Lelo Malita wapamviwe ni milimo iingi. Fwandi waile kuli Yesu nu kumuzya ati: “Mwene uzye utasakamile ukuti kaci unji watandekela imilimo? Munene aize angavweko.” 41 Umwene nawe wamwaswike ati: “Malita, Malita, watusakamikwa nu kupamviwa ni vintu ivingi. 42 I vinono sile ivikulondekwa, nanti conga sile. Pano Maliya wene watasoolola icintu icisuma, nupya kusi aalamupokolola.”